Read BORANA BIBLE – KITAABA WAAQA Nehemia 1 Bible Online

Nehemia 1 - BORANA BIBLE – KITAABA WAAQA bible

Nehemia 1

¹Tunini odu Nehemia ilmi Hakalia t'aafe. Jia Kisleu jed'ani, ganna diddameeso ka Artashartani hayyuuni Ajemi lafa mohate, anini Nehemiani gaafasi dira gudda Shushani jed'ani keesa jira.

²Oboleesi kiyya toko ka Hanani jed'ani, jara d'ibi woliini Yudaa d'ufe, duuba anini waan Yerusalemutifi waan gosa Yahudi ta eegi boojiani lafa Babiloni geesani gagalte odeefad'e.

³Jennaani worri waan nani jed'e, Jara eegi boojiani gale kaani guddo gochiti lafa worra keesa teetu taani gaargalchite ch'eersite. Ammalle naabo Yerusalemu ta ch'absanifi balbala Fullo isii ta gubani ammalle imid'aasine akuma duri jirti.

⁴Anini qonqo tana d'agaye jennaani gatae bohe, haga guyya heddu laalefad'e sagale dide ufi agabse, Waaqa gubba kad'ad'e waan jed'eeni,

⁵Ee AABBO Waaqa gubbaa, Waaqa gudda, ka dandae nami sodaa si dura inejine ka nama jaalate seera kanke guutu wold'aqisa woliini tolfatani jabeesitu;

⁶AABBO, na ilaali, kad'acha tiyya, ta anini halkani guyya maro hojattu tante worra Israeliiti kad'ad'u, naa d'agayi. Anini ch'ubbu tiyyaafi ta worra Israeli siti hima; anaafi ababooti tiyya siti ch'ubbamne.

⁷Nu si durati waan hamtu taane, aadaafi Seera atini Musa hojattu kanketini nuu kennite, guutu dinne.

⁸Waan atini duri Musani jette qaabad'i: Yo isani worri Israeli naraa gore, anini gosa d'ibi keesa gargari isani firfirsa.

⁹Ammo yo eege isani nati deebitani seera kiyya guutani, anini wolti isani deebise fulla anini fohad'e iti na kad'atanitini isani d'ufa, ato haga muumme lafa isani firfirsanile.

¹⁰AABBO, worri sunini hojattufi gumi tanteeti, ta atini jabeennafi irre tante guddooni baafte.

¹¹Amma kad'acha tiyyaafi ta hojattu tanteeti, ta si sodaatu, ch'aqasi, arra naa eebisi, hayyicha naa naasisi. Anini gaafasi nama hayyicha daad'iini gololchu.