Read BORANA BIBLE – KITAABA WAAQA 1 Odu duri 20 Bible Online

1 Odu duri 20 - BORANA BIBLE – KITAABA WAAQA bible

1 Odu duri 20

¹ Gaafa bokaya ganna, ka hayyooti duula d'at'u, Yoabuni askarti isaatini duule lafa Amoni had'e; ammo hayyuuni Yerusalemumati hafe. Worri dira Raba marse had'e balleese.

²Waaqi worra Amoni, ka Milkomu jed'ani, sure worqi, ta ulfinni isii kilo sodomi afuri, qaba. Sure suni keesa d'akha ch'ululuqati jira; Daudini d'akha suni fuud'e, sure isaati keeyate. Ammalle inni waan hedu dira suni keesaa boojie.

³Inni worra dira suni ch'ufa boojie, sibiila woini ch'iranifi jembeefi d'agara iti kenne irreeni hojachiise. Inni worra Amoni ka dira d'ibi keesa jirule akasuma tolche. Duuba isaafi askartini isaa ch'ufti kaani Yerusalemuti dachaani.

⁴Duuba eegele worri Israelitiifi ka Filisti Gezeriti woli had'e, gaafasi gaafa Shebekaini, ka lafa Hushati bahe, namicha d'eera furda Shafu jed'ani ijeese, akasiini worra Filisti dabsatani.

⁵Ammalle eegi sunile worri worra Filistini akasuma wolhad'ani, Elhanani ilma Yeiri, Lahuni oboleesa Goliathi, ka worra Gathi, ka someeti woraana isaa haga utuba geetu d'ae ijeese.

⁶Ammalle Gathiti woli had'ani, fulla namichi d'eerani furdaani harkaafi miilale quba jaa qabu jiru. Inni d'aloota worra d'ed'eera fufurda duri kaani.

⁷Inni Israeli miid'e ch'eerse, jennaani Yonathanini, ka oboleesi Daudi Shamani d'ale, isa ijeese.

⁸Jari sadeeni Daudifi jari isaa fit'e kunini worra d'ed'eera fufurda gosa Gathi keesaa d'alate.