Read BORANA BIBLE – KITAABA WAAQA 2 Hayyoota 10 Bible Online

2 Hayyoota 10 - BORANA BIBLE – KITAABA WAAQA bible

2 Hayyoota 10

¹Nama torbatamati, ka d'aloota Ahabu, dira Samaria keesa taa. Jennaani Yehuni tatabe t'aafe, nama gugurda dira sunitifi jaaroleefi nama ijoolle d'aloota Ahabu suni gugurdiseeti erge. Tatabeeni suni waan jettu:

²Ilmaani hayyu tana isaniti harkaa qaba; ammalle gaariifi fardaafi miha lolaatifi diri jajabaaleeni harka keesani keesa jira. Tanaafi hojja tatabe tana argattani,

³ilmaani suni keesa nama jaba fakaatu, ka worra ch'ufa ira jiru, fohad'a, hayyu tolfad'a, jabeesa kalchaafi.

⁴Ammo worri guddo sodaate waan jed'e, Eegi hayyooti lama isa dad'abde, nu eesa isa dandeenna?

⁵Jennaani namichi gudda diratifi jaaroleefi nami ilmaani hayyu gugurdise qonqo tana Yehuti ergani, Nu hojattuuni tante waan atini tolcha jette ch'ufa inuma tolchina. Ammo nu nama tokole hayyu intolchinu, atumaani waan dansaa seetu tolchi.

⁶Yehuni tatabe d'ibi worrati t'aafe waan jed'e, Hojja isaani gara kiyya jiraatani dubbi tiyya ch'aqaftani, mata ilmaani Ahabu bori hojja tana Yezreeliti natiini koota. Ilmaani torbatama ta Ahabu harka worra gugurda dira suni ka worra gugurdise jirti.

⁷Tatabeeni Yehu artini baate jennaani, jari Samaria kaani ilmaani torbatama ta Ahabu taani, fit'e, mata worraa daduti guure, Yehu ka Yezreeli jiruti geesani.

⁸Yehuni aka mata ilmaani Ahabu achini d'ufani d'agaye jennaani waan jed'e, Fullo keesati fulla lamati woli irati tuula, haga bori diirama achiti lakisa.

⁹Lafti bariite jennaani inni gara fullo suni d'aqe waan biyyaani jed'e, Nami Yoramu mala iti d'aate ijeese anuma, isani keesa injirtani. Ammo eenuti worra kama ch'ufa fit'e?

¹⁰Duuba akanaani beekha aka wonti AABBO Waaqi waan ilmaani Ahabu dubbate tokoleeni inhanqanne. AABBO Waaqi yayu waan raaga isaa Eliyaati kakhate guute.

¹¹ Jennaani Yehuni fiit'a Ahabu ta Yezreeli jirtu ch'ufafi jara isaa gugurda ch'ufafi jaalani isaa ch'ufafi qaalole isale ch'ufa hobaase; inni nama tokole inhambimne.

¹²Jennaani Yehuni Yezreeli kae Samaria d'aqe. Karaati fulla toko ta Bulto Tissitu jed'aniti,

¹³jara fiit'a Ahazia, hayyu Yuda, arge waan jed'eeni, Isani eenu? Worri waan jed'eeni, Nu fiit'a Ahazia, nu worra hayyutifi worra Yezebeli nagaya fuud'a yaana.

¹⁴Yehuni waan jara isaatini jed'e, Worra kana inijeesina qaqaba! Worri worra qaqabe, inni artumati fulla boola tokoti hobaase. Worri sunini ch'ufti nama afurtami lamaati, tokoleeni imbaane.

¹⁵Yehuni arti bahe jennaani Yehonadabu, ilma Rekabutini, fuula keesa wold'ufani, Yehuni nagaya fuud'e waan jed'eeni, Anaafi sii dandeenne wold'anne, woliini inhojanna? Yehonadabuni waan jed'eeni, Dansa, indandeenna. Yehuni waan jed'eeni, Harka kanke kenni yoosi, worri harka wolfuud'e, Yehuni gaari ufi isa yaabachiise.

¹⁶Waan jed'eeni, Na gula kooti, aka anini guddo AABBO Waaqa jaalad'u argi. Duuba worri kae, Samaria woliini d'aqe.

¹⁷Worri artini bahe jennaani Yehuni fiit'a Ahabu ch'ufa hobaase, tokole inhambimne. Wonti AABBO Waaqi Eliyaani, Intaati jed'e sunuma.

¹⁸Yehuni worra Samaria wolti yaame waan jed'eeni, Ahabuni duri Baali haguma diqa hojate, ammo anini hagasi ira hojad'a

¹⁹raagoota Baalitifi nama isaa kad'atuufi qaalole ch'ufa wolti yaama, tokole inhambisina; inni anini sorio guddo Baali baasa nama achi injirre ch'ufa inijeesani jed'e. (Wonti Yehuni akasi taheefi aka worra Baali kad'atu ch'ufa malani hobaasu.)

²⁰Jennaani Yehuni waan jed'e, Guyya Baali kad'atani tolcha, biyya ch'ufati hima, qonqooni biyya ch'ufa geete jennaani

²¹Yehuni lafa Israelile ch'ufa qonqo suni iti erge. Duuba nami Baali kad'atu ch'ufti, tokoleeni inhamne, d'ufe. Worri ch'ufti mana Baaliti wolti bahe mana suni guute.

²²Jennaani inni qaallu woya Baalini kad'atani olnaqu yaame, jara Baali kana ch'ufa woya kennaafi jed'e.

²³Jennaani eegi suni Yehuni mana Baali suni Yehonadabu, ilma Rekabu, woliini seene waan biyyaani jed'e, Qorqorad'a, aka nami arma jiru kunini nama Baali kad'atu ch'allaa, ammalle aka nami AABBO Waaqa kad'atu tokoleeni keesa injirre qorqorad'a.

²⁴Jennaani isaafi Yehonadabuni olseenani soriofi waan gubani baasani Baalii baasani. Duuba inni qara nama saddeetama d'aatu mana suni d'osse waan jed'eeni, Worra kana ch'ufa hobaasa nama worra kana, nama tokole lakise inijeesani!

²⁵Yehuni akuma sorio baaseni jara isaa kaani yaame waan jed'eeni, Olduuda, nama ch'ufa hobaasa, tokoleeni infiigini. Worri goraadeeni olduude, ch'ufa hobaase reefa alati guure. Jennaani worri fulla qulqullo mana suni olduude,

²⁶utuba mana Baali ch'ufa guure alati gube.

²⁷Duuba akanaani utuba qulqulloofi mana Baali suni balleesani, fulla iti udaanifi ta iti finch'aani tolchani, haga arrale akasuma.

²⁸Aki Yehuni Baali lafa Israeli keesa balleese akasi.

²⁹ Ammo inni faana Yeroboamu bahe ch'ubbu inni worra Israeli keesa buuse, gaafa korma worqi mid'aase Bethelifi Dani keesa kaye tolche, ufile tolche.

³⁰AABBO Waaqi waan Yehuni jed'e, Atini waan anini tolchi sini jed'e ch'ufa yayu d'aloota Ahabu tolchite, tanaafi anini siti kakhad'a, aka d'alooti kanke haga d'aloota afreeso hayyu Israeli, tahu.

³¹Ammo Yehuni Seera AABBO Waaqa Israeli guddo jabeese gula indeemne, fulla suni inni faana Yeroboamu, ka worra Israeli ch'ubbu keesa buuse, gula bahe.

³²Gaafasi AABBO Waaqi aka lafa Israeli iraa kute diqeesu iti kae. Hazaelini, hayyuuni Shamu, lafa Israeli ch'ufa

³³ta galaana Yordanitini ilaboru, haga dira Aroeni ka d'aatu galaana Arnoni bitaa dabsate. Lafti sunini lafa Gileaditifi ta Bashani, fulla gochiti Gaditifi Reubenitifi ta Manase ta ilaboru teetu.

³⁴Waan Yehuni tolche ch'ufafi jannooma isaale kitaaba Odu Hayyoota Israeli keesati t'aafaniti t'aafani.

³⁵Inni due jennaani Samaria keesati awaalani, ilmi isaa Yehoazini fulla isaa hayyu tahe.

³⁶Yehuni ganna diddami saddeeti Samaria keesa worra Israeli mohate.