Read BORANA BIBLE – KITAABA WAAQA 2 Hayyoota 9 Bible Online

2 Hayyoota 9 - BORANA BIBLE – KITAABA WAAQA bible

2 Hayyoota 9

¹Jennaani raagi Elisha jed'ani kaani raaga kaimticha toko yaame waan jed'eeni, Kurfefad'i, Ramothi ka Gileadi d'aqi. Dulo d'ad'a tana fuud'i,

²yo achini baate Yehu, ilma Yehoshafathi, ka akhaakhu Nimshi, barbaadi. Koba manati isa yaami,

³d'ad'a kanaani muudi waan jettuuni, AABBO Waaqi waan jed'u, Anini yayu si muude hayyu Israeli si tolche. Duuba achumati lakisi, hurrisi biraa deemi.

⁴Jennaani raagi kaimtichi sunini Ramothi d'aqe

⁵worra gugurda askarti, ka kora keesa jiru, iti d'ufe waan jed'eeni Aabbo, anini d'aamsa ke qaba. Yehuni waan jed'eeni, Atini nu kana keesa eenuni dubbachu jirta? Inni waan jed'eeni, Sini dubbachu jira, aabbo.

⁶Jennaani worri lachu mana olduude raagi kaimtichi kaani Yehu muude waan jed'eeni, AABBO Waaqi Israeli waan jed'u. Anini si muude hayyu worra kiyya ka Israeli si tolcha.

⁷Gudda kanke hayyicha ilma Ahabu ijeesi, aka anini Yezebeli, waan isiini raagoota tiyyafi hojattu tiyyale ijeefteefi, gaargalche haalo baafad'u.

⁸Worri Ahabutifi d'alooti isaleeni ch'ufti duu male, anini nama worra isaa ka d'iira, diqaafi guddale ch'ufa, akuma taka hobaasa.

⁹Anini worra isaa akuma worra Yeroboamutifi worra Baasha tolcha.

¹⁰ Yezebelini awaala inargattu, reefa isii sareeti nyaata lafa Yezreeli keesati. Raagi kaimtichi kaani dubbi tana jed'e, jennaani, balbala bane mana keesaa bahe baqate.

¹¹Yehuni gara worra wahela isaa kaani deebie jennaani worri waan isaani jed'e, Lafti naguma? Maraatani sunini maani sira qaba? Yehuni waan jed'eeni, Isani waan inni barbaadu imbeetani.

¹²Worri waan jed'eeni, Hiyo nu imbeennu, waan inni jed'u nuti himi. Yehuni waan jed'eeni, Inni waan nani jed'e, AABBO Waaqi waan jed'u, Anini yayu hayyu Israeli si tolche nani jed'e.

¹³Maro tokotu waheli Yehu kaani ch'ufti woya ufi faano mana sunini korani ira afaani, Yehuni ira eje, jennaani magalata d'aani lalabani waan jed'ani, Yehuni ya hayyu tahe!

¹⁴Jennaani Yehuni hayyu Yoramu, ka Yezreeli jiru, iti malate, Yoramuni, qara gaafa isaafi hayyuuni Shamu woli had'ani Ramothi madae. Duuba aka mada suni fayyufi Yezreeli jira. Jennaani Yehuni waan jara wahela isaatini jed'e, Yo isani goli tiyya taatani, nama Ramothi keesa bahe odu tana Yezreeliti odeesu deemu d'owa.

¹⁶Jennaani inni gaari ufi yaabate, kae Yoramu ka Yezreeli jiru argu d'aqe. Yo inni artini bahe Yoramuni ammalle infayyine, ammalle hayyu Ahazialeeni ka isa argu d'ufe, arti jira.

¹⁷Jennaani namichi toko ka eeddo yaabate fullo balbala suni eegu jiru, Yehufi askarti isaa ta gad'uftu arge, lalabe waan jed'e, Anini duula gad'ufu jiru arga. Yoramuni waan jed'e, Nama fardaani deemu fuula keesa ergi, aka worri nama nagaya yau gaafad'i.

¹⁸Namichi kaani kae, Yehu fuula keesa deeme waan jed'eeni, Hayyuuni waan jed'u, Atini naguma d'ufuu jirta. Yehuni waan jed'eeni, Dubbi suni lakisi, na gula kooti. Namichi fullo eegu kaani waan kana arge jennaani, qonqo biyyati deebise waan jed'e, Namichi ya artini bahe ammo gadi deebiuti injiru.

¹⁹Ammalle nama d'ibi akasuma Yehu fuula keesa ergani, innileeni akuma namicha kaani, Naguma deemta? jed'e odeefate. Yehuni waan jed'eeni, Dubbi suni lakisi, na gula kooti.

²⁰Ammalle namichi lafa eegu kaani qonqo biyyati deebise waan jed'e, Namichi ya artini bahe, ammo gadi deebiuti injiru. Ammalle inni waan jed'e, Guddaani gumi suni Yehu fakaata, akuma isaa, aka maraata gaari oofu jira!

²¹Jennaani Yoramuni waan jed'e, Gaari kiyya na kurfeesa, jennaani kurfeesanifi. Duuba isaafi Ahaziani, hayyuuni Yuda, namu gaari ufi yaabate, Yehu fuula keesa yaani, fulla oobru Nabothiti fuula keesa d'ufani.

²²Yoramuni waan jed'eeni, Atini naguma d'ufu jirta? Yehuni waan jed'eeni, nageenni ka maani ka haati tante Yezebelini falfalaafi, kad'acha waaqa d'ara lakisu diddu.

²³Yoramuni dubbi suni d'agaye jennaani, baqaa gaari ufi keesa deebise, lalabe waan Ahaziani jed'e, Namichi kunini yayu mala ijeecha nati d'aate.

²⁴Jennaani Yehuni guubefi t'iya fud'ate, irree jabduuni Yoramu t'iyaani had'e; t'iyiti sunini dudda duubani isa woraante, onne d'oofte, gaari isa keesati isa ijeefte.

²⁵Yehuni waan namicha isa hojatu, ka Birkari jed'aniini jed'e, Reefa isa fuud'i, oobru Nabothi taani keesa buusi. Qaabad'i, dubbi AABBO Waaqi Ahabuni jed'e, gaafa anaafi sii abba Yoramu ka Ahabu jed'ani gula yaanu gaari keesa:

²⁶ Anini kale d'iiga Nabothitifi ka ilmaani isaa arge. Sile artumati ijeese haalo baafad'a. Tanaafi waan tatu, reefa Yoramu fuud'i oobru Nabothi keesa buusi, akasiini kakhu AABBO Waaqa guuti.

²⁷Hayyu Ahaziani waan tahe arge jennaani gaari ufi keesa gara dira Beth-Hagani baqate. Yehuni isa reebe, jara isaatini, isale ijeesa jed'e. Duuba ato inni gaari ufi kara Guuri d'aatu Ibleamu oofu, worri isa d'aqabe madeese. Ammo inni baqate Megidoni bahe achumati due.

²⁸Hojattuuni isaa reefa isaa Yerusalemuti gaarini geesite, irreesa hayyoota ka dira Daudi keesati isa awaalani.

²⁹Ganna kud'ani tokeeso ka Yoramuni, ilmi Ahabu, hayyu Israeli tahe Ahaziani hayyu Yuda tahe.

³⁰Yezebelini aka Yehuni Yezreelini bahe d'ageete jennaani, ila kuulate, mata mid'aafate, deresha mana hayyu keesa ejite, lafa laalte.

³¹Yehuni fullooni olseene jennaani isiini lalabde waan jetteeni, Zimri, atini ka abba kanke ijeefte naguma d'ufte?

³²Yehuni fulla isiini ejitu taani millate waan jed'e, Nami gara kiyya jiru mee? Nami lamafi sadi ka mana hayyu keesa hojattu, dereshani isa lalaani,

³³Yehuni waan jed'eeni, Isi gadi darba, jennaani isi gadi darbani, d'iigi isii fardooleefi mana hayyule ch'ufati t'iniqe. Yehuni gaari reefa isii ira gusse,

³⁴mana hayyu seene, achiti sagale nyaate, eegi iraa deebie waan jed'e, Niiti abaarsa tana reefa isii fuud'a awaala; ato akasile taate, isiini dubra hayyuuti.

³⁵Ammo worri isi awaalu d'aqe sunini woma artiti ingarre, buqe matatifi lafe harkaafi miila male.

³⁶ Worri d'ufe dubbi tana Yehuti hime jennaani, inni waan jed'eeni, Tunini dubbi AABBO Waaqi hojattu isaa Eliyaani jed'e: Dira Yezreeli keesati sareeni reefa Yezebeli nyaati,

³⁷goblola isii akuma kosi lafati firfirsani, aka nami tokoleeni beekhe, tunini Yezebeli injenne.