Read BORANA BIBLE – KITAABA WAAQA 2 Hayyoota 19 Bible Online

2 Hayyoota 19 - BORANA BIBLE – KITAABA WAAQA bible

2 Hayyoota 19

¹Hayyu Hezekiani, akuma qonqo worra kaani d'agayeeni laalefate woya ufi tatarsaase, ch'arqi naqate, Mana AABBO Waaqa d'aqe.

²Inni Eliakimu, ka mana hayyuuti guddatifi Shebna ka tatabe hayyu t'aafufi qaalole gugurdole gara raaga Isaya, ilma Amozi, erge. Worrileeni ch'ufti woya ch'arqi naqate.

³D'aamsi inni, Isayati hima jed'e kana: Arriti guyya gaargalati, ka nu gaargalchani nu ch'eersani, nu niiti d'au jirtu, ta ilme irre d'iibatuni d'abde fakaanna.

⁴Hayyuuni Ashuru yayu namicha gudda hojattu isaa, Waaqa gudda arabsi jed'e erge. AABBO Waaqi kanke ha araba kana d'agaye worra isa arabsu kana gaargalchuti. Tanaafi atini amma worra keenna ka hafu Waaqa kad'ad'i.

⁵Isayaani d'aamsa hayyu Hezekia d'agaye jennaani, qonqo deebiseefi waan jed'e,

⁶AABBO Waaqi waan jed'u, maro dubbi hojattu hayyu Ashuru, ta worri na arabse, tana jettani insodaatina.

⁷Anini hayyicha odu lafa isaati isa deebiftu d'ageesise, duuba achiti isa ijeesa.

⁸Namichi Ashuru guddaani kaani, aka hayyichi isaani Lakishi bahe dira Libna, ka d'aatu suni jiru, had'u jiru d'agaye, tanaafi inni achiti isa argu d'aqe.

⁹Jennaani qonqooni worra Ashuruti d'ufte waan jette, Duuli lafa Misiri ka hayyu Tirhakani ka worra Kushi iti abba, had'iisa keesani d'ufu jira. Hayyuuni Ashuru dubbi suni d'agaye jennaani qonqo gara hayyu Yuda, ka Hezekia jed'ani, erge

¹⁰waan jed'eeni, Waaqi isani d'ugeefattani, diri Yerusalemu harka hayyu Ashuru keesa inseenu jed'e isani insobini.

¹¹Waan hayyuuni Ashuru lafa inni balleesu fed'u ch'ufa tolchu ya d'ageetani. Isani mala keesani waan jalaa baatani seetani?

¹²Ababooti tiyya dira Gozanifa, ka Haranifa, ammalle ka Resefufa balleesite, worra Beth-Edeni ka lafa Telasari keesa keesa jiru hobaafte, waaqi worra tokoleeni worra baasu dad'abe.

¹³Hayyooti Hamathi, ta Arpadi, ta Sefarvaimu, ta Henatifi ta Ivaleeni ama me?

¹⁴Hezekiani tatabe worra suni iraa fuud'e soome, Mana AABBO Waaqa d'aqe tatabe suni AABBO Waaqa dura kaye,

¹⁵ Waaqa kad'ate waan jed'e, Ee AABBO Waaqa, Waaqa Israeli, ka barch'uma kanke akheekha waan lubbu qaba ka koola gubbaa teetu, siuma ch'allaati lafafi gubba uume, ammalle lafafi nama ch'ufa fidda.

¹⁶Ama, Ee AABBO Waaqa, waan harkaa na qaba kana argi, araba Senakeribuni si Waaqa gudda arabsu kana ch'ufa d'agayi.

¹⁷D'uguma AABBO, hayyooti Ashuru yayu gosa heddu hobaafte lafa worrale balleesite

¹⁸waaqoota worrale ch'ufa gubde — waaqoota woma keesa injirre, ka nami mukhaafi d'akha boch'e harkaani mid'aafatu.

¹⁹Amma tana ee AABBO Waaqa keenna, harka worra Ashuru kana keesaa nu baasi, duuba akasiini gochiti lafa keesa jirtu ch'ufti, aka atini ch'allaani AABBO Waaqa beetu.

²⁰Jennaani Isayaani, ilmi Amozi, qonqo gara Hezekia erge waan jed'e, AABBO Waaqi Israeli waan jed'u. Anini kad'acha atini waan Senakeribu hayyu Ashuru na kad'ate ya d'aagae.

²¹Wonti isaa ka AABBO Waaqi dubbate tana: Ee Senakeribu, diri Yerusalemu si koble si goyeese si tufata.

²²Nama atini arabsite goyeesite kana eenu seeta? Nami atini tufate sunini anuma, Waaqa Israeli qulqullo.

²³Atini qonqo namaani ergite d'aadde waan nani jette, Anini gaari kiyyaani fit'e gaareeni Lebanoni ch'ufa kore dabsad'e. Ammalle anini yayu hind'eesa d'ed'eerafi mukeeni jajabdu ch'ufa ch'irad'e badda keesa lit'e fulla ch'ufa gahe.

²⁴Ammalle anini yayu lafa nyaapa ch'ufa d'aqe eela qotad'e, bisaani keesaa d'uge, miili askarti tiyya yayu galaana Misiri gosse.

²⁵Atini aka anini waan suni ch'ufa herege si tolchisise ind'ageenne? Anini amma waan suni ch'ufa ya tolche guute. Nami irre atini dira jajabaani ch'ach'absite bulleesite sii kenne anuma.

²⁶Worri dira suni keesa tauleeni mudame sodaate. Worri suni buuyo diida yokhaani raafu mana gubbati baatu, ta qilleensi oowani ilaboru d'ufe balleesu fakaata.

²⁷Ammo anini waan kanke ch'ufa imbeekha, waan atini tolchitufi fulla atini deemtule. Ammalle aka atini dallante naati roqomtule anini imbeekha.

²⁸Anini yayu dallansufi kiyyiba kanke suni d'agaye, tanaafi amma tana kiyyoofi lugama Siti kaye kara atini d'ufte kaani si deebisa.

²⁹Jennaani Isayaani waan hayyuuni jed'e, Waan kanati akheekha sii taha. Ganna kanafi ganna d'ufu, mid'aanuma ufumaani baha nyaata, ammo ganna sadeeso atini mid'aani fach'aafate murate, zabibu oobrate mid'aani isii nyaatta.

³⁰Worri Yuda ka hafu akuma mukha hiddi isaa aka dansaa lafa keesa seene late mid'aani baasu taha.

³¹Yerusalemufi gaara Sioni gubbati nami inuma hafa, wonti akanatiifi AABBO Waaqi waan suni tolchu male intau.

³²Wonti hayyu Ashuru, ka AABBO Waaqi jed'e, tana: Inni dira kana seene t'iya tokole indarbatu. Askartini wonte qabdu tokoleeni dira suniti ind'iaatu, ammalle booliti qotani dira sunini marsani injirtu.

³³Inni, ka dira inseenne, karuma d'ufe deebia. Nami dubbi tana jed'e ana AABBO Waaqa.

³⁴Anini dira kana nyaapa iraa d'owe baasa, maro guddinna kiyyatifi ammalle maro kakhu ta anini hojattu tiyya Dauditi kakhad'eefi.

³⁵Halkani suni malaikaani AABBO Waaqa fulla duuli Ashuru jiru d'at'e, askarti nama kuma d'ibbafi saddeetami shani hobaafte. Boriyyaate lafti bariinaani reefa ufuma ch'iisu argani!

³⁶Jennaani hayyuuni Ashuru ka Senakeribu jed'ani kaani, kae Ninawiti gale.

³⁷Guyya toko, ato inni mana waaqa isaa, ka Nisroki jed'ani keesa tae waaqa kad'atu, ilmaani isaa lama, Adramelekifi Sharezani goraade ufitini isaa ijeefte, lafa Araratiti baqatte. Duuba ilmi isaa, ka Esar-Hadoni jed'ani, fulla isa hayyu tahe.