Read BORANA BIBLE – KITAABA WAAQA 2 Odu duri 34 Bible Online

2 Odu duri 34 - BORANA BIBLE – KITAABA WAAQA bible

2 Odu duri 34

¹Ganni Yosia saddeeti gaafa inni hayyu Yuda tahe, ammalle inni Yerusalemu keesa ganna sodomi toko lafa mohate.

²Inni waan AABBO Waaqi fed'u tolche, faanuma akhaakhu isaa Daudi, ka diqole iraa ingorini, bahe seera Waaqa ch'ufa jabeese guute.

³Ganna saddeeteeso ka hayyuma Yosia, ka inni gaafasile ijoolluma qabu, inni Waaqa ababo isaa Daudi kad'ate arti asi gula deeme. Ganna kud'ani lameeso ka hayyuma isaa, inni fulla waaqa d'ara iti kad'atanifi akheekha waaqa Ashera jed'anitifi akheekha waaqa d'ara d'ibile ch'ufa lafa keesaa balleesiti iti kaye.

⁴Jecha isaa gula, jari isaa waan Baali sorio irati baasani ch'ach'abse, waan hit'aana irati aarsani, ka d'aatu jirale ch'ufa, balleesani akheekha Asheratifi ka waaqa d'ara d'ibile ch'ufa balleesani, bulla isaa awaala worra Waaqa suni sorio baaseti firfirsani.

⁵Inni ammalle lafele qaalole waaqa d'ara, fulla worri sorio irati baasu, irati gube, akanaani Yudafi Yerusalemu qulqulleese.

⁶Ammalle dira Manasetifi ka Efraimutifi ka Simeonitifi ka Naftalitifi lafa dira suni d'aatu jirtu ta baddele akasuma tolche.

⁷Lafa Israeli ch'ufa keesa inni waan sorio irati baasanifi akheekha waaqa Ashera jed'ani ch'ach'abse, akheekha ch'ufa bulleese, waan hit'aana irati aarsanile gargari ch'ach'abse balleese. Duuba kae Yerusalemuti deebie.

⁸Ganna kud'ani saddeeteeso ka inni lafa mohate, eegi inni lafafi Mana Waaqale qulqulleese, inni Shafani, ilma Azaliatifi namicha gudda dira Yerusalemu ka Masseya jed'anifi, Yoa, ilma Yohaazi, ka hayyu wo t'aafu, erge, Beena, Mana AABBO Waaqa fulla ch'ach'abt'e mid'aasa jed'eeni.

⁹Beese worri Lawi ka balbala eegu Mana Waaqa keesati guure, harka qaallicha gudda Hilkia jed'aniti kennani. (Beeseeni sunini beese worra Efraimutifi ka Manasetifi worra Israeli d'ibifi worra Yudatifi, ka Benjaminitifi ka Yerusalemule iraa guurani.)

¹⁰Beese tana eege jara sadeeni huji mid'aasa Mana Waaqati mataa kaaniti kennani, worri

¹¹worra hogeeyi mukhaani wo jaartufi ta d'akhaani wojaartuuti kenne, aka d'akhaafi mukha maneeni hayyooti Yuda qorqorachu dide balleesiteni jaarani, bitu.

¹²Worri huji suni hojate ch'ufti nama d'ugaati. Nami worra suni hojachiisu. Nama worra Lawi afuri: Yahathifi Obadia, ka balbala gosa Meraritifi Zekariafi Meshulamu, ka balbala gosa Kohathi. (Worri Lawi kaani ch'ufti hogeeyi sirbaati.)

¹³Worri Lawi hagi toko worra wo baatufi worra huji d'ibi hojatule hojachiise; ammalle hagi toko wot'aafe yokhaani balbalfa eega.

¹⁴Ato beese fulla iti olkayani keesa guuru jiranu, Hilkiani kitaaba Seera AABBO Waaqa, ka inni Musaa kenne, arge

¹⁵waan shefanini jed'e, Anini yayu kitaaba Seera Mana Waaqa kana keesati arge. Duuba kitaaba suni Shefaniti kenne,

¹⁶inni hayyuti geese waan jed'eeni, Nu waan atini tolcha nuni jette ch'ufa ya tolchine.

¹⁷Ammalle beese Mana Waaqa keesati olkayani fuune, harka worra huji hojatufi worra worra hojachiisuleti kennine.

¹⁸Ammalle inni, anini kuno kitaaba Hilkiani nati kenne harkaa qaba jed'e, hayyuu soome.

¹⁹Hayyuuni kitaaba soomufiti jirani d'agaye jennaani woya ufira qabu tatarsaase,

²⁰duuba waan qaallicha Hilkiafi Ahikamu ilma Shafanitifi, Abdoni ilma Mikatifi Shafani ka tatabe hayyu t'aafufi Asaya ka hayyu hojatuni jed'e:

²¹Beena, naafi gumi lafa Israelitiifi ta Yuda keesati haftule AABBO Waaqa wo, nu gaafad'a, waan kitaaba kana keesati t'aafani hubad'a. AABBO Waaqi yayu nuti dallane, maro ababooti teenna dubbi AABBO Waaqa ch'aqasu didde, waan kitaaba kana keesati t'aafani gula yau lakifteefi.

²²Jecha hayyu gula Hilkiafi jari kaani yae, niiti Hulda jed'ani, ta raaga, ta dira Yerusalemu moga hareeti galtu, d'aqe wogaafate. (D'iirsi isii Shalumuni, ilma Tikua, ka akhakhu Harhasi, ka woya Mana Waaqa qorqoratu.) Worri waan tahe kana ch'ufa iti hime

²³jennaani isiini waan jetteeni, AABBO Waaqi Israeli waan jed'u, Waan isani nama nati isani ergeeni jettani,

²⁴AABBO Waaqi waan jed'u, Anini Yerusalemufi nama isii ch'ufa, abaarsa kitaaba hayyuu soomani keesati t'aafanini gaargalcha.

²⁵Worri ya na dide, sorio Waaqa d'ibii baase, akanaani huji sunini na dallansiise, tanaafi dallansuuni sunini ta anini Yerusalemuti dallane deebite naraa ingaltu.

²⁶Ammo gama hayyu, anini, AABBO Waaqi Israeli, waan jed'u: Atini waan kitaaba keesati t'aafani ch'aqafte.

²⁷Ch'ubbu iraa deebite, na durati ufi diqeesite, woya tante tatarsaafte boote, gaafa atini aka anini Yerusalemufi nama isii ch'ufa imballeesa jed'e sodaachise d'ageete. Anini kad'acha tante yayu d'agaye,

²⁸tanaafi haga atini dootuti anini Yerusalemu gaargalche woma intolchu. Atini ato nagayi jiru doota. Duuba jari deebie d'aamsa kana hayyu Yosiati hime.

²⁹Hayyu Yosiani jaarole gugurdo Yudatifi ta Yerusalemutifi

³⁰qaaloleefi worra Lawitifi ammalle nama d'ibi dureesafi hiyyeesale wolti yaame, jennaani worri ch'ufti kae woliini yae gara Mana Waaqa d'aqe. Duuba hayyuuni gumi ch'ufa dura eje, lalabe, kitaaba wold'aqisa, ka Mana Waaqa keesati argani kaani, soomeefi.

³¹Hayyuuni d'aatu utuba hayyuu eje wold'aqisa AABBO Waaqa woliini tolfate, aka Waaqa gula deeme seerafi aadaafi waan inni fed'u ch'ufa gaarafi qalbi isatini tolche, amaa achii dubbi kitaaba wold'aqisa guutu.

³²Inni nama gosa Benjaminitifi nama Yerusalemu keesa jiru ch'ufa, aka worri wold'aqisa suni guutu, kakhachiise. Duuba akanaani worri Yerusalemu wold'aqisa Waaqa ababoota isaani woliini tolfatani suni guute.

³³Yosiani akheekha waaqa d'ara, ka lafa worra Israeli ch'ufa keesa jiru, balleese haga inni jiru gochiti isaa taka kara AABBO, Waaqa ababoota isaani, iraa ingorre.