Read BORANA BIBLE – KITAABA WAAQA Ezra 6 Bible Online

Ezra 6 - BORANA BIBLE – KITAABA WAAQA bible

Ezra 6

¹Jennaani hayyu Dario seera basse, Fulla dubbi hayyoota duri t'aafani lafa Babiloni keesati olkayani ch'ufa barbaada, sooma jed'e.

²Jennaani dira Ekbatana, ka arda Media ke jiru waan wo irati t'aafani, ka dubbi tana irati t'aafani, argani:

³Ganna qara ka Koreshini hayyu tahe, inni seera baase waan jed'e, Mana Waaqa ka Yerusalemu ha mid'aasani jaarani keesati Waaqa wo baasani, soriole gubaniti. Mana suni, d'eerinni isaa ha d'und'uma jaatama tahuti ballinnileeni ha hagasuma tahuti.

⁴Girgida isaa ha d'akhaa sadi ch'ororsani wolgubba naqani, mukha gubba kayani, akasiini wolgubbati jaarani. Horini Mana sunini jaarani ch'ufti ha gubba hayyu tahuti.

⁵Ammalle miha worqitiifi ka qarsi, ka Nebukadrezani duri boojie Babiloni geese, ha Mana Waaqa ka Yerusalemu jiru geesani, fulluma isaa ta duri taaniti deebisani.

⁶Jennaani Darioni tatabe tana worrati erge waan jed'e: Gara Tatenai ka gudda lafa Efrati ta ila adutifi Shethar-Bozenaifi. Wahela keesani ka lafa Efrati ka ila adu: jiru, waan isani taatani: Mana Waaqa suni hanqad'a!

⁷Huji ijaarsa isaa suni keesa imbuina, namicha gudda lafa Yudatifi jaaroleeni Yahudi ha Mana Waaqa fulla qara inni eju kaaniti jaartuti.

⁸Anini amma seera baasa, aka isani jaarole Yahudi tana ijaarsa Mana Waaqa qarqaartani gibira hayyuuni lafa Efrati suni argatule ha hurrisani baasani Mana sunini jaaraniti, aka hujini suni dura deemtu.

⁹Guyya ch'ufa waan qaaloleeni Yerusalemu feetu inhanqatina kennaafi: Jiboota looni taanaani, elemiye taanaani, ilmoole hoola ta gubani Waaqa gubbati sorio baasani taanaani, dargaye taanaani, sooda taanaani, daad'i taanaani, d'ad'ale taanaani, ch'ufa kennaafi.

¹⁰Wonti isani waan suni tolchu maltanifi, aka worri sorio Waaqa gubbati malte isaa baase, anaafi ilmaani tiyya eeba Waaqa kad'atu.

¹¹Yo nami seera kana ch'abse, dareera mana isaa ha keesaa fuud'ani, gama toko qarani duuba isaani tumataniti; mana isale ha jissani huura tolchaniti.

¹²Waaqi duri Yerusalemu fohate, Isi keesati na kad'ad'a jed'e, ha hayyufi yokhaani gosa dubbi tana didde mana isaa suni balleesu feetu ch'ufa balleesuti. Nami seera kana baase ana; Dario taanaafi guutu malani.

¹³Jennaani namicha gudda Tatenai jed'ani kaanifi Shethar-Bozenaifi waheli worraa jecha hayyu kaani ch'ufa guutani akasuma tolchani.

¹⁴Jaaroleeni Yahudi huji Mana Waaqa suni aka dansaa jabeesite dura deemsifte, gorsa raaga Hagaifi Zekaria gula. Worri jecha Waaqa Israelitiifi Koreshifi Dariofi Artashasta hayyoota Ajemi gula Mana Waaqa jaare hobaase.

¹⁵Worri guyya sadeeso, ka jia Adari jed'ani, ganna jaeeso ka hayyu Darioni lafa mohate, Mana suni jaare hobaase.

¹⁶Jennaani worri Israeli — qaalole, worra Lawiti, worri ka eegi boojiani gale kaani ch'ufti — gammade jila tolfate Mana suni eebise.

¹⁷Gaafa Mana suni eebisani suni worri koromi d'ibba tokotifi elemiye d'ibba lamatiifi. Ilmoole hoola ta d'ibba afurile sorio baase ammalle korbeeyyi kud'ani lama henna gosa Israeli kud'ani lamaani taani gula, sorio dabaani ufi iraa baasani basse.

¹⁸Ammalle aada kitaaba Musa keesati t'aafani gula, worri qaaloleefi worra Lawile huji Mana Waaqati gargari qoode.

¹⁹Worri eegi boojiani gale kaani guyya kud'ani afreeso, ka jia qara, jila Pasaka tolfate.

²⁰Qaaloleefi worri Lawi ch'ufti qulqullo, wonti akanatiifi worri qara durati ufi qulqulleese. Worri Lawi hori sorio Pasaka ufifi qaaloleefi worra eegi boojiani gale kaani jed'e qale.

²¹Nami sorio suni nyaate worra Israeli ka eegi boojiani gale kaanifi, nama aada hamtu gosa lafa suni keesa teetu lakise AABBO Waaqa Israeli kad'achu d'ufe.

²²Guyya torba ch'ufa worri jila Qit'a bukho inqamne gammadani tolfate. Wonti worri gammadeefi, waan AABBO Waaqi hayyu Ashuru worraa naasise, innileeni ijaarsa Mana Waaqa Israeli keesa worra qarqaareefi.