Read BORANA BIBLE – KITAABA WAAQA 1 Odu duri 19 Bible Online

1 Odu duri 19 - BORANA BIBLE – KITAABA WAAQA bible

1 Odu duri 19

¹Eegi suni Nahashonini, hayyuuni Amoni, due. Jennaani, ilmi isaa Hanuni, fulla isaa hayyu tahe.

²Duuba hayyu Daudini waan jed'e, Anini Hanuni, akuma abbaani isaa duri na nahe na qarqaare, akasuma isa qarqaara. Duuba Daudini nama erge, lubbu abbeeti iraa hafi Hanunini jed'e. Worri sunini Amonini bahe fulla hayyu Hanuni d'ufe

³jennaani, jaaroleeni Amoni waan hayyuuni jette, Atini waan d'uguma Daudini ulfinna abba kanketitifi lubbu isaa iraa hafe jed'e jara kana siti erge seeta? Akasiniti, insobamini, inni aka dooyate, hegeri lafa tana balleesuufi worra kana gadi erge!

⁴Jennaani Hanuni worra Daudini erge suni qaqabe, areeda iraa haade, woya worraa hid'aanati ch'ire, worra ufira galche.

⁵Daudini qonqo suni d'ageennaani nama fuula keesa worra erge, maro worri ch'eeraa galu dad'abeefi. Inni iti d'aame waan jed'eeni, Yerikoti hafa, haga areedi keesani bahuti achi taa, duuba eegi suni koota.

⁶Hanunifi worri gosa Amoni, aka Daudi nyaapa ufiti tolchani hubannaani, qarsi kilo kuma sodomi afuri baasani, gaarifi nama gaari oofule lafa Mesopotamiatifi Aram-Maakatifi Soba ch'ufa keesaa bitate.

⁷Gaari kuma sodomi lama ka worri bitatefi askartini hayyu Maaka d'ufte, d'aatu Medebaati qubate. Worri Amonileeni dira ufi keesaa bahe had'iisaa kurfae.

⁸Daudini dubbi suni d'ageennaani Yoabufi askarti Israeli ch'ufa woliini had'iisaa fuula worraa keesa erge.

⁹Worri Amoni dira gabahe fullo dira Raba durati wolti bahe, had'iisaa kurfefate, hayyooti worra qarqaaru d'ufteleeni ballinna lafa keesati had'iisaa kurfefate.

¹⁰Yoabuni aka nyaapi duraafi duubani isa marse arge jennaani, askarti Israeli nama jajaba filani fuud'e, duula worra Shamu kaani duraani d'ufe.

¹¹Inni askarti isa ta hafte taani oboleesa isaa Abishai gudda iti tolche, Abishaini askarti suni duula worra Amoni duraani d'ufe.

¹²Yoabuni waan Abishaini jed'e, yo worri Shamu naa dabsata garte, kooti naa kalchi, ammo yo worri Amoni sii dabsate anileeni d'ufeti sii kalcha.

¹³Garaa jabaad'i, nama keennafi dira Waaqi keenna nuu kenne nyaapa haane iraa d'owarra. Fed'iini AABBO Waaqa ha taatuti!

¹⁴Jennaani Yoabufi jari isaa had'iisaa orinaani, worri Shamu duraa baqate.

¹⁵Worri Amoni worra Shamu ka baqatu agarraani, Abishai duraa baqate dira duude. Jennaani Yoabuni Yerusalemuti gale.

¹⁶Worri Shamu aka Israeliini worra dabsate agarraani, askarti isaani ta galaana Efrati gama ilaboru jirtu, ta Shobakini, nami gudda askarti Hadadezeri hayyu Soba iti mata, gayaamani.

¹⁷Daudini waan kana d'ageennaani askarti Israeli ch'ufa wolti baase, galaana Yordani taake, ch'ibra fuula duula Shamuti deebise kae. Jennaani worri lachu had'iisaa hirba wolti kaachise,

¹⁸worri Israeli worra dabsate baase. Daudifi worri Israeli askarti Shamu nama kuma torba, ka gaari fardi hirkisuni yaatufi askarti farda nama kuma afurtama hobaasani. Ammalle Shobaki, namicha gudda askarti Shamule, ijeesani.

¹⁹Hayyooti Hadadezeri jalati bultu taani, aka Israeliini worra dabsate agarraani booju Daudi kad'ate finna isaa jalati bulte. Duuba akanaani worri Shamu worra Israeli sodaate, worra Amoniti eegi suni kalchuufi dide.