Read BORANA BIBLE – KITAABA WAAQA 1 Odu duri 14 Bible Online

1 Odu duri 14 - BORANA BIBLE – KITAABA WAAQA bible

1 Odu duri 14

¹Hiramuni, hayyichi Tiro, nama gara Daudi erge, worra suni woliini mukha hind'eesatifi hogeeyi mukhaafi d'akhaani mana jaartu ergeefi.

²Duuba akanaani Daudini aka AABBO Waaqi hayyu Israeli isa tolche, lafa inni fidule, maro gumi isaatiifi eebise, hubate.

³Achi Yerusalemu keesa Daudini nad'eeni d'ibi fuud'e, ilmaani d'iiratifi ta dubrale heddu d'ale.

⁴Ilmaani Yerusalemu keesati isaa d'alate tana: Shamu, Shobabu, Nathani, Solomoni,

⁵Ibahari, Elishua, Elipeleti,

⁶Noga, Nefegi, Yafia,

⁷Elishama, Beeliadafi, Elifeleti.

⁸Worri Filisti aka Daudi muudani hayyu lafa Israeli ch'ufa tolchani d'ageennaani duula baase isa qabu d'aqe. Tanaafi Daudini worra fuula keesa deeme.

⁹Worri Filisti bale Refaimutini bahe jennaani worra lafa suni had'e, waan worrale ch'ufa saame.

¹⁰Daudini Waaqa gaafate waan jed'e, Worra Filisti kana inhad'a? Dandae indabsad'a? AABBO Waaqi waan jed'eeni, Ee had'i, anini dabsacha sii keenna!

¹¹Jennaani Daudini Baali Parasimuti worra had'e, dabsate waan jed'e, Waaqi yayu aka bisaani fach'aani nyaapa kiyya keesa na fach'aase. Tanaafi fulla sunini Baal-Perazimu jed'ani.

¹²Jennaani worri Filisti baqate waan harkaani boch'ani ka worri kad'atu lafati lakise. Duuba Daudini jara isatini, Waan suni ch'ufa guba jed'e.

¹³Ammalle worri Filisti bale suniti deebie, wosaame.

¹⁴Daudini ammalle, Ani maani tahu male? Jed'e Waaqa gaafate. Waaqi waan jed'eeni, Armaa inhad'ina, gama suni mara, fulla mukha gugurda sunini dudda duubani had'a.

¹⁵Hojja isani shawesa dame mukeeni suni d'ageetani, nyaapa hobaati iti labsa, had'a, anati isani dura deeme worra Filisti suni isani dabsachiisa.

¹⁶Daudini waan Waaqi isaani jed'e guute, worra Filisti Gibea had'e Gezerini baase.

¹⁷Gurri Daudi fulla ch'ufa gahe, AABBO Waaqi gosa ch'ufa isa sodaachiise.