Read BORANA BIBLE – KITAABA WAAQA 2 Odu duri 29 Bible Online

2 Odu duri 29 - BORANA BIBLE – KITAABA WAAQA bible

2 Odu duri 29

¹Gaafa Hezekiani hayyu tahe, ganni isaa diddami shani duuba inni ganna diddami sagali Yerusalemu keesa lafa mohate. Haad'a isaa, maqaani Abiya, isiini dubra Zekaria.

²Inni faana ababo isaa Daudi bahe, waan AABBO Waaqa gammachiisa tolche.

³Jia qara ganna Hezekiani hayyu tahe, inni balbala Mana Waaqa ta qara ch'ufani bane fulla hammatele ch'ufa mid'aase.

⁴Duuba qaaloleefi worra Lawi wolti yaame, naabo Mana Waaqa garaa keesa moga ilaboruti

⁵iti dubbate waan jed'e, Isani worri Lawi ufi qulqulleesa, Mana AABBO Waaqa ababoota teesanile, qulqulleesa, waan mana suni t'ureesa ch'ufa keesaa baasa.

⁶Ababooti teenna AABBO Waaqa keenna iraa gorte, waan hamtu inni infeene tolchite. Worri isa lakise, fulla inni iti galu fuula iraa deefate dudda iti gale.

⁷Worri balbala Mana Waaqa ch'ufe, ifse d'aamfe, hit'aani aarsu dide, sorio gubani baasani, Mana Waaqa Israeli keesati, baasu dide.

⁸Maro waan sunitifi AABBO Waaqi Yudafi Yerusalemuti dallane; wonti inni worra tolche suni nama ch'ufa aka male rifachiifte mudamsiifte akuma isani gartani kana.

⁹Abbooti teenna woraanani fit'ani nad'eenifi ijoolle teenna boojiani.

¹⁰Anini amma wold'aqisa AABBO Waaqa Israelitini tolfachu fed'a, aka inni deebie nuti indalanne.

¹¹Ilmaani tiyya, indidina, nami AABBO Waaqi fohate, ka hit'aana isaa aarse Mana isaa keesa isaa hojattu isani; hurrisa hojad'aafi.

¹²Nami gosa Lawi ka hojja suni achi jiru worra kana: Balbala Kohathi: Mahathi, ilma Amasaitifi Yoeli, ilma Asaria. Balbala Merari: Kishi ilma Abditifi Azaria, ilma Yehaleli. Balbala Gershoni: Yoa, ilma Zimatifi Edeni, ilma Yoa. Balbala Elisafani: Shimrifi Yeueli. Balbala Asafu: Zekariafi Matania. Balbala Hemani: Yehuelifi Shimei. Balbala Yeduthuni: Shemayafi Uzieli.

¹⁵Jari kunini nama gosa isaani ka Lawi ch'ufa wolti baase, worri ch'ufti ufi qulqulleese. Duuba akuma hayyu Hezekiani worraani jed'e, Seera AABBO Waaqa gula Mana Waaqa qulqulleesani.

¹⁶Qaaloleeni Mana Waaqa seente qulqulleesite, waan qulqullo intahini ch'ufa keesaa baafte, gara naabo geesite. Duuba worri Lawi d'ufe dira keesaa baase bale Kidroni keesati jisse.

¹⁷Huji suni guyya qara ka jia qara iti keyatani, guyya saddeeteeso geennaani ch'ufa hobaasani, mana balbala guddoti aanule woliini. Jennaani guyya saddeeti d'ibile hojatani, guyya kud'ani jaeeso, ka jia suni, huji qulqulleesa Mana Waaqa suni hobaasani.

¹⁸Jennaani worri Lawi fulla hayyu Hezekia d'ufe waan jed'eeni, Nu yayu Mana Waaqatifi waan sorio irati gubani baasanifi mesa qit'a qulqullootifi miha isaa ch'ufa qulqulleesine iraa deebine.

¹⁹Ammalle miha duri hayyu Ahazini gaafa kara Waaqa iraa gore kaani gate, guure deebimne qulqulleesine. Mihi suni ch'ufti mesa AABBO Waaqa dura jira.

²⁰Boriyyaate hayyu Hezekiani ganama lafaa kae, jaarole Yerusalemu wolti yaame, Mana AABBO Waaqa woliini d'aqani.

²¹Worri koromi looni torbaafi elemiye torbaafi ilmoole hoola torbaafi korbeeyyi torba d'ufeeni, maro daba worra hayyutifi worra Yudatifi, ammalle aka Mana Waaqa qulqulleesani sorio baasani. Jennaani hayyichi waan qaalole d'aloota Harunitini jed'e, Hori kana qala, mesa irati sorio baasa.

²²Jennaani qaaloleeni qara koromi suni qaqalte, elemiye iti aansite, eege ilmoole hoola qaqalte, d'iiga hori sorio suni waan mesa fakaata, ka sorio irati baasani kaaniti fifit'e.

²³Jennaani worri korbeeyyi suni hayyufi gumi taani duraani d'ufe, worri suni harirate.

²⁴Duuba eege qaaloleeni korbeeyyi suni qalte d'iiga isi sorio daba gumi ch'ufaatini baasani baafte, waan sorio irati baasani irati jissite. Wonti akanatiifi hayyichi qara waan jed'e, sorio gubanifi sorio dabaani ufi iraa baasani maro gumi Israeli ch'ufa ha baasani.

²⁵Hayyichi dubbi AABBO Waaqi duri raaga hayyu Daudi ka Gadi jed'anifi raaga Nathani jed'aniini Dauditi hime gula deeme; inni worra Lawi ka kiraarifi bilbila qabu,

²⁶miha duri miha hayyu Daudini qabu fakaatu huji Mana Waaqatii jed'e iti kenne. Qaaloleeni ta magalata qabduleeni achi jirti.

²⁷Jennaani Hezekiani, sorio gubani baasa, worraani jed'e, sorio suni baamnaani biyyiti AABBO Waaqa faarsite, siribduleeni magalatafi miha sirba kaanile ch'ufa d'oofte.

²⁸Nami achi jiru ch'ufti Waaqa faarse, faaruufi sirba suni haga sorio ch'ufa baasaniti illakimne.

²⁹Jennaani hayyu Hezekiafi gumiini ch'ufti gajette, AABBO Waaqa kad'atte.

³⁰Hayyufi jaaroleeni Yuda waan worra Lawitini jette, Faaru Daudifi raagi Asafuni t'aafani AABBO Waaqaani faarsa. Akanaani nami ch'ufti gammada guddaani sirbe jilbifate, Waaqa kad'ate.

³¹Jennaani Hezekiani waan biyyaani jed'e, Isani amma tana ya ufi qulqulleesitani, koota, gad'iaad'a, sorio baasa, galata AABBO Waaqaa deebisa. Worri dubbi suni ee jed'e, hori gubani sorio AABBO Waaqaa baasanini d'ufe.

³²Horini worri d'ufeeni, koromi looni torbatama, elemiye d'ibba tokoti, ilmoole hoola ta d'ibba lama;

³³worri ammalle koromi looni d'ibba jaafi hooliye kuma sadi sorio qaqale biyya nyaachise.

³⁴Maro qaaloleeni hori kana ch'ufa ufiti qaallu indandeennefi, worri Lawi haga huji hobaasaniti worra qarqaare. Yo worri huji suni hobaase, qaaloleeni d'ibileeni ya ufi qulqulleesite. (Worri Lawi gara qulqulluma gula qaalole ira jira.)

³⁵Sorio gubani baasani male, qaaloleeni gabbinna hori fooni isaa nyaatani gubde, daad'i sorio gubani woliini baasani d'ibaayu baafte. Akanaani huji eeba ta Mana Waaqa ta duri lakisani amma deebiani tolfatani.

³⁶Hezekiafi gumiini ch'ufti guddo gammadde, waan qarqaarsa Waaqatini hujiini tunini ch'ufti yoosu hobaateefi.