Read BORANA BIBLE – KITAABA WAAQA 1 Hayyoota 13 Bible Online

1 Hayyoota 13 - BORANA BIBLE – KITAABA WAAQA bible

1 Hayyoota 13

¹Dubbi AABBO Waaqa gula raagi toko Yudaa bahe, Betheli d'aqe, ka Yeroboamuni fulla sorio iti qalaniti sorio baasu jiru baheeni.

² Dubbi AABBO Waaqa suni gula raagi kaani waan aka mesa ka sorio irati baasani kaani waan isaa dubbate, waan jed'e, Ee mesa, mesa, AABBO Waaqi waan jed'u; ilma maqaani Yosiati worra Daudi keesaa d'alata, ilma suniti qaalole fulla infakaanneti d'ufte, sirati wo baaftu qaqale, lafele namaa sirati guba,

³raagi ammalle waan jed'e, Wonti aka mesa jirtu kunini gargari ch'ach'abt'e, daaraani isa gubba lafati firfirfamti duuba isani akanaani, aka AABBO Waaqi naani dubbate, beetani.

⁴Hayyichi Yeroboamu jed'ani kaani dubbi tana d'agaye jennaani raaga kaaniti quba qabe waan jed'e, Namicha kana qaba! Jennaani hojuma suni hayyicha harki kokotae gach'absachu dad'abe.

⁵Jennaani hojuma suni wonti aka mesa kaani gargari ch'ach'abt'e daaraani lafati jidde, akuma raagi kaani maqa AABBO Waaqatini fage.

⁶Duuba hayyichi waan raaga sunini jed'e, AABBO Waaqa kanke yaamad'u, aka inni harka kiyya na fayyisu na kad'ad'u! Duuba raagi AABBO Waaqa kad'ateefi, inni harka hayyu fayyise.

⁷Jennaani hayyichi waan raagani jed'e gara worraa na gula kooti, waan atini sooratu sii keenne ammalle maro waan atini naa tolchite kanatifi waan d'ibile sii keenna.

⁸Ammo raagi waan jed'eeni, Ato atini waan qabdu ch'ufu qoodde wod'akati naa kennitele, anini si woliini deeme nyaad'e woma si woliini ind'ugu.

⁹Wonti akanatiifi AABBO Waaqi waan nani jed'e, Woma nyaate ind'ugini, ammalle kara d'ufte kaaniini worrati indeebiini.

¹⁰Duuba inni karaa d'ufe kaani lakise karaa d'ibi gula gale.

¹¹Gaafasi jaarsa toko ka raagati Betheli jira. Ilmaani isaa d'ufte waan raagi Yuda bahe kaani d'ufe guyya suni Betheliti tolche iti himte, ammalle waan raagi suni hayyu Yeroboamuni jed'e iti himte.

¹²Jaarsi, raagi suni kara kami deebie? jed'e, Ilmaani isaa gaafate. Worri karaa inni deebie iti hime jennaani,

¹³inni waan worraani jed'e, Harree koora ira naa kaya. Worri koora ira kaye jennaani, inni

¹⁴yaabate faana raaga Yuda kaani iti d'aabate, ato inni mukha gudda toko jala tau baheeni, waan jed'eeni, raagi Yudaa d'ufe sii? Jennaani inni Ee, anuma jed'eeni.

¹⁵Jennaani jaarsi waan jed'eeni, Worra kiyya nu yaasi, sagale sii keenna.

¹⁶Ammo raagi kaani waan jed'eeni, Anini dandae si gula deeme mana kanke inseenu. Yokhaani armaleeti dandae nyaad'e si woliini ind'ugu,

¹⁷wonti akanatiifi AABBO Waaqi waan nani jed'e, waan tokole nyaate ind'ugini, yokhaani kara atini d'uftele indeebiini.

¹⁸Jennaani jaarsi kaani waan jed'eeni, anileeni raaguma aka keetiti malaikaani AABBO Waaqaleeni waan nani jette, Beeni, raaga suni yaami, mana kanke geesi, sagale kennifi, bisaani obaasi. Ammo jaarsi suni dubbi suni inkiyyibe.

¹⁹Jennaani raagi Yuda kaani jaarsa kaani gula gale sagale woliini soorate.

²⁰Ato worri sagale nyaachuti jiru dubbini AABBO Waaqa jaarsa raaga kaaniti d'ufte,

²¹jennaani inni raaga Yudaa d'ufe kaaniti iyye waan jed'e, AABBO Waaqi waan jed'u, waan atini dubbi AABBO Waaqa lakifte waan inni tolchi sini jed'e dideefi,

²²d'ufte sagale AABBO Waaqi inyaatini sini jed'e nyaateefi, amma si ijeesani, awaala worra keesani d'abda.

²³Eegi worri gololfate, jaarsi kaani harre raaga Yuda kaani koora ira kayeefi,

²⁴inni yaabate iti d'aabate. Ato deemu nyeench'aani bahe, nyeench'i sunini nyaate isa ijeese. Reefa isaa ka harreefi nyeench'i bira ejaanjani karaa ke ch'iisa.

²⁵Jennaani nami karaa yau reefa nama ka karaa keesa ch'iisu, ka nyeench'i bira eju arge, dira Betheli d'aqani waan argani suni himani.

²⁶Jaarsi raaga kaani dubbi suni d'agaye jennaani waan jed'e, Sunini raaga dubbi AABBO Waaqa dide! Tanaafi AABBO Waaqi akuma jed'e kaani nyeench'a iti erge, nyeench'i isa nyaate ijeese.

²⁷Jennaani inni waan ilmaani isaatini jed'e, harree tiyya koora ira na kaya

²⁸worri koora ira kayeefi jennaani yaabate, kae iti d'aabate, reefa raaga kaani ka karaa keesa ch'iisu, ka harreefi nyeench'i kaani ufuma bira ejaanjani arge, nyeench'i reefa suni inyaanne harreele woma intolchine.

²⁹Jaarsi raaga kaani reefa suni fuud'e, harree gubba kaye, Betheli geese, aka achiti iti bohani awaalani.

³⁰Inni isa awaala worra isaanii keesati awaale, isaafi ilmaani isaaleeni bohani waan jed'ani, Oboleesa kiyya, oboleesa kiyya, nu ya gargari baane!

³¹Eegi isa irreesani raagi waan ilmaani isaatini jed'e, Gaafa anini duu irreesuma kana keesati na awaala, d'aatu isaa na ch'iifsisa.

³²Dubbini AABBO Waaqi isaani jed'e, ta inni waan sorio irati baasani, ta Betheli keesatifi fulla Waaqa iti kad'atani ta dira Samaria ch'ufa keesale dubbate ch'ufti inuma guutamti.

³³Eegi dubbi taanile Yeroboamuni kara hama kaani iraa indeebine, inni qaalole fulla infakaanne ta sorio irati baasani ta inni jaare hojattu ta namuma arge inni filate taani, filachu illakimne. Inni nama qaallu taha jed'e ufi gabaase ch'ufa qaallu tolche.

³⁴Dabi Yeroboamuni tolche sunini worra isaatiifi d'aloota isaa ch'ufa balleese hobaase.