Read BORANA BIBLE – KITAABA WAAQA 2 Odu duri 2 Bible Online

2 Odu duri 2 - BORANA BIBLE – KITAABA WAAQA bible

2 Odu duri 2

¹Solomonini aka Mana AABBO Waaqa keesati kad'atanifi mana ufi iti galu jaaru herege buufate.

²Inni nama kuma torbatama, ka wobaatu, baase, ammalle nama kuma saddeetama ka d'akha boch'ule baase. Ammalle nama kuma sadiifi d'ibba jaa, ka huji suniti mataa, fohate.

³Solomonini qonqo gara hayyu Tiro, ka Hiramu jed'ani, erge waan jed'eeni, Akuma duri abba kiyya hind'eesa inni manani jaaratu gurgurte, nale gurguri.

⁴Anini Mana AABBO Waaqa kiyya keesati kad'atani jaara. Mana qulqullo suni keesa anaafi gochiti tiyya isa kad'anne, hit'aana urgaa aarsine, qit'a qulqullo guyya ch'ufa baamneefi, ammalle diiramafi galgala ch'ufafi guyya Sabatotifi guyya baatitifi guyya jila ch'ufa hori gumne sorio baamna. Duuba akasiini AABBO Waaqa keenna guddimna. Waan kana inni ya, haga jiru jireenna tolfad'a Israeliini jed'e.

⁵Mani anini jaaru fed'u kunini maneeni ch'ufa ira gudda taha, wonti akanatiifi Waaqi keenna Waaqa d'ibi ch'ufa ira jira.

⁶ Ammo qarale eenuti dandae Mana Waaqaa jaara, ka ufiftu gubbaleeni, ta akasi ballo, dandeete isa imfuune? Anini eenu re, ka fulla hit'aana iti aarsani male dandae mana isaa jaaru?

⁷Amma nama hogeesa, ka worqifi qarsifi sibiila diimafi sibiila guraachaani wo mid'aasu beekhu, ka ammalle woya bulefi bule diimtufi diimtuleeni wo mid'aasu beekhu na ergi. Inni hogeeyi Yudatifi ta Yerusalemu, ta duri abbaani kiyya fohate, woliini hojata.

⁸Anini aka jari kanke, ka huji mukha hojattu, hogeeyi imbeekha, tanaafi mukha hind'eesatifi mukeeni ejersa jajabdu Lebanoni na gadi ergi. Anini kurfo jira, aka nama kiyya erge, worri jara kanke qarqaaru,

⁹aka akasiini worri mukha heddu woliini ch'iru; wonti akanatiifi mana anini jaaru fed'u kunini mana gudda, mid'aaga.

¹⁰Sagaleeni woreega ta anini hojattu tanteeti ergu, dargaye kintaala kuma diddamatifi garbu kintaala kuma diddamatifi, daad'i d'ebbe kuma diddamatifi d'ad'a d'ebbe kuma diddama.

¹¹Jennaani Hiramuni, hayyuuni Tiro, tatabe gara Solomoni t'aafe waan jed'eeni, AABBO Waaqi waan gumi ufi jaalatufi ya hayyu si tolche.

¹²AABBO Waaqa Israeli, ka lafafi gubba uume, maqa isaa ha faarsani! Inni yayu hayyu Daudi ilma qaro kenne, ka qaroomafi hubacha guddo qabu, ka amma Mana AABBO Waaqatifi ka ufile jaaru fed'u.

¹³Anini amma namicha qaro hogeesa Huramu jed'ani sii erga.

¹⁴Haati isaa gosa Daniti, ammo abbaani isaa nama Tiroti. Inni worqifi qarsifi sibiila diimafi sibiila guraachafi d'akhaafi mukha iraa wo mid'aasu beekha. Ammalle inni woya bulefi bule diimtufi diimtufi booftaleeni wo mid'aasu beekha. Inni waan heddu barreesu beekha, ammalle yo, waan akana kana na barreesi jed'ani iti kennani, guddo mid'aasu beekha. Inni ka hogeeyi tanteetifi hogeeyi duri abba kanke Daudi hojatte woliini hojattu.

¹⁵Tanaafi amma tana dargayefi garbufi daad'ifi d'ad'a atini inerga jette nuu ergi.

¹⁶Nu gaareeni Lebanoni ira hind'eesa atini feetu ch'ufa ch'irre wolti hiine, baariiniti jissina, aka bisaani baariini suni fuud'ani, dira Yafatini d'ufani. Duuba arti atini dandeete Yerusalemuti geefata.

¹⁷Jennaani Solomonini nama gosa Israeli intahini, ka lafa Israeli keesa jiru, hede, akuma duri abbaani isaa Daudini nama hede kaani. Henni worra suni nama kuma d'iba tokotifi shantami saditifi d'ibba jaa tahe.

¹⁸Inni nama kuma torbatama ka wo baatu baase, ammalle nama kuma saddeetama ka gaareeni irati d'akha boch'ule baase, ammalle nama kuma sadiifi d'ibba jaa, ka huji suniti mataa, fohate.