Read BORANA BIBLE – KITAABA WAAQA Tobiti 10 Bible Online

Tobiti 10 - BORANA BIBLE – KITAABA WAAQA bible

Tobiti 10

¹Haga kana ch'ufa Tobitini tae bulti deemafi deebi ta kara Rage heda, bultini hobaate gurba isaa d'abe jennaani waan niitini jed'e,

²Maanti isa qabate? Yo aka keeti waan Gabaelini due seeta? Hegeri nami tokoleeni ka beese isati kennu ijiru fa.

³Tobiti guddo yaadoni qabate.

⁴Jennaani Annani waan jette ilmi kiyya injiru sunini mama naa inqabdu, duuba guddo laalefate Tobia boote waan jette,

⁵Ee ilma kiyya jireenna kiyya, anini maafi qara si gad'iisa?

⁶Tobitini isi garaa jabeese waan jed'e intala, Akana iyaadini garaa jabaad'i inni woma intau, hegeri womati akana worra qabate guyya nu herenne kaani ira worra turse. Suni malele waheli isaa nama d'uga ka d'abatani, ammalle fiit'a teenna, teete yaade akana ufi ingaargalchini anini imbeekha inni amma gala kara jira.

⁷Ammo isiini waan jetteeni, Teete na indaleesini afaani nara qabad'i, ilmi kiyya ya due. Isiini guyya ch'ufa alati ch'eete haga aduuni d'ituti kara gurbaani duri deeme doofati, isiini nama isi garaa jabeesu ch'ufa jala dide, yo manati deebitule laalefate ilma ufiti boote taa bulti. Torbaani lamaani jila fuud'a ka Raguelini intala isaati tolche kaani hobanaani, Tobiani gara isa d'aqe waan jed'eeni, Aabba amma na gad'iisu malte, anini imbeekha worri keenna amma ya na jibbaate waan deebie na argu insehu, aabbo Ragueli anini aka aabbooni gaafa anini bira deeme jiru ya siti hime amma na gad'iisi kae gala.

⁸Ammo Raguelini waan jed'eeni, Ilma kiyya tai. Na woliini tai anatu qonqo abbeeti erga inni fayyuma jed'a.

⁹Ammo Tobiani dide gadi na d'isi gara aabbo deebia jed'e.

¹⁰Duuba suni gula Raguelini hojuma suni intala isa Sara Tobia gula gad'iise. Ammalle waan qabu ch'ufa wod'akati gargari qoode Tobia kenne; tissele, looni, hooliye, harele gaala, woya, beese, miha manale.

¹¹Raguelini Tobiati mamarate, eebise, beena nagayati yaa, Aabbo Waaqi gubba sifi Sarale qorqorate, lubbu na d'eerese ilmaani teesanile na garsiisina jed'e gad'iise.

¹²Jennaani Raguelini waan Sarani jed'e, Beeni d'iirsa keetini woliini yaa worra isaniti gali. Arma achi worri sunini worra sii taha akuma naafi haateti. Haga anini jiru woma kanke dansa ch'alla ha d'agayu, nagayati jed'eeni worra gad'iise. Jennaani Ednani waan Tobiani jette, Aabbo Waaqi nagayaani worra keetiti si galche lubbule na d'eerese ilmaani teetile na garsiisina. Aabbo Waaqi d'uga tiyya; anini amma intala tana ya harka keetiti lakise haga jirtu waan isii garaa yaka intolchini beeni nagayati gali, amma Sarani niiti teeti anileeni haad'a tanteti. Haga jiru ch'ufa Waaqi nu daraarse quufa keesa nu teesisinna. Duuba Ednani Worra lachu d'ungate nagayati jette gadid'iifte.