Read BORANA BIBLE – KITAABA WAAQA 2 Odu duri 33 Bible Online

2 Odu duri 33 - BORANA BIBLE – KITAABA WAAQA bible

2 Odu duri 33

¹Ganni Manase kud'ani lama gaafa inni hayyu Yuda tahe, ammalle inni Yerusalemu keesa haga ganna shantami shani lafa mohate.

²Akuma gosa AABBO Waaqi duri worra duraa gusse, ta waan hamtu tate isa durati ch'ubbu hamtu tolchite taani, Manaseleeni AABBO Waaqa durati ch'ubbu tolche.

³Fulla waaqa d'ara iti kad'atani, ta gaara gubba, ta qara abbaani isaa Hezekiani ch'ach'abse, jaare, ammalle fulla Baali iti kad'atani sorio baasanifi mid'aase, fakeenna waaqa Ashera jed'anile boch'e, urjile ch'ufa gajed'e kad'ate.

⁴Inni Mana AABBO Waaqa, ka Waaqi, na ch'alla keesati haga jiru jireenna yaamad'a jed'e, keesati waan sorio waaqa d'ara irati baasani jaare.

⁵Ammalle naabo lamaani, Mana Waaqa garaa keesati, waan sorio irati baasani urji kad'atani, jaare.

⁶Inni ilmaani isaa ta d'iira bale Henomu keesati gube sorio baase, ammalle nama wohimufi ka murma baafatufi worra ayyaanatifi falfatule d'ugeefate gula deeme. Inni ch'ubbu guddo hamtu tolche, akasiini AABBO Waaqa dallansiise.

⁷Ammalle akheekha mid'aase, Mana Waaqa keesa kaye. Mani suni ka duri Waaqi waan isaa dubbate waan Daudifi Solomonini jed'e, Yerusalemu keesa, Mana kana keesati, fulla anini lafa gosa Israeli kud'ani lamaani taani keesaa fohad'e, iti na kad'ad'a.

⁸Ammalle yo gumiini Israeli Seera kiyya guute, seera hojatuni tiyya Musani kenneefi ch'ufa gula yaate, anini aka lafa anini ababoota worraati kenne taani keesaa worra baasani ee injed'u jed'e,

⁹Manaseeni worra Yuda ch'ubbu hamtu taka gochiti d'ibiini AABBO Waaqi duri gumi ufi dura gusseleeni intolchini tolchisise.

¹⁰AABBO Waaqi Manaseefi gosa isaa gorse, ammo worri gorsa isaa ch'aqasu dide.

¹¹Tanaafi AABBO Waaqi worra gugurda askarti Ashuru worra Yudati had'iisa erge. Worri Manase qabe, sibiila hokichaani woraane, sansalatani hid'e, lafa Babiloni geese.

¹²Gaargali sunini isa qabate jennaani kiyyiba qara kaani lakise, AABBO Waaqati deebie naasu kad'ate.

¹³Waaqi kad'acha Manase d'agayeefi, Yerusalemuti galche, hayyuma isaati deebise. Suni gula, Manaseeni aka AABBOONI d'uguma Waaqa hubate.

¹⁴Eegi suni Manaseeni naabo ala ta dira Daudi moga ilaboru haga qara kaani ira iti dare old'eerese jaare, inni gama mirga haguma bale d'aatu maddo Gihoniti iti keeyate fullo Qurt'umi ira qabe moga dira ta Ofeli jed'aniti d'aabe jaare. Inni ammalle jara gugurda askarti, dira Yuda ka jabeesani jaarani ch'ufa keesa, toko toko kaye.

¹⁵Inni Waaqa d'ara ka gochiti d'ibiini kad'atuufi akheekha inni duri achi kaye Mana Waaqa keesaa baase, waan sorio irati baasani, ka gaara Mani Waaqa gubba jiru ira jirtuufi ammalle ta Yerusalemu keesa fulla d'ibi jirtule ch'ufa balleese; waan kana ch'ufa dira keesaa baase alati balleese.

¹⁶Inni ammalle waan AABBO Waaqa sorio irati baasani, ta qara hammate, mid'aase jaare, sorio wold'ageetitifi ta galata irati baase; ammalle worra Yuda ch'ufaani, AABBO Waaqa Israeli kad'ad'a jed'e.

¹⁷Biyyiti sorio fulla d'ibileti baafte, ammo hataatuti, AABBO Waaqa isaani ch'alla guddifte.

¹⁸Waan Manaseeni tolche ch'ufa, kad'acha inni Waaqa isaa kad'ateefi dubbi raagooti maqa AABBO Waaqa Israelitini isaani dubbatele ch'ufa, kitaaba Odu Hayyoota Israeli keesati t'aafaniti t'aafani.

¹⁹Kad'acha isaatiifi aka Waaqi kad'acha suni d'agayeefi ch'ubbu inni ato qara iraa indeebiini tolcheefi — waan hamtu inni tahe, ka inni fulla waaqa d'ara iti kad'atani jaare, akheekha Ashera mid'aase Waaqa d'ara ka inni kad'atele — waan kana ch'ufa kitaaba odu raagoota keesati t'aafaniti t'aafani.

²⁰Manase doonaani mana isaa keesati awaalani, ilmi isaa Amonini fulla isaa hayyu tahe.

²¹Ganni Amoni diddami lama gaafa inni hayyu Yuda tahe, ammalle inni ganna lama Yerusalemu keesa lafa Yuda Mohate.

²²Akuma abba isaa Manase, innileeni AABBO Waaqa durati ch'ubbu tolche waaqa d'ara ka abbaani isaa kad'atele kad'ate.

²³Ammo inni, aka abba isaa, kiyyiba lakise, garaa laafe AABBO Waaqati indeebine; inni abba isale ira ch'ubbu tolche.

²⁴Hojattuuni Amoni isati malate, mana hayyu keesati isa ijeefte.

²⁵Jennaani worri Yuda jara isa ijeese kaani hobaase, ilma isa ka Yosia jed'ani hayyu tolche.