Read BORANA BIBLE – KITAABA WAAQA 2 Hayyoota 16 Bible Online

2 Hayyoota 16 - BORANA BIBLE – KITAABA WAAQA bible

2 Hayyoota 16

¹Ganna kud'ani torbeeso ka Pekani, ilmi Remalia, hayyu Israeli tahe, Ahazini, ilmi Yothamu, hayyu Yuda tahe.

²Gaafasi ganni isaa diddama, inni ganna kud'ani jaa Yerusalemu keesa lafa mohate. Inni faana ababo isaa Daudi gula bahu dide, waan AABBO Waaqa isaa ingammachiimne tolche.

³Ammalle faana hayyoota Israeli gula bahe, aada hamtu worra AABBO Waaqi worra Israeli dura lafa keesa baase gula ilma ufile gube Waaqa d'araati sorio baase.

⁴Fulla waaqa d'ara iti kad'atanifi gaareeni gubbafi mukeeni gaadisa gugurdo jalaleeti, Ahazini sorio baase hit'aana aarse.

⁵ Jennaani Resini, hayyu Shamutifi Pekani hayyu Israeli, Yerusalemu marsani had'ani, ammo Ahazi dabsachu dad'abani.

⁶(Gaafasi hayyuuni Edomu dira Elathi had'e dabsate, worra Yudea ka keesa tau keesaa baase. Duuba worri Edomu Elathi qubate, haga arrale achuma taa.)

⁷Ahazini gara Tiglath-Pilesari, hayyu Ashuru nama erge waan jed'eeni: Anini hojatu tante ta guddo sii saalfatu. Kooti, hayyooti Shamutifi ka Israeli, ta na had'u jirtu, duraa na baasi.

⁸Ahazini qarsifi worqi Mana Waaqatifi ka hayyu keesaa fuud'e, hayyu Ashuruti erge.

⁹Tiglath-Pilesarini waan inni kad'ate suni ee jed'e fud'ate, askarti isa fud'ate Damaski had'u d'aqe, dabsate, hayyu Resini ijeese, worra dira suni boojie, Kiriti geese.

¹⁰Gaafa hayyu Ahazini hayyu Tiglath-Pilesari dira Damaskiti argu d'aqe, inni waan sorio irati baasani achiti arge, akheekha isi ka fulla tokole illakisini ch'ufa t'aafe qaallicha Uriati erge.

¹¹Jennaani Uriani waan sorio irati baasani kama akasi suni jaare, ato Ahazini ingaliini, hobaase.

¹²Damaski gale jennaani, Ahazini aka wonti sorio irati baasani suni jaaramte hobaate arge,

¹³duuba inni horifi mid'aani sorio baase irati gube, daad'ifi d'iiga sorio wold'ageeti gubbati jisse.

¹⁴ Wonti mesa fakaata, ka sibiila diimani mid'aasani maqa AABBO Waaqatini eebisani waan sorio irati baasani hareeti taanifi Mana Waaqa jiddu jirti. Tanaafi Ahazini arti fuud'e waan inni jaare sorio irati baasani kaani mirga kaye.

¹⁵Jennaani inni waan qaallicha Uriani jed'e: fulla harreeti tana irati sorio diirama ta gubanifi sorio galgala ta mid'aani gubi baasi, ammalle sorio gubanifi mid'aani Waaqaa baasani, ka hayyuufi biyyiti baaftu, ammalle daad'i biyyiti baaftule, fulla suni irati baasi. D'iiga hori sorio qalani ch'ufa arti irati jissi. Ammo waan sorio irati baasani, ka sibiila diimani mid'aasani kiyyuma anumati tolchaani waan suni irati Waaqa wo gaafata.

¹⁶Qaallichi Uriani, waan ch'ufa akuma hayyuuni jed'eeni tolche.

¹⁷ Hayyu Ahazini waan aka gaari, ka sibiila diimani mid'aasani, gargari baase, qori gubba jirtu taani iraa fuud'e; ammalle inni haro sibiila diimani mid'aasani koromi sibiila diima kud'ani lamaani taani iraa fuud'e, d'akha gubba kaye.

¹⁸Ammalle aka hayyu Ashuru gammachiisu Ahazini waan barch'umani hayyu ira eju Mana Waaqaa keesaa baase, balbala Mana Waaqa ta hayyuuni ch'allaani olseenuni ch'ufe.

¹⁹Waan hayyu Ahazini tolche ch'ufa kitaaba Odu Hayyoota Yuda keesati t'aafaniti t'aafani.

²⁰ Ahazini due jennaani irreesa hayyoota, ka dira Daudi keesati, awaalani, ilmi isaa Hezekiani fulla isa hayyu tahe.