Read BORANA BIBLE – KITAABA WAAQA 1 Hayyoota 2 Bible Online

1 Hayyoota 2 - BORANA BIBLE – KITAABA WAAQA bible

1 Hayyoota 2

¹Daudini guyyaani isa alaa hobae jennaani ilma isa Solomoni yaame dubbi tana iti d'aamate:

²Guyyaani kiyya ya alaa hobae, jabaad'u aka d'iira tahi,

³waan AABBO Waaqi tolchi sinjed'e tolchi kara isaa gula deemi, aadaafi seera isa, ta Seera Musa keesati t'aafani guuti, aka waan tolchitufi fulla atini deemtu ch'ufa keesa, eeba argattu.

⁴Yo atini Seera isaa guute, AABBO Waaqi kakhu inni naa kakhate, ta gaafa inni, d'alooti kanke worra Israeli mohate haga worri Seera kiyya garaa tokooni jabeese guutu, nani jed'e, sii guuta.

⁵Ammalle waan tokoti jira — waan Yoabuni gaafa inni worra gugurda lamaani askarti Israeli, Abineri ilma Neritifi Amasa ilma Yetheri ijeese na tolche, imbeeta. Ammalle aka inni bara lafti nagaya worra fit'e, akasiini haalo worra duri woraana keesati fit'ani baafate imbeeta. Inni nama woma iyyakini fit'e, wollaali suni amma gubba tiyya tahe na t'ureese.

⁶Amma waan isa tolchu malani qalbi tante gula tolchi, ammo ato inni jaarsale taate inni ufiini induiini ijeesi.

⁷Ammo ilmaani Barsileo ka worra Gileadi nahiifi jabeesi qorqorad'u, wonti akanatiifi worri gaafa anini oboleesa kanke Absalomu duraa baqad'e naa nahe.

⁸Ammalle namicha toko ka Shemei ilma Gera, ka gosa Benjamini, ka worri isaa Bahurimuti jira. Gaafa anini Mahanaimu d'aqe inni aka hama na abaare, ammo galaana Yordaniti woliargine jennaani, anini maqa AABBO Waaqatini iti kakhad'e aka anini isa inijeemne.

⁹Ammo atini isa ka woi intolchini illakisini. Waan tolchu malani atu imbeeta, illakisini ijeesi.

¹⁰Daudini due jennaani isa diruma isaa keesati awaalani.

¹¹Inni ganna afurtama gosa Israeli mohate, ganna torba Hebroni keesa tae, ganna sodomi sadi Yerusalemu keesa tae.

¹²Solomoni hayyuma abbaa isaa iraa fuud'e, aka dansaa jabeese lafa fide.

¹³Jennaani Adoniani, ilmi Hagithi, gara Bathsheba haad'a Solomoni d'aqe. Isiini waan jetteeni, Naguma d'ufte? Inni waan jed'eeni, Ee, naguma d'ufe,

¹⁴ammo waan siini jed'u qaba. Isiini waan jetteeni waan jechu feetu jed'i.

¹⁵Inni waan jed'eeni, Atini imbeeta aka hayyumti sila tiyya ammalle nami Israeli ch'ufti ya aka hayyu na heregate. Ammo dubbini suni akasi intaane, oboleesa kiyyati, fed'i Waaqa gula, hayyu tahe.

¹⁶Anini amma waan toko si kad'ad'a, na ind'owatini naa kenni.

¹⁷Bathshebani waan jetteeni, Hayye kad'ad'i. Inni waan jed'eeni hayyicha Solomoni na kad'ad'i ani imbeekha inni si jala indidu — aka inni intala Abishagi jed'ani, ta lafa Shunamiti d'ufte, naa kennu.

¹⁸Isiini waan jetteeni hayye dansa, ya d'agaye, hayyuti sii hima.

¹⁹Jennaani Bathshebani kaate gara hayyu d'at'e aka dubbi Adonia taani iti haasaftu. Hayyichi olkae, haad'a isaa durati gajed'e, nagaya fuud'e barch'uma ufi ira gadi tae, ammalle barch'uma d'ibi isii fuud'e isiini d'aatu isaa moga mirgaa teete.

²⁰Isiini waan jetteeni, waan diqo toko si kad'ad'a, na ind'owatini, naa kenni. Ayyo, waan feetu kad'ad'i, sii kenna jed'eeni.

²¹Isiini, Abishagi oboleesa kanke, Adoniaa kenni, ha fuud'uti jetteeni.

²²Hayyichi waan jed'eeni, Maanifi Abishagi isaa kenni nani jetta, Hayyumale kad'ateefi ho? Qarale inni oboleesuma kiyya gudda ammalle qaallicha Abiatharifi Yoabuleeni gama isaa jirani!

²³Jennaani Solomonini maqa AABBO Waaqatini kakhate waan jed'e, Waaqi na ijeesinna, hojja anini Adonia inijeesiini, waan inni akasi kad'ateefi.

²⁴AABBO Waaqi yayu barch'uma hayyuma ka abba kiyya Daudi naa kenne aka dansaa narati jabeese; inni yayu kakhu ufi guute anaafi d'aloota kiyyaa kenne. Anini maqa AABBO Waaqatini kakhad'a, aka Adoniani arruma duu.

²⁵Duuba hayyu Solomonini Benaiya erge, inni d'aqe Adonia ijeese.

²⁶Jennaani hayyuuni waan qaallicha Abiatharini jed'e, Beeni, Anathothi lafa tanteeti gali, atini sila duu malte, ammo anini amma si inijeesu, wonti akanatiifi siti duri gaafa abba kiyyaani woliini jirtani, Sanduqa Wold'aqisa AABBO Waaqa qorqoratte, ammalle gaargala ch'ufa keesa abba kiyyaani woliini teetani.

²⁷Jennaani Solomonini Abiathari huji qaallu AABBO Waaqa keesaa baase, akanaani dubbi AABBO Waaqi duri Shiloti dubbate waan qaallu Eliifi d'alooti isaa tahu hime guute.

²⁸Jennaani Yoabuni dubbi suni d'agaye; inni duri goli Absalomu tau dide, ammo eege goli Adonia tahe. Tanaafi inni Waaro Woyyumati d'eete gaafa waan mesa fakaata kaani qabate.

²⁹Solomonini aka Yoabuni Waaro Woyyumati d'eete d'aatu waan mesa fakaata kaani eju d'agaye jennaani, Benaiya ilma Yohaida iti erge waan jed'eeni Beeni Yoabu ijeesi.

³⁰Inni gara Waaro Woyyuma d'aqe waan Yoabuni jed'e, Hayyichi, gadi bahi siini jed'a. Ammo Yoabuni waan jed'eeni, Anini ind'ufu, armumati dua. Jennaani Benaiyani hayyuuti deebie waan Yoabuni isaani jed'e iti hime.

³¹Solomonini waan jed'eeni, Waan inni fed'u tolchi, artumati ijeesi awaali. Aka akanaani anaafi worri keenna nama tokole d'iiga nama woma iyyakini ka Yoabuni fit'e ingaafanne.

³²AABBO Waaqi Yoabu ingaargalcha, waan inni, ka abbaani kiyya Daudini quba inqamne, worra suni fit'eefi. Inni nama lama ka woma iyyakini, ka isa ira jiru, ijeese: Abineri gudda askarti Israelitiifi Amasa gudda askarti Yuda.

³³D'iigi worraa gubba Yoabutifi d'aloota isaa haga jiru jireenna taha. Ammo AABBO Waaqi ha hojja ch'ufa Daudifi d'aloota barch'uma isaa ka hayyuma ira tau eebise nagaya kennufi.

³⁴Jennaani Benaiyani kae Waaro Woyyuma d'aqe Yoabu ijeese, worra isaa ka diida jiruti isaa awaalani.

³⁵Hayyichi fulla Yoabu Benaiya gudda askarti tolche, fulla Abiathari Sadoki qaallu tolche.

³⁶Jennaani hayyichi Shimei yaame waan jed'eeni, Yerusalemu keesati mana jaarad'i, dira suni keesaa imbahini keesuma tai.

³⁷Yo atini guyya tokole armaa baate galaana Kidroni taakite, atini inuma doota. D'iigi kanketileeni gubbuma teeti.

³⁸Shemeini waan jed'eeni, Hayye, ha taatu, Ee hayyichi, waan atini jettu inuma guuta. Duuba akanaani inni bara heddu Yerusalemu keesa tae.

³⁹Duuba eege, eegi inni ganna Sadi tae, tisseleeni Shemei lama baqate hayyu Gathi, ka Akishi ilma Maaka jed'aniini baate. Shemeini aka tisseleeni isaa lafa Gathi jirtu d'agaye jennaani,

⁴⁰harre ufi faate, gara Akishi hayyu Gathi d'aqe, tissele suni barbaade. Inni worra arge jennaani fuud'e galeeni.

⁴¹Solomonini waan Shemeini tahe d'agaye jennaani,

⁴²isa yaame waan jed'eeni, Anini maqa AABBO Waaqatini si kakhachiise aka atini dira kana keesa garu ind'anne. Ammalle anini si gorse yo atini armaa baate indoota jed'e siti hime atinileeni, Hayye, dansa inguuta nani jette.

⁴³Atini maanifi duuba kakhu suni ch'absite dubbi tiyya gula deemu didde?

⁴⁴Ammalle hayyichi waan Shemeini jed'e, Waan hamtu atini abba kiyya Daudi tolchite aka dansaa beeta maro ch'ubbu sunitifi AABBO Waaqi si gaargalcha.

⁴⁵Ammo inni na eebise hayyuma Daudi haga jiru jireenna jabeesa.

⁴⁶Jennaani hayyichi Benaiya yaame, Beeni, Shemei ijeesi jed'eeni; jennaani inni kae ijeese. Akanaani Solomonini aka jaba lafa suni ch'ufa fide.