Read BORANA BIBLE – KITAABA WAAQA Nehemia 2 Bible Online

Nehemia 2 - BORANA BIBLE – KITAABA WAAQA bible

Nehemia 2

¹Guyya toko, jia Nisani jed'ani keesa, gannuma diddameeso ka hayyu Artashartani lafa mohate, anini daad'iini isa gololche. Inni taka ana gammada inqamne ingarre,

²tanaafi waan nani jed'e, Atini maanifi diqole gammada inqamne? Atini gulana kuno fayya qabda, maanti fuula si yake? Jennaani anini ifad'e

³ waan jed'eeni, Ee hayyicha, Waaqi lubbu si d'eeresina, fuuli kiyya akami dandae mid'aaga, ka diri ababoota tiyya keesati awaalani jige bade, balbala Fullo isale ch'ufa ibidaani gubani?

⁴Hayyichi waan nani jed'e, Maani feeta re? Jennaani anini Waaqa gubbaa kad'ad'e.

⁵Waan hayyuuni jed'e, Ee hayyicha, yo atini na jaalatte waan anini si kad'ad'e ee jette, na gad'iisi, d'aqeti lafa Yuda, ta ababoota tiyya keesati awaalani, dira isi mid'aase jaara.

⁶Hayyichi, ka hayyitiini d'aatu teetu, waan nani jed'e. Atini yo amma deemte, hagami bulte deebita? Akanaani hayyichi nati eebise na gad'iise, anileeni bulti haga iti hime.

⁷Jennaani anini waan hayyichaani jed'e, Yo sii tate tatabe anini worra gugurda lafa Efrati ta ila aduti geesu, naa kenni, aka worri aka anini lafa worra keesaa bahe lafa Yudati taaku na gad'iisu.

⁸Ammalle tatabe gara Asafu, namicha gudda badda hayyu eegule, naa kenni, aka inni mukha anini balbala mana jaba keesati Mana Waaqa eeganini mid'aasu naa kenne, ammalle mukha anini balbala Fullo naabo diraatifi mana keesati galanini jaarule. Waan Waaqi na woliini jirufi hayyichi waan anini fed'e ch'ufa naa kenne,

⁹hayyichi worra gugurda askartitifi askarti fardani yaatu naa kenne, gara lafa Efrati ta ila adu iti d'aabanne. Achini baannaani tatabe hayyicha taani jara gugurda lafa suniti kenne.

¹⁰Ammo Sanbalatini ka dira Beth-Horonitifi Tobiani ka lafa Amoni keesati guddinna qabu nama waan dansa worra Israeliiti tolchu d'ufe d'ageennaani aka hama dalanani.

¹¹Jennaani anini Yerusalemu d'aqe, guyya sadi

¹²ka namutu waan Waaqi tolche nani jed'e suni inhimini ufi iraa tae. Duuba halkani guddo anini kae wahela kiyya haga gari fud'ad'e, kae iti d'aabad'e. Horini nu yaaneni gaange anini yaabad'u ch'alla.

¹³Hojja anini balbala Baleetini dira keesaa bahe Eela gorjama biraa dabre balbala Huuratini baheele, lafti halkani. Anini ato deemu naabo dira ta ch'ach'abt'efi Fullo balbala ta ibidaani balleesani ilaale.

¹⁴Jennaani anini gara balbala Eelatifi Haro Hayyuu deeme. Gaangeeni anini yaabad'u taani fulla baatu d'abde,

¹⁵tanaafi anini bale Kidroni gabue, gula deeme naabo ilaale. Eegi suni keesa deebie balbala Baleetini gale.

¹⁶Jaaroleeni dira suni nami tokoleeni, ka fulla anini deemefi waan anini tolche beekhu, injiru. Anini haga ammalle takaa nama gosa Yahudi tokole waan kana iti inhimne — qaalole taanaani, jaarole taanaani worra gugurdale taanaani, nama tokole ka sila huji suni hojatu.

¹⁷Jennaani anini waan worraani jed'e, Gaargala nu amma keesa jiru kana laala, ka Yerusalemu balleesani, balbala isiile gubani! Koota, naabo dira kana jaare ch'eera keenna d'ofanna.

¹⁸Anini aka Waaqi na eebise na qarqaareefi waan hayyuuni nani jed'ele iti hime. Worri waan jed'e, hayye, koota, injaara! Duuba hojuma suni kurfahani, huji jala qabatani.

¹⁹Sanbalatifi Tobayafi Araftichi Geshemu jed'ani waan nu tolchu feenu d'ageennaani, nu goyeesani waan nuni jed'ani, isani ya marattani? Maani tau feetani? Isani hayyuuni morku feetani?

²⁰Jennaani anini waan jed'eeni, Waaqa gubbati nu eebise nu qarqaara, duuba nu hojattuuni isaaleeni kaane jaara. Ammo isani waan tokole Yerusalemu keesaa inqabdani, aada isiile tokole keesa injirtani.