Read BORANA BIBLE – KITAABA WAAQA 2 Hayyoota 24 Bible Online

2 Hayyoota 24 - BORANA BIBLE – KITAABA WAAQA bible

2 Hayyoota 24

¹Gaafa Yehoiakimuni hayyu, Nebukadrezani hayyuuni Babiloni, Yuda had'e dabsate, Yehoiakimulle haga ganna sadii hojatu tolfate; ammo eege inni iti gargale.

²AABBO Waaqi duula heddu worra Babilonifa ka Shamufa ka Moabufa ka Amonifa lafa Yuda balleesiti iti erge, akuma AABBO Waaqa hojattu isaa ta raagatini jed'e kaani.

³Wonti jecha Waaqa gula wonti kunini ch'ufti taateefi, aka AABBO Waaqi worra Yuda ufi dura balleesu, maro ch'ubbu heddu Manaseeni duri tolcheefi;

⁴ammo keessuma waan inni nama woma iyyakini fit'eefi. Waan kanaafi AABBO Waaqi Manasee araaramu dide.

⁵Waan Yehoiakimuni tolche ch'ufa kitaaba Odu Hayyoota Yuda keesati t'aafaniti t'aafani.

⁶Yehoiakimunu donaani ilmi isaa Yekoniani fulla isaa hayyu tahe.

⁷Hayyu Misiritiifi askartini isaa ituma deebite lafa isaani keesaa imbaane, wonti akanatiifi hayyu Babiloniti lafa duri Misiriini mohatu ch'ufa mohate; lafti sunini galaana Fratiti ejite haga muumme seera lafa Misiri moga mirgati ejiti.

⁸Yekonia ganni isaa kud'ani saddeeti gaafa inni hayyu Yuda tahe ammalle inni Yerusalemu keesa jia sadi lafa mohate. Maqaani haad'a isaa Nehushta, ta dubra Elnathani, ka dira Yerusalemu.

⁹Inni akuma abba isaa AABBO Waaqa durati ch'ubbu tolche.

¹⁰Gaafasi duuli Nebukadreza ka hayyu Babiloni d'ufe Yerusalemu marse had'e.

¹¹Gaafa lola suni hayyu Nebukadrezani Yerusalemu d'ufe jennaani,

¹²hayyu Yekoniafi haad'a isaatiifi ilmaani isaatiifi askarti isaale, ammalle worri mana hayyu keesa hojattuleeni ch'ufti woligalani, booju worra Babiloni kad'attani. Ganna saddeeteeso ka inni lafa mohate keesa, Nebukadrezani hayyu Yekonia qabe,

¹³isaafi hori mana hayyu keesa jiru ch'ufa Babiloni geese. Akuma qara AABBO Waaqi duraani hime kaani, hayyu Nebukadrezani miha worqi ka hayyu Solomoni Mana Waaqa keesati mid'aase, ch'ufa ch'ach'abse.

¹⁴Hayyu Nebukadrezani worra Yerusalemu ch'ufa qabe. Ammalle worra woliini ilmaani hayyuutifi worra gugurda lafa suni, ka wolti nama kuma kud'ani, boojie. Inni hogeeyiifi tumtu ch'ufa boojie, hiyyeeyi ch'alla lafa suniti lakise.

¹⁵Nebukadrezani Yekoniafi haad'a isaatiifi nad'eeni isaatiifi jaallaboota isaatiifi ammalle jaarole lafa Yuda ch'ufa qaqabe boojie lafa Babiloni geese.

¹⁶Nebukadrezani nama d'iira ch'alla jajaba kuma torba, ammalle hogeeyiifi tumtu nama kuma toko, ka kamu nama jajaba huji askarti guutu Babiloniti godaansise.

¹⁷Nebukadrezani abuyya Yekonia, ka Mattania jed'ani, hayyu tolche, maqa jijire Sedekia baaseefi.

¹⁸Ganni Sedekia diddami toko gaafa inni hayyu Yuda tahe, ammalle inni ganna kud'ani toko Yerusalemu keesa lafa mohate. Haad'a isaa maqaani Hamutali, isiini dubra Yeremia, ka dira Libna.

¹⁹Hayyu Sedekiani akuma hayyu Yekoniani tahe kaani AABBO Waaqa durati ch'ubbu tolche.

²⁰AABBO Waaqi guddo worra Yerusalemutifi ka Yudaleti dallane, fuula ufi duraa balleese.