Read BORANA BIBLE – KITAABA WAAQA 1 Hayyoota 6 Bible Online

1 Hayyoota 6 - BORANA BIBLE – KITAABA WAAQA bible

1 Hayyoota 6

¹Ganna d'ibba afurifi saddeetama eegi worri Israeli lafa Misiri keesaa bahe, ganna afreeso ka Solomonini worra Israeli fide, jia lameeso ka Zifu jed'ani Solomonini huji ijaarsa Mana Waaqa suni iti keeyate.

²Mani Solomonini AABBO Waaqa jaare d'eerinni isaa d'und'uma jaatama, ballinni d'und'uma sodoma, old'eerinnileeni d'und'uma sodoma.

³Ammalle mana suni fuula isaa dura mana d'ibi iraa jaarani, ka d'eerinni isaa d'und'uma kud'ani ka ballinni d'und'uma diddama, ka ballinni isa haguma ballinna mana kaani.

⁴Dereshani mana suni garaa keesani ballate alaani d'ipata.

⁵Ammalle Mana suni gama ala fuula dura male moga ch'ufa marsani, waan aka manatini jaarani, fulla heduti gargari kukutani.

⁶Kutaani ch'ufti ta mana jala aanu ballinni isii d'und'uma shani, ka mana jiddu keesa d'und'uma jaa, ka mana gubba aanu d'und'uma torba. Girgidaani mana suni fulla maneeni wolgubbati jaarani taanini akuma wolti aanuni qaqalata aka kutaani maneeni suni girgida mana guddati ejaanjite, utuba taateefi, duuba mani suni utuba d'ibi imbarbaanne.

⁷D'akhaaye Mana sunini jaarani qara fulla keesaa qotaniti boch'ani mid'aasani, aka hojja mana suni jaaru jirani nami kokeesa burisa yokhaani d'agara yokhaani sibiila taatefu tokole ind'ageenne.

⁸Balbalti kuta mana jala aanutini seenani mana gudda sunini gama bitaa jirti, nami yo gubba koru fed'u faano gula olkore mana jiddutifi ka gubba aanu seena.

⁹Duuba akanaani Solomonini Mana Waaqa jaare hobaase gubba isaale mukha hind'eesatini kabe duuche.

¹⁰Maneeni sadeeni wolgubbati jaarani taani, ka mani, ch'ufti d'und'uma shani old'eeratule ch'ufa isumati jaare. Maneeni sunile mukha hind'eesatini Mana guddaani woltid'aabani.

¹¹Jennaani AABBO Waaqi waan Solomonini jed'e waan mana kanale ch'aqasi,

¹²hojja atini dubbifi seera kiyya ch'ufa guute, anini waan duri abba kanke Daudii kakhad'e sii guuta.

¹³Anini mana atini jaartu kana keesa worra kiyya ka Israeli woliini tae, deebie worra illakisu.

¹⁴Akanaani Solomonini Mana suni jaare hobaase.

¹⁵Girgida garaa keesa mukha hind'eesatini mid'aasani haguma jala fuud'ani gubbati d'aabani garaa Mana keesa lafale mukha jajaba d'ibiini mid'aasani.

¹⁶Kuta garaa keesa, ta Fulla Fulla Ch'ufa Ira Qulqullo jed'ani gama dinqa mana suniti jaarani. Kuta suni d'eerinni isii d'und'uma diddama, ammalle isi mukha hind'eesatini bada mana kaani iraa kutani haguma jala fuud'ani gubbati d'aabani.

¹⁷Badaani suni, ta Fulla Fulla Ch'ufa Ira Qulqullooti aantu, d'eerinni isii d'und'uma afurtamati.

¹⁸Mana suni, garaa isaa ch'ufa keesa hind'eesani mid'aasani d'akha mullachu d'owani ammalle hind'eesa suni gubbati buqefi daraara fakeesani boch'ani ch'okhani.

¹⁹Inni dinqa Mana suni mid'aase, aka Sanduqa Wold'aqisa AABBO Waaqa achi kayani.

²⁰Dinqi suni d'eerinnafi ballinafi old'eerinni isaaleeni d'und'uma diddama, ammalle ch'ufa worqi ch'allaani ch'okhani mid'aasani. Waan sorio irati baasanile mukha hind'eesatini mid'aasani.

²¹Mana suni garaa isaa ch'ufa worqiini mid'aasani ch'okhani, ammalle sansalata worqi balbala dinqa ka worqiini mid'aasaniti kayani.

²²Mana suni, keesa isaa ch'ufafi waan sorio irati baasani, ka Fulla Fulla Ch'ufa Ira Qulqullo keesa jirule worqiini mid'aasani.

²³Akheekha waan lubbu qaba ka koola lama mukha ejersatini mid'aasani Fulla Fulla Ch'ufa Ira Qulqullo naqani, ka kamu d'eerinni isaa d'und'uma kud'ani.

²⁴Akheekhi sunini lachu waan ch'ufaani akuma takaa jira. Lachu koola lama qaba, koola ch'ufa d'eerinni isaa d'und'uma shani; duuba akanaani kooli suni d'und'uma kud'ani wolhanqata gara fit'etini.

²⁷Akheekha suni lamaani wold'aatu Fulla Fulla Ch'ufa Ira Qulqullo naqani, aka kooli isaani lamaani jiddu dinqa suniti woltuqe, kooli lamaani kaani girgida mana tuqu.

²⁸Ammalle akheekha waan koola suni lachu worqiini mid'aasani ch'okhani.

²⁹Girgida badatifi ka dinqale ch'ufa akheekha waan koola qaba ka boch'anifi meet'ifi daraaraani ch'okhani.

³⁰Lafale ch'ufa worqiini ch'okhani mid'aasani.

³¹Fulla Fulla Ch'ufa Ira Qulqullooni olseenani balbala lama ta mukha ejersatini mid'aasani iti mid'aasani, fiit'eeni balbala suni jiddu keesani gaafa fakaati.

³²Balbala sunile akheekha waan koola qabaati ka boch'anifi meet'ifi daraaraani ch'okhani mid'aasani, ammalle balbalafi waan koola qabaafi meet'ile worqiini mid'aasani.

³³Ammalle balbala bada mikhikila mukha ejersatini gama afraaniti mid'aasani.

³⁴Ammalle balbala wolti ch'abdu mukha jajabaani mid'aasani.

³⁵Akheekha waan koola qabati ka boch'anifi meet'ifi daraaraani ch'okhani mid'aasani, ka ch'ufa worqiini mid'aasani.

³⁶Ammalle Mana suni dura naabo jaarani, ta mukha ejersatifi d'akhaani woli ke makhani jaarani, d'akha sadi ka wolgubbaa naqani ch'ufa gula mukha toko dagalchani kayani.

³⁷Mana suni jia lameeso ka Zifu jed'ani, ganna afreeso ka haga Solomonini hayyu tahe, yayabani.

³⁸Jia saddeeteeso ka Buli jed'ani, ka haga Solomonini, hayyu tahe ganna kud'ani tokeeso, Mani suni akuma qara heregani jaarame hobae. Ijaarsi mana suni ganna torba fud'ate.