Read BORANA BIBLE – KITAABA WAAQA 1 Hayyoota 15 Bible Online

1 Hayyoota 15 - BORANA BIBLE – KITAABA WAAQA bible

1 Hayyoota 15

¹Ganna kud'ani saddeeteeso ka hayyu Rehoboamuuni, ilmi Yebati, worra Israeli mohate, Abiyaani hayyu Yuda tahe,

²ganna sadi Yerusalemu keesa lafa mohate, haad'a isaa maqaani Maaka, isiini dubra Absalomu.

³Inni akuma abba isaa daba tolche, AABBO Waaqa isaa garaa tokooni aka ababo isaa Daudi gula indeemne.

⁴Ammo maro Dauditifi AABBO Waaqi ilma isaa kenne, ka Yerusalemu keesa tae qorqorate lafa mohatu.

⁵Wonti AABBO Waaqi akana tolcheefi waan Daudini waan isa gammachiisa tolche seera isaa taka inch'absinifi waan inni Uriaa ka gosa Hiti kaani tolche male.

⁶Haguma Abiyaani lafa mohate isaafi Yeroboamu bara suni ch'ufa woraanati jiddu jira.

⁷Waan Abiyaani tolche ch'ufa kitaaba Odu Hayyoota Yuda keesati t'aafaniti, t'aafani.

⁸Duuba Abiyaani doonaani, dira Daudi keesati awaalani, ilmi isaa Asani fulla isaa hayyu tahe.

⁹Ganna diddameeso ka hayyu Yeroboamuni Israeli mohate, Asani hayyu Yuda tahe,

¹⁰ganna afurtami toko Yerusalemu keesa lafa mohate. Akko isaa maqaani Maaka, isiini dubra Absalomu.

¹¹Asani akuma ababo isa Daudi waan Waaqa gammachiisa tolche.

¹²Inni sharmut'a d'iiratifi ka uwa, ka fulla waaqa d'ara iti kad'atani hojattu, lafa keesaa balleese, ammalle akheekha waaqoota d'ara, ka hayyooti isa dura jirtu mid'aasite, ch'ufa balleese.

¹³Inni akko isaa Maaka, guddinni isiini qabdu ka hayyuma, iraa fuud'e, wonti akanatiifi isiini akheekha waaqa hama ka Ashera jed'ani mid'aasite. Inni akheekha suni ch'ach'abse, laga Kidroni keesati gube.

¹⁴Ato inni fulla waaqoota d'ara iti kad'atani ch'ufa balleesu baatele, inni haga jiru ch'ufa garaa tokooni AABBO Waaqa hojate.

¹⁵Inni waan abbaani isaa Waaqa baase ch'ufa, waan worqifi qarsiini mid'aasani, ka inni ufi baasele woliini, Mana Waaqa keesa kaye.

¹⁶Asafi Baashani, hayyuuni Israeli, ganna worri lafa mohate ch'ufa woluma had'ani.

¹⁷Baashani lafa Yuda had'e, dira Raama jabeese jaare, aka nami tokoleeni dira suni keesaa bahe yokhaani inseene.

¹⁸Duuba hayyu Asani qarsifi worqi ta Mana waaqatifi mana hayyu keesati hafte guure, jara isaatini Damaskiti erge, ammalle Benhadadi hayyu Shamu, ilma Tabrimoni, ka ilma Hezioni, d'aamsa kana iti erge waan jed'eeni:

¹⁹Kooti, aka abbooti teenna, goli woltaana. Ammalle qarsifi worqi ani si ergu tana naraa fud'ad'i. Amma tana wold'aqisa siifi Baashani hayyuuni Israeli woliini qabdani ch'absi, aka inni askarti isaa lafa tiyya keesaa baasu.

²⁰Hayyu Benhadadini dubbi Asa d'agaye, askarti isaatiifi worra gugurda askarti, dira Israeliti had'iisa erge. jennaani askartini suni dira Iyonitifi Danitifi Abel-Beth-Maakatifi arda Kinerothi ch'ufafi lafa Naftali ch'ufa dabsatte fud'atte.

²¹Hayyu Baashani waan tahe suni ch'ufa d'agaye jennaani, dira Raama, ka jaaru jiru kaani, lakise, Tirsati godaane.

²²Jennaani hayyichi Asani qoonqo lafa Yuda ch'ufati erge, aka nami ch'ufti haguma gahunu, ka tokoleeni inhamne d'ufe, d'akhaafi mukha Baashani dira Ramatini jaare, guure gara d'ibi geesu. Miha sunini Asani Mispafi Geba, ka diri kuni lachu lafa Benjamini keesa jiru jabeese jaare.

²³Waan kana male waan hayyu Asani jannoomaani tolcheefi dira jajaba inni jaarelle ch'ufa, kitaaba Odu Hayyoota Yuda keesati t'aafaniti t'aafani. Ammo inni jaare jennaani, d'ukuba fuud'e naafate.

²⁴Duuba eege Asani due, irreesa hayyoota ka dira Daudi keesati awaalani, ilmi isaa Yehoshefathini fulla isaa hayyu tahe.

²⁵Ganna lameeso ka Asani hayyu Yuda tahe, ilmi Yeroboamu, ka Nadabu jed'ani, hayyu Israeli tahe ganna lama lafa mohate.

²⁶Inni akuma abba isaa AABBO Waaqa durati ch'ubbu tolche worra Israeli ch'ubbu keesa buuse.

²⁷Jennaani Baashani, ilmi Ahiyaa, ka gosa Isakari, Nadabuti malate, ato isaafi askartini isa dira Gibethoni ka lafa Filisti had'u jiranu, d'ufe ijeese.

²⁸Wonti kunini ganna sadeeso ka hayyu Asani lafa Yuda mohate taate, duuba akanaani Baashani fulla Nadabu hayyu Israeli tahe.

²⁹Inni akuma hayyu taheeni worra Yeroboamu ch'ufa hobaase. Akuma AABBO Waaqi hojattu isaa raaga Ahiya jed'ani, ka Shilo, kaaniini jed'e, Worra Yeroboamu ch'ufa fit'ani, tokoleeni ka bahe injiru.

³⁰Wonti woni kunini taateefi waan Yeroboamuni ch'ubbu hamtu tolche, worra Israeli ch'ufa ch'ubbu keesa buuse, akanaani AABBO Waaqa dallansiise.

³¹Waan Nadabuni tolche ch'ufa kitaaba Odu Hayyoota Israeli keesati t'aafaniti t'aafani.

³²Hayyu Yuda ka Asa jed'anifi hayyu Baasha jed'ani, ka Israeli, haguma worri hayyu tahe bara suni ch'ufa worra lachu woraanumati jiddu jira.

³³Ganna sadeeso ka Asani lafa Yuda mohate keesa, Baashani, ilmi Ahiya, hayyu Israeli tahe, ganna diddami afuri Tirsa keesa lafa mohate.

³⁴Inni akuma hayyu Yeroboamu AABBO Waaqa durati ch'ubbu tolche worra Israeli ch'ufa ch'ubbu keesa buuse.