Read BORANA BIBLE – KITAABA WAAQA 1 Odu duri 15 Bible Online

1 Odu duri 15 - BORANA BIBLE – KITAABA WAAQA bible

1 Odu duri 15

¹Daudini mana iti galu dira isaa keesati jaarate. Ammalle fulla Sanduqa Wold'aqisa Waaqa kayanile mid'aase, waaro iti jaare.

² Jennaani inni waan jed'e, Worra Lawi male nami tokoleeni Sanduqa Wold'aqisa imbaatini. Wonti akanatiifi nami duri AABBO Waaqi fohate huji suni kenneefi, ammalle, haga jiru jireenna na hojad'a jed'e, worra.

³Duuba Daudini worra Israeli ch'ufa Yerusalemuti wolti yaame, aka Sanduqa Wold'aqisa fulla inni kurfeesefiti geesani.

⁴Ammalle inni ilmaani Harunitifi worra Lawi wolti yaame.

⁵Gosa Lawi keesa nami balbala Kohathi ka inni yaame, Yurieli, ka nama d'ibba tokofi diddama ka balbala isaa inni iti mataa:

⁶Nami balbala Merari ka inni yaame, Asaya, ka nama d'ibba lamafi diddama ka balbala isaa inni iti mataa;

⁷nami balbala Gershoni ka inni yaame, Yoeli, ka nama d'ibbafi sodoma ka balbala isaa inni iti mataa;

⁸nami balbala Elisafani ka inni yaame, Shemaya, ka nama d'ibba lama ka balbala isaa inni iti mataa;

⁹nami balbala Hebroni ka inni yaame Elieli, ka nama saddeetama ka gosa isaa inni iti mataa;

¹⁰nami balbala Uzieli ka inni yaame, Aminadabu, ka nama d'ibbafi kud'ani lama inni iti mataa.

¹¹Jennaani Daudini qaalole Sadokifi Abiatharifi ammalle worra gosa Lawi: Urieli, Asaya, Yoeli, Shemaya, Elielifi Aminadabu yaame

¹²waan jed'eeni, Isani worra mata balbala gosa Lawiti; tanaafi isanifi oboleyaani teesani ch'ufti ufi qulqulleesa, aka Sanduqa Wold'aqisa AABBO Waaqa Israeli fulla anini mid'aasefitini d'uftani.

¹³Waan gaafa qara isa fuud'ani isani huji suni keesa injirreefi AABBO Waaqi aka hama nuti dallane, waan nu aada isaa gula Sanduqa suni baachu dinneefi.

¹⁴Jennaani qaaloleefi worri Lawi ufi qulqulleese, aka Sanduqa Wold'aqisa AABBO Waaqa Israeli baatani.

¹⁵Akuma Musani dubbi AABBO Waaqa gula worra barsiise kaani, worri Lawi Sanduqa Wold'aqisa Waaqa kalchooni gurmu irati baate.

¹⁶Ammalle Daudini worra mata gosa Lawi wolti yaame waan jed'eeni, Nama kiraarifi bilbila d'ae sirbu fohad'a.

¹⁷Balbala gosa sirbitu keesa worra kana, ka bilbila sibiila diimani mid'aasani d'ae sirbu, fohatani: Hemani, ilma Yoeli, oboleesa isaa Asafu, ilma Benekia, Ethani, ilma Kishi, ka balbala Marari. Ammalle worra gosa Lawi kana, ka worra qarqaare kirari qonqo olbaase d'au, fohatani: Zekaria, Yaasieli, Shemiramothi, Yehieli, Uni, Eliabu, Maaseya, Benaiya. Ammalle worra gosa Lawi d'ibi, ka kirari qonqo gadi buuse d'au, worra kana fohatani: Matithia, Elifebehu, Mikneya, Azazia, ammalle worra fullo eegu, Obed-Edomufi Yeieli.

²²Waan inni sirba gudo beekhufi Kenani fohatani mata siribdu gosa Lawi suni tolchani.

²³Berekiafi Elkana, Obed-Edomufi Yehia woliini, nama Sanduqa Wold'aqisa eegu, fohatani. Ammalle qaalole tana fohatani Shekania, Yoshefathi, Nethaneli, Amasai, Zekaria, Benaiya, Elezeri, aka worri Sanduqa Wold'aqisa dura yae magalata d'au.

²⁵Jennaani Daudifi jaarole Israelitiifi jari gugurda askarti mana Obed-Edomu d'aqani, Sanduqa Wold'aqisa arti fuud'ani, guddo gammadani.

²⁶Waan Waaqi worra Lawi ka Sanduqa Wold'aqisa AABBO Waaqa baatu qarqaareefi, worri koromi looni torbafi hooliye torba sorio qale.

²⁷Daudini ubaara boofta dansa keeyate, ammalle worri sirbituleni, Kenania ka worraa matatifi worri Lawi ka Sanduqa baatuleeni woyuma akasi keeyate. Daudini ammalle woya aka korbo hid'atani taani keeyate.

²⁸Duuba akanaani worri Israeli ch'ufti gammade, magalatafi bilbilafi kirari d'ae sirbe, Sanduqa Wold'aqisa Yerusalemu geese.

²⁹Ato Sanduqa suni diratini yaanu, intalti Saulo Mikalini qaa manatini millate aka Daudini AABBO Waaqa durati sirbe ch'ech'eu agarte, jennaani isa tufate.