Read BORANA BIBLE – KITAABA WAAQA 1 Odu duri 23 Bible Online

1 Odu duri 23 - BORANA BIBLE – KITAABA WAAQA bible

1 Odu duri 23

¹Daudini jaare hobae jennaani ilma isa Solomoni fulla isa hayyu tolche.

²Daudini jaarole Israelitiifi qaaloleefi worra Lawi ch'ufa wolti yaame.

³Inni nama worra Lawi, ka d'iira, ka ganna sodomati oli ch'ufa hede, henni sunini nama kuma sodomi saddeeti tahe.

⁴Jennaani hayyuuni worra nama kuma diddami afuri huji Mana AABBO Waaqati qoode, nama kuma jaa huji woi t'aafanifi ta dubbi laalaniti qoode,

⁵nama kuma afuri ka fullo eegu tolche, ammalle nama kuma afuri, ka miha sirba ka hayyuuni mid'aaseeni sirbe maqa AABBO Waaqa faarsu, tolche.

⁶Daudini worra Lawi, balbala worra gula, fulla saditi qoode: Gershoni, Kohathi, Merari.

⁷Gershonini ilmaani lama qaba: Ladanifi Shimeyai.

⁸Ladanini ilmaani sadi qaba: Yehieli, Zethamu, Yoeli.

⁹Balbala Ladani iraa baate worra kanati iti mata. (Shemei ilmaani sadi qaba: Shelomothi, Hazieli, Harani.)

¹⁰Shemeyaani ilmaani afuri qaba: Maqaani worraa aka worri wolti aane d'alate gula kana: Yahathi, Sina, Yeushi, Beria. Yeushifi Beriani ilmaani heddu ind'alle, tanaafi worri lachu wolti balbala toko tahe.

¹²Kohathini ilmaani afuri qaba: Amramu, Ishari, Hebroni, Uzieli.

¹³Ilmi isaa ka angafa Amramuuni abba Harunitifi Musa. (Harunifi ilmaani isaa eebisani, huji miha woyyuma ch'ufa haga jiru jireenna worrati kenani, aka worri hojja AABBO Waaqa kad'atani hit'aana aarse isa hojate maqa isaatini gumi eebisu.

¹⁴Ammo namicha Waaqa ka Musa jed'ani kaani ilmaani isaa gosuma Lawi taaniti heregani.)

¹⁵Musani ilmaani lama qaba, Gershomufi Eleazari.

¹⁶Guddaani ilmaani Gershomu Shebueli.

¹⁷Eleazarini ilma toko ch'alla qaba, ka Rehabia jed'ani, ammo Rehabiani ilmaani hedu d'ale.

¹⁸ Ilmi lameeso ka Kohathi, ka Ishari jed'ani, gurba toko qaba ka Shelomithi jed'ani, ka inni balbala worraati mataa.

¹⁹Ilmi sadeesoleeni, ka Hebroni jed'ani ilmaani afuri qaba: Yeria, Amaria, Yahazieli, Yekameamu.

²⁰Ilmi afreeso, ka Uzieli jed'ani, ilmaani lama qaba, Mikafi Ishia.

²¹Merariini ilmaani lama qaba, Malifi Mishi. Malileeni ilmaani lama qaba, Eleazarifi Kishi,

²²ammo Eleazarini, ato dubra male ilma ind'alfatini, due. Duuba dubra isaa suni ch'ufa oboleyaani worraa, ta ilmaani Kishiti, fuud'e.

²³Ilmi Merari ka lameeso, Mushini, ilmaani sadi qaba: Mali, Ederi, Yeremothi.

²⁴Kunini ch'ufti nama d'aloota Lawiti, balbalafi worra isaani gula, ka worra ch'ufa maqa t'aafani. Nami d'aloota isaa kunini ch'ufti, ka ganni isaa diddama yokhaani hagasi dabre, huji Mana AABBO Waaqa keesa qaba.

²⁵Daudini waan jed'e, AABBO Waaqi Israeli yayu gumi isaati nagaya kenne, innileeni haga jiru jireenna Yerusalemu keesa taa.

²⁶ Tanaafi amma tana wonti worri Lawi, Waaro Woyyumatiifi miha woyyuma baatufi injirtu.

²⁷D'aamsa Daudi ka eege gula, nama worra Lawi, hojja ganni isaani diddama gahu ch'ufa, maqa t'aafani huji kennanifi.

²⁸Hujiini kennanifi sunini tana: Aka qaalole ilmaani Haruni woliini huji Mana Waaqa keesa hojatani, aka ammalle Mana Waaqa qayeefi keesale qorqoratani, aka waan qulqullo ch'ufa qulqulleesani olkayani,

²⁹aka qit'a Waaqa baasanifi dargaye d'akhaani baasanifi qit'a didiqa bukho inqamneefi, qit'a d'aabaanifi dargaye dakhaani d'ad'aani wolti makhani qorqoratani, waan Mana Waaqa keesati sorio baasanile biimani.

³⁰Ammalle aka diiramafi galgalaafi

³¹guyya sorio AABBO Waaqaa gubani baasani ka Sabatotifi, ka baatitifi ka jila ch'ufa AABBO Waaqa faarsani guddisani. Ammalle seera baasani, worra Lawi ka huji tana hojachu male, haga himani, aka worri hojja ch'ufa AABBO Waaqa faarse isa guddisu.

³²Hujiini worraa kennani tana: aka Waaro Woyyumatiifi Mana Waaqa qorqoratani, ammalle worra fiit'a isaani, ka qaalole ilmaani Haruni, huji Mana Waaqa qarqaarani.