Read BORANA BIBLE – KITAABA WAAQA 2 Hayyoota 18 Bible Online

2 Hayyoota 18 - BORANA BIBLE – KITAABA WAAQA bible

2 Hayyoota 18

¹Ganna sadeeso ka Hosheani, ilmi Eela, hayyu Israeli tahe, Hezekiani, ilmi Ahazi hayyu Yuda tahe.

²Gaafasi ganni isaa diddami shani, duuba inni ganna diddami sagali Yerusalemu keesa lafa mohate. Had'a isaa maqaani Abiya, isiini dubra Zekaria.

³Inni faana ababo isaa Daudi gula bahe, waan AABBO Waaqa gammachiisa tolche.

⁴ Inni fulla Waaqa d'ara iti kad'atani ta gaareeni balleese, d'akhaye old'ad'aabani ch'ach'abse, akheekha waaqa Asherale ch'ach'abse. Inni ammalle bofa Musani sibiila diimani mid'aase, ka Nehushtani jed'ani, ch'ach'abse. Worri Israeli duri bofa suni hit'aana aarsefi guddise, haga guyya ch'ach'absani suni.

⁵Hezekiani AABBO Waaqa Israeli d'ugeefate; worri Yuda, haguma d'alate, taka isa duraafi eegi isaale hayyu akasi inhoranne.

⁶Inni taka AABBO Waaqa lakise seera isaa inch'absine. Ammo seera AABBO Waaqi Musaa kenne ch'ufa akuma dansaa guute.

⁷Tanaafi AABBO Waaqi isa woliini jiraate, waan inni tolche ch'ufa keesati isa qarqaare, huji isaa eebiseefi. Inni hayyu Ashuruti garagale, hojachuufi dide.

⁸Inni worra Filisti dabsate, qutuma worrale balleese, dira didiqafi gugurdale, dira Gazatifi lafa d'aatu jirtule.

⁹Ganna afreeso ka Hezekiani lafa mohate, ka ammalle ganna ganna torbeeso Hosheani lafa Israeli mohate, hayyuuni Shalmanesani lafa Ashuru d'ufe, lafa Israeli had'e, dira Samaria marse.

¹⁰Ganna sadi Samaria marsani, eege dabsatani; gaafasi ganna jaeeso ka Hezekiani lafa mohate, ammalle ganna sagaleeso ka Hosheani lafa mohate.

¹¹Hayyuuni Ashuru worra Israeli boojie, ka gari Hala geese, ka gari galaana Habori, ka lafa Gozani, geese, ka gaari dira worra Medi geese achi qubsise.

¹²Wonti dira Samaria nyaapi dabsateefi waan worri Israeli AABBO Waaqa isaani lakise, wold'aqisa duri woliini tolfatani ch'abse, seera Musani hojattuuni AABBO Waaqa worraa kenne guutu dideefi. Worri waan suni inch'aqamne yokhaani diqole inguunne.

¹³Ganna kud'ani ka Hezekiani lafa mohate, Senakeribuni, hayyuuni Ashuru, dira Yuda ka jabeesani jaarani had'e dabsate.

¹⁴Jennaani Hezekiani qonqo gara Senakeribu, ka Lakishi jiru, erge waan jed'eeni, Anini ya woyake, na inhad'ini, naraa deebii, duuba waan atini feetu ch'ufa sii baasa. Hayyuuni Ashuru qonqo gara Hezekia deebise waan jed'eeni, Qarsi kilo kud'anitifi worqi kilo kuma toko naa baasi.

¹⁵Hezekiani qarsi Mana Waaqatifi mana hayyu keesa jirtu ch'ufa iti erge.

¹⁶Ammalle inni worqi balbala mana Waaqati dad'abaniifi ta inni mikhikila balbalati naqele ch'ufa guure ergeefi.

¹⁷Jennaani hayyuuni Ashuru duula muumme inqamne dira Lakishiti kaase, Yerusalemuti erge, aka Hezekia had'u abbotiini duula suni worra gugurda sadi, ka qara askarti isaa ch'ufa harkaa qabu. Worri Yerusalemuni bahe, kara worri woya mid'aasu keesa tau, ka d'aatu fulla bisaani haro keesa diratini yaaniti naanae.

¹⁸Jennaani worri hayyu Hezekia yaame, hojattuuni isaa, nami sadi, worrati gadi bahe: Worri sunini, Eliakimu, ilma Hilkia, ka mana hayyuuti gudda; Shebna, ka tatabe hayyu t'aafufi; Yoa, ilma Asafu, ka waan t'aafani olkayani ch'ufa harkaa qabu.

¹⁹Namichi jara Ashuru guddaani toko waan jed'eeni, Waan isani Hezekiani jettani, Hayyuuni Ashuru waan jed'e, Maaniti akana garaa si jabeese ufi si d'ugefachise?

²⁰Atini waan dubbi tanteetiini oguma woraana dabsatu seeta? Amma eentu si qarqaara, mala keeti ka atini hayyu Ashuru didde iti gargalte?

²¹Atini mala keeti waan worri Misiri si qarqaaru seeta, ammo mali sunini nama ilaadu ule sehe, ta yo inni lafati d'aabu ch'abt'e harka woraantu fakaata. Aki hayyuuni Misiri nama isa d'abatu tolchu akasi.

²²Ammo yo atini, AABBO Waaqa keenna d'aabanna nani jette nami fulla waaqa iti kad'atani sorio irati baasani balleese Hezekianiti? Ka ammalle garagale worra Yerusalemutifi ka Yudatini, Fulla sorio irati baasani ta Yerusalemu ch'allaati Waaqa kad'ad'a jed'e.

²³Amma kooti hayyu kenna ka Ashurutini waan takaa woliini taha: Anini fardoole kuma lama sii kenna, yo atini dandeete nama hagasi ka yaabatu naa kennite!

²⁴Atini akami dandeete hojattu abba kiyya ta guddinna womaatu inqamne d'owarta, ka ufiftu waan worri Misiri gaariifi askarti farda sii kennu seeta?

²⁵Atini waan anini qarqaarsa AABBO Waaqa male lafa teesani had'e balleese seeta? AABBO Waaqati, Beeni, lafa suni had'i balleesi nani jed'e.

²⁶Jennaani Eliakimufi Shebnafi Yoani waan namicha gudda kaaniini jed'ani, AABBO, afaani Aramutini nuti dubbad'i, ind'ageenna, afaani Ebrania nuti indubbatini nami d'aatu teenna ch'iisu kunini ch'ufti nu d'agaya.

²⁷Inni waan jed'eeni, Isani waan hayyichi Ashuru isanifi hayyu keesani ch'alla qonqo tana iti erge seetani? Hiyo akasiniti, anini gumi arma teteetu tana, ta eegi tana finch'aanifi udaani ufi akuma keesani sooratuti dubbachuni jira.

²⁸Jennaani namichi guddaani sunini afaani Ebraniatini lalabe waan jed'e, Dubbi hayyuuni Ashuru isaniini jed'u ch'aqasa!

²⁹Inni waan jed'u, Hezekiani isani insobini. Inni dandae harka kiyya keesaa isani imbaasu.

³⁰Inni AABBO Waaqa abdad'a jed'e isani insobini. Waan AABBO Waaqa isani baase askarti Ashuru dira keesani iraa deebisu insehina.

³¹Dubbi Hezekia inch'aqasina. Hayyuuni Ashuru waan isaniini jed'u, Nati koota, booju kad'ad'a. Duuba yo booju kad'attani isaniini ch'ufti daad'i zabibu teesani d'uddani, mid'aani keesani ka oda nyaattani, madda teesani keesaa bisaani d'uddani,

³²haga anini lafa, lafa teesani fakaatu, ta mid'aanifi daad'i qabdu, ta qit'afi zabibu qabdu, ta d'ad'afi damma qabdu keesati isani qubsisuti. Yo waan inni fed'u tolchitani, isani indootani, injiratani. Dubbi Hezekia, ta inni, AABBO Waaqati nu baasa jed'e isani sobe suni ind'ugeefatina.

³³Gochiti d'ibiini ta, waaqa keennati harka hayyu Ashuru jalaa nu baase jette injirti?

³⁴Waaqi Hamathitifi ka Arpadi me re? Waaqi Sefarvaimutifi ka Henatifi ka Iva me? Waaqi suni tokoleeni ya Samaria harka kiyya jalaa baase?

³⁵Waaqi lafa suni tokoleeni yoomi lafa ufi harka kiyya keesaa baase? Isani akami, ka waan suni ch'ufa quba qabdani, Waaqi Yerusalemu nu baasa jettani re?

³⁶Ammo biyyiti akuma hayyuuni Hezekiani worraani jed'e ch'ach'alifte, akanumati teteete.

³⁷Jennaani Eliakimufi Shebnafi Yoani lalefatani, woya ufi tatarsaasani, deemani waan namichi Ashuru kaani jed'e hayyu Hezekiati himani.