Read BORANA BIBLE – KITAABA WAAQA 1 Hayyoota 4 Bible Online

1 Hayyoota 4 - BORANA BIBLE – KITAABA WAAQA bible

1 Hayyoota 4

¹Solomonini hayyu worra Israeli ch'ufa tahe,

²worri gugurdaani gaafasi isa jala hojatuleeni kana: Azariani, ilmi Zadoki, qaallu isaati;

³Elihorefufi Ahiyaani ilmaani Shisha jara isaa wo t'aafu; Yehoshefathini, ilmi Ahiludi, gudda worra wo t'aafe olkayuti.

⁴Benaiyani, ilmi Yehoiada, gudda askarti isaati; Sadokifi Abiatharini qaalole isaati;

⁵Asariani, ilmi Nathani, nama arda ka nama fidu ch'ufa isati iti mata; qaallichi Zabudini, ilmi Nathani nama hayyu mala d'au;

⁶Ahisharini nama mana hayyu hojattu isati iti mata; Adoramuni ilmi Abda jara irreeni nama hojachiisu isati iti mata.

⁷Solomonini nama kud'ani lama ka arda lafa Israeli fidu, tolche. Worri suni namu arda ufi keesa ganna ch'ufa keesa jia toko sagale barbaade hayyufi worra isaati geesa.

⁸Maqaani worra kud'ani lamaani sunitifi ardaani worri fiduleeni kana: Benhuri: Lafa gareeni Efraimu.

⁹Bendakari: dira makasi, Shaalbimu, Beth-Shemeshi Eloni, Beth-Haanania,

¹⁰Benhesedi: Dira Arubothifi Sokofi ammalle lafa Hejeri ch'ufa.

¹¹Benabinadabu, ka intala Solomoni ta Tafathi jed'ani fuud'e: lafa Dori ch'ufa.

¹²Baana ilma Ahiludi: dira Taanaki, Megido, ammalle lafa d'aatu Bethsheani ch'ufa ta d'aatu dira Sarethani, ka Yezreelini bita, haga dira Abel-Meholatifi dira Yokmeamu.

¹³Bengiberi: dira Ramothi ka Gileadi keesatifi, ollowaani balbala Yaeri ka gosa Manase ta Gileadi keesatifi Arda Argobu ka Bashani keesa; ardaani kunini ch'ufti dira jaatama qaba. Ka kamu d'akhaani Marsani jaarani, ka balbala iti mid'aasani danqarro sibiila diimaatini ch'ufaani.

¹⁴Ahinadabu ilma Ido: lafa Mahanaimu;

¹⁵Ahimaasi ka intala Solomoni ta Baemathi jed'ani fuud'e lafa Naftali;

¹⁶Baana ilma Hushai: arda Asheritifi dira Bealothi;

¹⁷Yehoshefathi ilma Parua: lafa Isakari;

¹⁸Shemei ilma Ela: lafa Benjamini.

¹⁹Geberi ilma Uri: arda Gileadi, ka duri Sioni hayyu Amoritifi Ogu hayyu Bashani fidani, worra kud'ani lama kana male nama d'ibi toko jira ka arda suni ch'ufati mata.

²⁰Worri Yudatifi ka Israeli heddate, lafa ira dabre Maansa afaani galaana fakaate, quufafi gammada, bad'aad'a keesa taani.

²¹Solomonini nama lafa suni ta haga galaana Efratiti ejite lafa Filistitifi seera lafa Misiriti ejitu fide. Worri damoosa isaa baase haga inni jiru ch'ufa isa jalati bule.

²²Wonti worri Solomoni guyyaati sooratu tana: dargaye daakhaani ta kintaala shantamatifi boshe kintaala d'ibba toko;

²³looni kud'ani ka manati okhayani gagabbisanifi looni diddama ka ala oolaatifi ree d'ibba tokole; hori kana malele bineensa aka hiddifa gadamsafa saalafa ammalle lukufa.

²⁴Solomonini lafa galaana Efratini ila adu ch'ufa fide, haga Tipsa fuud'e Gazati d'aabe. Hayyooti galaana Efratini ila adu ch'ufti isa jalati bulte, ammalle inni lafa d'aatu isale ch'ufa nagayaani woliini tae.

²⁵Haga inni jiru ch'ufa worri Israelitiifi ka Yudaleeni, ka haga Dani eje Beershebati eju, nagayaani tae, nami ch'ufti oobru ufi ta zabibutifi ta oda keesa nagayaani tae.

²⁶Solomonini maneeni kuma afurtama ta fardi gaari hirkisu iti galu qaba, ammalle fardoole kuma kud'ani lama qaba ka nami yaabatu.

²⁷Worri kud'ani lama ka arda lafa Israeliti mata, ka worri namu jia iti heregani gula Solomonifi nama worra isaa keesati golofatu ch'ufa sagale kennufi, waan sooratani ch'ufa worrumati hojja ch'ufa d'ufani.

²⁸Ammalle worri kunini garbuufi okhayale farda gaari hirkisefi fardoole d'ibile d'ufaani, hojja fed'ani ch'ufa.

²⁹Ammalle Waaqi qalbiifi heregafi hubacha guddo muumme inqamne Solomonini kenne.

³⁰Solomonini worra qaroota ilaborutifi worra Misiri ch'ufa qarooma ira qaba.

³¹Inni nama ch'ufa ira qalbi qaba Ethani ka gosa Esrahi, Hemani, Kalkoli, Darda, ilmaani Maholi, inni worra kana ch'ufa ira qalbi qaba, gurri isaa lafa d'aatu jirtu ch'ufa gahe.

³²Inni mammaasa kumsadi baase, faaru kumtokofi shanile baase.

³³Inni mukha haguma hind'eesa Lebanoniti iti keeyate mukeeni didiqo mana ira baatu ch'ufa muumme baase ch'ufa waan isaa dubbate: Ammalle bineensafi simpireefi waan lafa ira loatifi qurt'umile ch'ufa waan isii dubbate.

³⁴Hayyooti lafa ch'ufa aka inni qalbi qabu d'ageete, nama iti ergite aka worri suni dubbi isaa ch'aqasu.