Read BORANA BIBLE – KITAABA WAAQA 2 Odu duri 18 Bible Online

2 Odu duri 18 - BORANA BIBLE – KITAABA WAAQA bible

2 Odu duri 18

¹Yehoshefathini, hayyuuni Yuda, dureesa tahe gurra baafate jennaani, nama worra isaatiifi ka Ahabu, hayyu Israeli, woli fuusise.

²Eegi ganni hedduuni dabre Yehoshefathini Ahabu, ka Samaria jiru, argu d'aqe. Inni artini bahe jennaani Ahabuni hooliyeefi looni heddu qale, isaafi jara isaa woliini d'ufe jila tolche. Duuba inni Yehoshefathi sosobe, aka inni goli isaa tahe dira Ramothi ka Gileadi woliini had'ani.

³Tanaafi inni waan jed'eeni, Dira Ramothi deemne woliini haane ho? Yehoshefathini waan jed'eeni, Haye, anaafi askartini tiyyaleeni ch'ufti kurfo jira, woliini iyyaana.

⁴Ammo qara eegi ato, iyaane, Waaqa kad'anne gorsa iraa fud'anna.

⁵Jennaani Ahabuni raagoota nama d'ibba afuri wolti yaame waan jed'eeni, Dira Ramothi inhad'a mo, inhad'u? Worri waan jed'eeni, Ee, beeni had'i, Waaqi harka kanketiti worra keenna.

⁶Ammo Yehoshefathini waan jed'eeni, Raagi d'ibiini injiru, ka nu gorsa AABBO Waaqa iraa fud'anuuni?

⁷Ahabuni waan jed'eeni, Ee, toko d'ibiti jira, ka Mikaya ilma, Imla jed'ani, ammo anini isa injiba; wonti akanatiifi inni waan hamtu male waan dansa naa infagu. Yehoshefathini waan jed'e, akasi injed'ini.

⁸Jennaani Ahabuni namicha hojattu toko Mikayati erge, Hurrisi, kooti jed'eeni.

⁹Hayyooti lamaani taani miha hayyu naqatte, barch'uma ufi ka hayyuma ira, fulla oobdi ta fulla fullo dira Samaria, teteete, raagooti ch'ufti worra dura ejaanjite wo fadde. Raagi

¹⁰toko ka Zedekia, ilma Kenaana jed'ani, sibiila aka gaafa mid'aase waan Ahabuni jed'e, AABBO Waaqi waan jed'u; gaafa kanani worra gosa Shamu haatani dabsattani.

¹¹Raagooti taani ch'ufti afaani taka dubbate waan jette, Ramothi d'aqi, AABBO Waaqi worra dira suni harka kanketiti keenna.

¹²Namichi Mikaya yaamu d'aqe kaani waan jed'eeni, Raagooti taani ch'ufti yayu afaani taka dubbate waan dansa hayyu fadde, atinileeni akasuma waan dansa dubbate hayyu fagu malte.

¹³Ammo Mikayaani waan jed'eeni, Anini maqa AABBO Waaqatini kakhad'a, aka waan Waaqi kiyya, jed'i naani jed'u ch'alla jed'u!

¹⁴Inni fulla hayyu Ahabu d'ufe jennaani hayyuuni waan jed'eeni, Mikaya, nu Ramothi haana mo inhaanu? Mikayaani waan jed'eeni, Beena, had'a, AABBO Waaqi inuma isani dabsachiisa.

¹⁵Ammo hayyichi waan jed'eeni, Hojja maqa AABBO Waaqatini naani dubbatu d'uga dubbad'u! Maro hagami siti himu male?

¹⁶Mikayaani waan jed'eeni, Anini worra Israeli ch'ufa ka gaareeni gubba firfirsani, hooliye tissitu inqamne fakaatu arga. Ammalle AABBO Waaqi waan jed'u, Worri kunini abba inqabu, ha namu nagayaani galuti.

¹⁷Ahabuni waan Yehoshefathini jed'e, Anini, inni waan hamtu male, dansa naa infagu sini injenne? Me, ilaali!

¹⁸Ammalle Mikayaani waan jed'e, Amma waan AABBO Waaqi jed'e ch'aqasi! Anini AABBO Waaqa, ka barch'uma ufi ira tau, gubbati arge, ka malaikaani isaa mirgaafi bita isaa ejaanjitu.

¹⁹AABBO Waaqi waan jed'u, Eenuti Ahabu soba, aka inni deeme Ramothiti duu? Malaikaani gari waan toko jette, ammo ta gari waan d'ibi jette.

²⁰Jennaani jinnini toko AABBO Waaqa dura d'ufte waan jetteeni, Anati isaa soba. AABBO Waaqi, Akami sobda? jed'e gaafate.

²¹Jinnini waan jetteeni, Anini deeme raagoota Ahabu ch'ufa kiyyibsiisa. AABBO Waaqi waan jed'eeni, Beeni, isa sobi, inni inuma sobama.

²²Duuba Mikayaani waan jed'e, AABBO Waaqi yayu raagoota tante tana ch'ufa kiyyibsiise, ammo isumati si balleesu fed'a.

²³Jennaani raagi Sedekiani Mikaya d'abanaase waan jed'eeni, Lubbuuni Waaqa yoomi na biraa deemte sini dubbate?

²⁴Mikayaani waan jed'eeni, Gaafa atini mana kanke seente keesati d'okhatu waan suni garta.

²⁵Jennaani Ahabuni waan jed'e, Mikaya qaba, gudda dira kana ka Amoni jed'anifi Yoashi ilma kiyyati geesa,

²⁶waan jettaniini, Hayyichi waan jed'u, Nama kana mana hid'aansa keesa buusa, qit'aa gogafi bisaani ch'allaani gololcha, haga anini nagayaani galuti.

²⁷Mikayaani waan jed'eeni, Yo atini d'uguma nagayaani galte, AABBO Waaqi naani indubbanne. Ammalle inni waan jed'e, D'iiro, isani nami ch'ufti d'uga naa taha.

²⁸Jennaani hayyuuni Israelitiifi Yehoshefathini hayyu Yuda dira Ramothi ka Gileadi woliini had'u d'aqani.

²⁹Ahabuni waan Yehoshefathini jed'e, Anini woya tiyya jijirad'e nama d'ibi ufi tolche had'u d'aqa, ammo atini woya tante ta hayyutini had'u d'aqi. Duuba hayyichi Israeli woya jijirate nama d'ibi ufi tolche had'iisa d'aqe.

³⁰Hayyichi Shamu qara waan askarti isaa ta gaari fardi hirkisuti matatiini jed'e, Hayyu Israeli male, nama d'ibi tokole inhad'ina.

³¹Duuba worri Yehoshefathi arge jennaani hayyu Israeli sehani iti gorani isa had'ani. Ammo inni iyye jennaani AABBO Waaqi isa baase worra isa had'u jiru kaani iraa deebise.

³²Worri kaani aka inni hayyu Israeli intahini arge jennaani iraa deebie.

³³Ammo askartichi Shamu toko akanumati t'iya darbe, hayyu Israeli fulla miha isaa ka lola woltiini ejuuni woraane. Jennaani hayyichi waan nama gaari isaa oofuni jed'e, Anini ya madae, had'iisa ira nu deebisi!

³⁴Ka had'iisi aka male jabaachu jiru, hayyu Ahabu gaari isaa keesati, fuula worra Shamuti deebisani jabeesani qabani. Aduuni d'iinaani ch'iche.