Read BORANA BIBLE – KITAABA WAAQA 2 Samueli 7 Bible Online

2 Samueli 7 - BORANA BIBLE – KITAABA WAAQA bible

2 Samueli 7

¹Eegi hayyichi Daudini mana ufiti gale AABBO Waaqi nyaapa isaa ch'ufa isa iraa d'owe hafuura baaseefi.

²Duuba inni waan raaga Nathani jed'aniini jed'e, Anini mana hind'eesani jaraniti gala, ammo Sanduqi Wold'aqisa Waaqa waaro keesati gala!

³Nathanini waan jed'eeni, Waan atini hereddu ch'ufa tolchi wonti akanatiifi Waaqi si woliini jira.

⁴Ammo halkani suni AABBO Waaqi waan Nathanini jed'e,

⁵Beni, hojattu tiyya Daudini waan jettu, Nami mana anini keesa tau naa jaaru siiniti.

⁶Anini haguma gaafa worra Israeli lafa worra Misiri keesa baase haga arrale taka manati ingale ammo waaromani godaana.

⁷Anini haga worra Israeli woliini godaanu taka nama worra Israelitini deemu tokole, maafi mana hind'eesani jarani na injaarini? jed'e ingaafanne.

⁸Duuba waan hojatu tiyya Daudini jettu, Anini, AABBO Waaqi guddaani, akana sini jed'a, Anini hooliye atini tissitu keesa si fuud'e hayyu worra Israeli si tolche.

⁹Anini fulla atini deemte ch'ufa si woliini deeme, nyaapa kanke ch'ufa si duraa balleese, anini gurra gudda aka hayyooti lafa keesa jirtu ch'ufa qabdu sii kenne.

¹⁰Anini yayu lafa worri kiyya ka Israeli keesa tau, ka nami deebie worra indabsine fohad'eefi iti qubsise. Haguma worri lafa tana d'ufe nyaapi worruma had'a, ammo wonti kunini deebite intaatu. Anini nyaapa keesani ch'ufa isani iraa d'owe isani horsiisa.

¹²Gaafa atini doote fulla duri ababoota tante iti awaalaniti si awaalani anini ilma kanke toko hayyu tolche lafa isaale jabeesa.

¹³Nami mana naa jaaruleeni isuma anini ammalle hayyuma isaa haga jiru jireenna iraa infuud'u.

¹⁴Anini abba isaa tahe innileeni ilma naa taha. Yoyu inni wo yake anini akuma abbaani ilma d'aanu isa d'aana.

¹⁵Ammo anini isa qarqaaru illakisu, aka duri Saulo lakise, fulla isaa hayyu si tolche.

¹⁶Atini haga jirtu d'aloota ind'abdu. Hayyumti teetileeni muumme inqabdu ta haga jiru jireenna.

¹⁷Nathanini waan Waaqi daayya keesa isati hime kaani ch'ufa Dauditi hime.

¹⁸Jennaani hayyu Daudini Waaro Woyyuma ta AABBO Waaqa d'aqe, gatae kad'ate waan jed'e, Anaafi worri kiyyaleni qara eenu, ee AABBO Waaqa, ka atini armaani geete waan kana ch'ufa tolchiteefi?

¹⁹Aka wonti kunini ingahiini atini ammalle waan hagasi ira jirani nu tolchuu jirta, ee AABBO Waaqa; atini yayu waan d'aloota kiyya ka d'ufu kakhate, ee AABBO Waaqa karaani atini nama wo tolchitu kanuma?

²⁰Wonti d'ibiini anini sini jed'u mani? Atini ana hojatu tante imbeeta.

²¹Atini fed'umafi hereguma keetiini waan kana tolchite; waan mama jabdu kana ch'ufa wonti atini tolchiteefi aka wo na barsiiftu.

²²Atini akami gudda, ee AABBO Waaqa! Nami tokoleeni ka aka keeti injiru; nu yo ch'ufa imbeenna, aka atini ch'allaani Waaqa.

²³Gochiti lafa gubbaa jirtu, ta aka gosa Israeli, ta atini tissooma jalaa baafte nama kanke tolfate injirtu. Wonti mama guddooni ta atini worraa tolchite yayu gurra kanke lafa ch'ufaani qit'eesite. Atini gosa d'ibifi waaqa worrale, ato worri atini lafa Misiriti baafte kanke tolfate d'ufu jiru, duraa gussite.

²⁴Atini yayu worra Israeli haga jiru jireenna nama kanke tolfatte ammalle atini ee AABBO Waaqa, yayu Waaqa worraa taate.

²⁵Duuba amma AABBO Waaqa, waan atini naafi d'aloota kiyyaa kakhate, intolcha jette guuti.

²⁶Aka maqaani kanke haga jiru jireenna guddate, duuba, namileeni, AABBO Waaqi guddaani Waaqa Israeli jed'u! Duuba worri hojattu kanke Daudileni si durati hore bulu.

²⁷Ee AABBO Waaqa gudda, Waaqa Israeli, atini yayu waan kana hojattu tanteeti mullifte waan jette, Anini nama d'aloota kanketi hayyu tolcha. Tanaafi hojattuuni kanke garaa jabaate waan kana si kad'ate,

²⁸Ee AABBO Waaqa atini Waaquma! Dubbini tante ch'ufti d'uga, atini yayu kakhu dansaa tana hojatu teetiti kakhate,

²⁹amma anini si kad'ad'a, d'aloota kiyya eebisi, aka worri naasu tante hojja ch'ufa argatu. Atini AABBO Waaqa, yayu waan kana kakhate, ammalle eebiiti tante haga jiru jireenna d'aloota kiyya iraa imbaatu.