Read BORANA BIBLE – KITAABA WAAQA 1 Hayyoota 14 Bible Online

1 Hayyoota 14 - BORANA BIBLE – KITAABA WAAQA bible

1 Hayyoota 14

¹Gaafasi ilmi Yeroboamu, ka Abiya jed'ani, fayyad'abe,

²Jennaani Yeroboamuni waan niiti isaatini jed'e, Kai, ufi jijiri, nama d'ibi ufi tolchi, aka nami fuula si wollaalu, duuba Shilo fulla raagi Ahiyaani, ka siti hayyu Israeli taha nani jed'e jiru, d'aqi.

³Qit'a kud'anifi daabofi dammale fuud'i geesifi; duuba inni waan gurbaani keenna kunini tahu siti hima.

⁴Jennaani isiini Shailoti iti d'aabate, mana Ahiyatini baate. Ahiyaani waan jaare ila d'abe.

⁵AABBO Waaqi aka niitiini Yeroboamu waan gurba isii ka faaya d'abe isa gaafacha gad'uftufi ammalle waan inni isiini jechu malele ch'ufa qara iti hime. Niitiini sunini artini baate jennaani nama d'ibi ufi tolchite.

⁶Ammo Ahiyaani isi mana olseentu d'agaye jennaani waan jed'eeni, Olseeni, niiti Yeroboamu, nama d'ibi ufi intolchini, anini odu hamtu siti himu qaba.

⁷Beeni, waan atini Yeroboamuni jettu, AABBO Waaqi Israeli waan siini jed'u; Anini nama ch'ufa keesa si fohad'e gudda worra kiyya ka Israeli si tolche.

⁸Ammalle anini mootuma worra Daudi iraa fuud'e sii kenna. Ammo atini aka hojatu kiyya Daudi intaane, ka seera kiyya guute garaa tokooni na gula deeme waan anini fed'u ch'alla tolche.

⁹Atini worra si durati lafa mohatele ch'ufa ira ya hameenna tolchite, atini na didde, waaqoota d'ibifi akheekha isaani mid'aafate, waaqoota suni kad'atte, akasiini na dallansiifte.

¹⁰Tanaafi amma anini worra kanke badi itiini d'ufe, ilmaani tante ta d'iira gugurdofi didiqole ch'ufa balleesa. Ammalle worra kanke ch'ufa qabe aka kosi gube balleesa.

¹¹Nama worra keeti ka dira keesati duu ch'ufa sareeti nyaata, ka alati duule ch'ufa allaatiti nyaata. Nami dubbi tana jed'e ana, AABBO Waaqa.

¹²Duuba Ahiyaani waan niiti Yeroboamutini jed'e, Atini amma kai gali. Akuma atini dira olseentuni ilmi kanke dua,

¹³worri Israeli ch'ufti wolti bahe isaa bohe isa awaala, nami worra Yeroboamu ka aka dansaa awaala argatu isuma ch'alla, wonti akanatiifi nami AABBO Waaqi Israeli iraa gammade isuma ch'alla.

¹⁴AABBO Waaqi hayyu d'ibi worra Israeliti tolcha, ka mootuma worra Yeroboamu ch'ufa balleesu.

¹⁵AABBO Waaqi worra Israeli d'ae worri aka ilaadu galaana keesati baatu daaqa. Inni worra lafa dansa ababoota isaaniti kenne tana keesaa fuud'e galaana Efrati gama suniti firfirsa, waan worri akheekha waaqa d'ara ka Ashera jed'ani mid'aafate isa dallansiisefi.

¹⁶Waan Yeroboamuni daba tolche worra Israeli daba keesa buusefi, AABBO Waaqi worra Israeli lakise biraa deema.

¹⁷Jennaani niitiini Yeroboamu kaate gara dira Tirsa deebite, akuma isiini mana olseenteni gurbaani isii due.

¹⁸Worri Israeli isaa bohe isa awaale akuma AABBO Waaqi hojattu isaa raaga Ahiyaani jed'e.

¹⁹Waan Yeroboamuni tolcheefi had'iisa inni nama had'eefi aka inni lafa mohatele ch'ufa kitaaba Odu Hayyoota Israeli ch'ufa keesati t'aafaniti t'aafani.

²⁰Yeroboamuni ganna diddami lama lafa mohannaani due awaalani, duuba ilmi isaa Nadabuni fulla isaa hayyu tahe.

²¹Ilmi Solomoni, ka Rehoboamu jed'ani, gaafa hayyu Yuda tahe ganni isaa afurtami toko, duuba ganna kud'ani torba dira Yerusalemu, ka AABBO Waaqi lafa Israeli ch'ufa keesa fohate, Armati na kad'ad'a jed'e keesa, lafa mohate. Haati Rehoboamu Naama, ta gosa Amoni.

²²Worri Yuda AABBO Waaqa durati waan hamtu tolche, ababoota isaanile ch'ufa ira isa dallansiise.

²³Worri fulla Waaqa iti kad'atani waaqoota d'araati jaare. Ammalle d'akha old'ad'aabe akheekha waaqa Ashera jed'ani mid'aafatani, gaareeni ch'ufafi mukeeni gaadisa ch'ufa jalati kad'atani.

²⁴Waan suni ch'ufa ira hamtu nami d'iiratifi ka uwaleeni fulla waaqoota d'ara iti kad'atani suni huji sharmut'a hojatani, worri Yuda waan fafa hamtu, ka worri AABBO Waaqi duri worra Israeli duraa gusse tolfatu ch'ufa tolfate.

²⁵Ganna shaneeso ka Rehoboamuuni lafa mohate hayyuuni Misiri ka Shishaki jed'ani d'ufe Yerusalemu had'e,

²⁶faaya Mana Waaqatifi waan inni mana isaa keesa olkeyate ch'ufa, wonte worqi ta Solomonile, fud'ate.

²⁷Jennaani hayyu Rehoboamuuni wonte d'ibi fulla wonte taani sibiila diimani mid'aase, jara askarti ka balbala hayyu eeguti kenne.

²⁸Hojja hayyuuni Mana AABBO Waaqa d'aqu ch'ufa, askartini wonte suni baate yaatini, duuba eege mana keesati woi eeganiti deebifti.

²⁹Waan hayyu Rehoboamuuni tolche ch'ufa kitaaba Odu Hayyoota Yuda ch'ufa keesati t'aafaniti t'aafani.

³⁰Bara suni ch'ufa Rehoboamufi Yeroboamu woraanati jiddu jira.

³¹Rehoboamuuni due jennaani fulla hayyoota iti awaalani dira Daudi keesati isa awaalani, jennaani ilmi isaa Abiyaani fulla isaa hayyu tahe.