Read BORANA BIBLE – KITAABA WAAQA Tobiti 1 Bible Online

Tobiti 1 - BORANA BIBLE – KITAABA WAAQA bible

Tobiti 1

¹Tunini odu Tobieli ka ilma Ananieli ka ilma Adueli ka ilma Gabaeli ka ilma Rafaeli ka ilma Ragueli; gochiti isaa Naftali balbalti gosa isaaleeni Asieli.

² Bara hayyu Shalmanesari lafa Ashuru fide, Tobiti dira isa ka Thisbe jed'ani keesa boojiani. Dira sunini arda Galilaya keesa gama mirga, arda Naftali keesa Kadeshi gama bita, ammalle Hazori ila adu mirga ammalle mirga Shefati jira.

³Anini haguma d'alad'e kara d'ugaa gula deeme waan qajeeltu tolche. Anini fiit'a tiyyaafi nama gosa tiyya ka Yahudile ka irre inqamne ka na woliini boojiani dira Ashuru gudda ka Ninawi jed'ani geesani maro heddu qarqaare beese Kenneefi.

⁴Gaafa anini ijoolle ka worri keenna lafa Israeli gama mirga tau, gochiti Israeli ch'ufti aada gula sila Yerusalemu d'at'e sorio achiti Waaqa baasu malte. Diri Yerusalemu kunini dira Waaqi dira Israeli ch'ufa keesa fohate, aka Mana isaa qulqullo achiti jaarani. Ammo gochiti tiyya ta Naftali ch'ufti dira sunifi hayyoota d'alootaa Daudi ch'ufa didde.

⁵ Akuma nami gosa tiyya ch'ufti tahe worri keennaleeni dira Dani ka gaareeni Galilaya ta mirga gubba d'aqe, sorio jibicha worqi ka hayyuuni Israeli ka Yereboamu jed'ani achiti mid'aase baase.

⁶ Worra keenna keesa nami Seera Musa jabeese guyya ch'ufa Yerusalemu d'aqe aada jila guutu anuma ch'alla. Anini yo Yerusalemu d'aqu ch'ufa hurise mid'aani kiyya ka qara mureefi waan horini kiyya goromuma d'aleefi, looni kiyya kud'ani keesa tokofi dabassa qara hooliye tiyya ira ch'irele fuud'e geesa. Jennaani anini Mana Waaqa keesa waan sorio irati baasani kaani dura eje waan d'ufeeni kana ch'ufa qaalole d'aloota Haruniti kenna.

⁷Duuba waan d'ufeeni kana ch'ufa kud'ani keesa toko, mid'aani taanaani daad'i taanaani d'ad'a ejersa taanaani okhoku taanaani mid'aani oda taanaani mid'aani d'ibile worra Lawi ka Yerusalemu keesa Waaqa hojatuti kenna. Ganna ch'ufa keesa ganna torbeeso ka lafti boqotu kaani male, anini qooda waan qabu ch'ufa keesa qooda lameeso gurgure beese suni Yerusalemu keesati sagale jilatini bitad'a.

⁸Ammo ganna sadeeso ch'ufa anini qooda sadeeso fuud'e nad'eeni hiyyeeyifi ilmaani hiyyeeyifi nama gosa d'ibi ka gosa teenna keesa godaanu kenne sagale jilale woliini sooranna. Wonti waan akana ch'ufa anini tolchufi aka aada Seera Musa ta jaartini ababoo tiyya ta Debora jed'ani ta akhaakhu kiyya Ananieli d'alte, duri na barsiifte, waan kana jabeesi guuti nani jette. (Aabbooni doonaani anini ilmi hiyyeesi hafe.)

⁹Anini guddannaani intala gosa tiyya toko ta Anna jed'ani fuud'e. Isiini ilma naa d'alte anini ilma suni maqa Tobia baase.

¹⁰Duuba eege na boojiani lafa Ashuru na geesani akasini anini dira Ninawiti qubad'e. Gaafa anini Ninawi jiru suni fiit'a tiyyaafi gochiti tiyya ta Yahudi ch'ufti sagale worri lafa suni nyaatu nyaatani,

¹¹ammo anini sagale suni nyaachu dide.

¹²Waan anini Seera Waaqa gudda jabeese guuteefi,

¹³inni hayyicha Shalmanesari jed'ani naa naasise, duuba hayyichi nama sagale isaa bituti mata na tolche.

¹⁴Haga hayyuuni sunini jiru anini maro heddu lafa Media sagale hayyu bitu d'aqe. Gaafa toko anini dira Rage jed'ani ka lafa Media keesati qarsi ulfinni isii kilo d'ibba sadi ta kintaala keesa jirtu, harka Gabaeli ka oboleesa Gabriati lakise.

¹⁵Shalmanesarini doonaani ilmi isaa Senakaribuni fulla isaa hayyu tae. Jennaani eege deemani kara lafa Media ch'ufti guddo soda taate, aninileeni akasini kara suni ira ch'ite.

¹⁶Gaafa Shalmanesarini jiru anini, yo nama gosa tiyya ka Yahudi ka d'iba qabu argu guddo jabeese qarqaare woi kennafi.

¹⁷ Yo worri beelae anini sagaluma tiyya kenneefi yo worri daara qabatele woya tiyya kenneefi yo reefa nama gosa tiyya ka dira keesa fuud'ani naaboni ala buusani argu ch'ufa, anini fuud'e, aka dansa awaala.

¹⁸Guyya toko Senakaribuni Waaqa hayyu gubba abaare, jennaani Waaqi gaargala isati buuse, duuba inni lafa Yuda keesaa baqate lafa ufiti deebie, karaati inni aka hama dallane worra Israeli nama heddu fit'e. Ammo anini reefa worra suni d'ossaani guure awaale; Senakaribuni reefa suni barbaade d'abe.

¹⁹Jennaani namichi dira Ninawi toko aka anini worra suni awaale hayyichati hime. Anini aka hayyichi waan anini tahe suni ch'ufa beekhe ammalle aka barbaadani na ijeesu fed'ani hubannaani lubbuuni na d'ufte baqad'e d'okhad'e.

²⁰Waan anini qabu ch'ufa saamani fulla hayyuuni woi iti olkeeyatuti olkayani. Wonti toko ka na hafe injirtu, niiti tiyya Annafi ilma kiyya Tobia male.

²¹Eegi waan kana ato bultini afurtama inguutamini, ilmaani Senakaribu nami lama isa ijeefte kaate gaareeni Ararati baqatte. Jennaani ilmi isaa ka Asialo jed'ani fulla isaa hayyu tahe ilma oboleesa kiyya Anaeli ka Ahikari jed'ani nama beese lafa hayyuuni fiddu suni qorqoratu tolche.

²²Tunini maro lameeso ta Ahikari huji akana tana kennani, wonti akanatiifi gaafa Senakaribuni lafa Ashuru fide, Ahikari huji tana hojate: Daad'i gololche, hori herege olkaye ammalle dubbi hayyule haga inni beesisa ira kayuti indabarsani. Maro Ahikarini ilma oboleesa kiyya taheefi inni hayyuti naa dubbate, jennaani gadi na d'iisani dira Ninawiti na deebisani.