Read BORANA BIBLE – KITAABA WAAQA 2 Odu duri 25 Bible Online

2 Odu duri 25 - BORANA BIBLE – KITAABA WAAQA bible

2 Odu duri 25

¹Gaafa Amaziani hayyu tahe ganni isaa diddami shani, duuba inni ganna diddami sagali Yerusalemu keesa lafa mohate. Haad'a isaa, maqaani Yehoadani, ta worra Yerusalemu.

²Inni waan dansa tolche AABBO Waaqa gammachiise, ammo waan suni guddo garaa tokooni intolchine.

³Inni akuma hayyu tahe jabeenna argateeni, jara abba isaa ijeese kaani fit'e.

⁴ Ammo tatule ijoolle worraa inhobaamne, akuma AABBO Waaqi, Seera Musa keesati, biyyati hime: Wollaala ijoolleeti jed'ani abba inijeesani, ka abbaale jed'ani ijoolle inijeesani; nama wollaaluma inni tolche ch'allaani ijeesani.

⁵Jennaani Amaziani worra d'iira ka Yudatifi ka Benjamini wolti baase, balbala balbalaani, nama kuma kumafi d'ibba d'ibbaani qoode, askarti sunile jara gugurda mataa iti tolche. Jari huji tana fohatani nama ganna diddamati oli, ka ch'ufti wolti nama kuma d'ibba sadi. Jari kunini ch'ufti nama filani, ka huji woraana guutu ka ammalle wonteefi woraanani wo had'u beekhu.

⁶Worra kana malele, inni askarti kuma d'ibba toko, worra Israeli ira qarsi kilo kuma saditifi d'ibba afuri baase kirefate.

⁷Ammo raagi toko gara hayyu d'aqe waan jed'eeni, Ee hayyicha, askarti Israeli tana woliini iyyaaina, wonti akanatiifi AABBO Waaqi worra Efraimu, ka mirga d'ufe kana, woliini injiru.

⁸Atini mala keeti, waan worri kunini qarqaarsa sii tahu seeta? Ammo nami nyaapa nama dabsachiise yokhaani dabsachu d'owu Waaquma, inni amma duuba harkuma nyaapa keetiti si kenna.

⁹Jennaani Amaziani waan raaga sunini jed'e, Qarsi anini worra suniti baase suni maani tolcha?

¹⁰Jennaani Amaziani askarti inni qarsiini kirefate taani ufira galche. Akanaani worri suni, ka aka hama worra Yudati dallane, kae gale.

¹¹Duuba Amaziani garaa jabaate, duula isaa bale soodati geese, achiti worra Edomutiini wolhad'ani, askarti worra suni nama kuma kud'ani keesa fit'ani,

¹²kuma kud'ani d'ibile qaqabe boojie. Duuba worra boojiani suni fiit'e gaara geesani, arti iraa dadarbani d'akhaaye golba jirtu irati hobaasani.

¹³Ammo askartini Amaziani galche taani, ta inni duula ufi gula yau d'owe taani, dira Yuda haga Samaria iti keeyate Beth-Horoniti d'aabde haate. Nama kuma sadi fitt'e waan heddu saamte.

¹⁴Amaziani worra Edomu dabsate gale jennaani, Waaqa d'ara ka worri Seri kad'atu galeeni, Waaqa tolfate, kad'ate guddise hit'aana aarsefi.

¹⁵Wonti kunini aka male AABBO Waaqa dallansiifte, inni raaga Amaziati erge waan jed'eeni, Atini maanifi Waaqa gosa d'ibi, ka ufiftu worra isaale harka kanke duraa imbaamne, kad'ate gula deemta?

¹⁶Ato raagi tae dubbi suni dubbatu, hayyichi waan jed'eeni, Nu nama hayyu mala d'au yoomi si fohanne? Afaani qabad'i, yo duu infeene! Jennaani raagi kaani diqo afaani qabate, ammo duuba eege waan jed'e, Anini imbeekha, aka Waaqi si ijeesu fed'u, waan atini waan kana ch'ufa tate gorsa kiyyale ch'aqasu diddeefi.

¹⁷Jennaani hayyuuni Yuda ka Amazia, jed'anifi jari isaa mala d'au wolti d'ufani, mala worra Israeliti d'aatani, qonqo gara hayyu Israeli, ka Yoashi ilma Yehoazi, ka ilma Yehuti, erge waan jed'eeni, kooti, woli haana.

¹⁸Jennaani Yoashini, hayyuuni Israeli, qonqo gara hayyu Yuda, ka Amazia jed'ani, erge waan jed'eeni; gaafa toko mukhi qoraati toko; ka gaara Lebanoni, qonqo mukha hind'eesa tokoti erge waan jed'e: Intala tante gurba kiyyaa kenni, ka fuud'uti. Jennaanini bineensi toko mukha qorati kaani d'aatu bahe iti riiqate ch'abse, ira ejaanjate.

¹⁹Amma tana Amazia, atini waan worra Edomu dabsateefi, akana kiyyibda. Amma waan atini taatu, garu indeemini, worruma kanke tai. Atini maanifi gaargala barbaadda, ka siifi worra kanke balleesu?

²⁰Ammo Amaziani ch'aqasu dide, wonti akanatiifi Waaqati isaa ch'aqasu d'owe, aka akasiini harka nyaapa isati isa kennu, waan inni Waaqa Edomu kad'ateefi.

²¹Duuba hayyuuni Israeli, ka Yehoashi jed'ani, hayyu Yuda, ka Amazia jed'ani, had'u d'aqe, Beth-Shemeshi, ta lafa Yuda keesati, fuula keesa wold'ufani woli had'ani.

²²Duula Yuda dabsatani, nami ch'ufti worra ufiti baqate.

²³Yehoashini, hayyuuni Israeli, Amazia hayyu Yuda Beth-Shemeshiti dabsate, qabe, Yerusalemuti geese. Achiti, d'akha marsani dira sunini jaarani, haguma fullo Efraimutii fuud'e fullo Mogati d'aabe ch'ach'abse — d'akha suni d'eerinni d'und'uma d'ibba afuri.

²⁴Inni worqifi qarsi ch'ufa guurate, ammalle miha Mana Waaqa ka worri d'aloota Obed-Edomu qorqoratufi ka mana hayyule ch'ufa guurate, namale boojie, dira Samariatini galate.

²⁵Amaziani, hayyuuni Yuda, eegi Yoashini, hayyuuni Israeli, ka Yehoazini d'ale, due ganna kud'ani shani tae.

²⁶Waan Amaziani tolche ch'ufa haguma geetunu kitaaba Odu Hayyoota Yudatifi ta Israeli keesati t'aafaniti t'aafani.

²⁷Haguma inni AABBO Waaqa iraa gorre, Yerusalemu keesati guddo mala ijeecha iti d'aatani. Duuba eege inni dira Lakishiti baqate, ammo isa hordofani achiti ijeesani.

²⁸Reefa isaa farda ira kayani Yerusalemuti geesani dira Daudi keesati fulla hayyoota iti awaalaniti awaalani.