Read BORANA BIBLE – KITAABA WAAQA Tobiti 13 Bible Online

Tobiti 13 - BORANA BIBLE – KITAABA WAAQA bible

Tobiti 13

¹Jennaani Tobitini Waaqa kad'ate waan jed'e: Waaqa haga jiru jireenna jiru faarsa. Ka lafa ch'ufa fidu faarsa.

²Inni qara nu gaargalche ammo eege nu naha. Inni boola dua keesa nu buuse ammalle awaala keesa nu baasa, nami tokoleeni ka isaa duraa bau injiru.

³Ee worra Israeli ka boojiani lafa d'ibiti geesani, fulla jirtani suniti Waaqaa galata deebisa;

⁴ achumati inni irre isaa jabdu isani garsiisa. Nami jiru ch'ufa durati isaa faarsa. Aabbooni Waaqafi abba keenna haga jiru jireenna.

⁵Ato inni maro ch'ubbu teesanitifi isaani gaargalchele, inni isanii nahe lafa gosa d'ibi ta boojiani iti isani firfirsani keesa isaani baase lafa teesaniti isaani galcha.

⁶Garaa keesanifi qalbi teesani ch'ufaani Waaqati deebia, isaa saalfad'a gula yaa. Duuba inni isaniti deebie isani qarqaara iti deebie isani ind'okhatu. Waan Waaqi isanii tolche qaabad'a garaa tokooni galata deebisaafi. Aabbo Waaqa d'ugaa faarsa, hayyu jiru jireenna guddisa. Ato boojiani lafa gosa d'ibi na geesanile, anini Aabbo Waaqa galata deebise, jabeenna isaa gosa dabditi suniti odeesa. Ch'ubbu teesani ira deebia waan Waaqa gammachiisa tolcha! Inni hegeri isanii nahe isani eebisa.

⁷Anini Waaqa kiyya faarse, guddinna isaa keesa gammada, garaafi qalbi tiyya ch'ufaani hayyu gubba guddisa.

⁸Nami ch'ufti ha guddinna isaa odeese, Yerusalemu keesati isa faarsu.

⁹ Ee Yerusalemu dira Qulqullo Waaqa keenna, inni maro ch'ubbu nama keetiti jed'e, si gaargalcha, ammo inni nama d'ugaafi qajeeluma gula deemu innahafi.

¹⁰Duuba Waaqi dansa galata deebisaafi, Waaqa jiru jireenna faarsa, Mana kanke deebiani jaarani worri keetileeni deebie gammada. Aabbo Waaqi worra kanke ka boojiani ch'ufa gammachiise Nama kanke ka gaargala qabu ch'ufa haga jiru jireenna ha qorqoratu.

¹¹Yerusalemu ifsaani kanke nama lafa ch'ufaati ifse, ammalle gochiti hedduuni lafa fagooti siti d'ufti. Worri lafa suni d'ufe Aabbo Waaqa kanke guddise, hayyu gubbati wo kenna. Karaa kanke keesati d'alooti hedduni gammade sirbe, si faarsa atini dira Waaqi fohate maqaani kanke haga jiru jireenna injira.

¹²Nama si mudamsiise, naabo tante ch'ach'abse doofi tante bulleesi maneeni tante gube si balleesu ch'ufa ha abaarani. Ammo nama si guddisu ch'ufa haga jiru jireenna ineebisanifi.

¹³Ee Yerusalemu worra kanke ka d'ugaa qajeela jed'i gammadi; worri lafa iti boojiani taani wolti d'ufe Waaqa haga duriiti jiru faarsa.

¹⁴Ayyaana nama si jaalate hormaata kanke arginaani gammadu. Nami arra gaargala kankeeti jed'e bohu taka tana ingammada, gammadi kanke gammachu haga jiru jireenna ind'umanne worraa keenna.

¹⁵Anini Aabbo Waaqa hayyu gudda faarsa;

¹⁶Yerusalemu deebiani jaarani inni haga jiru worra isaa taha. Ee Yerusalemu, hojja ilmaani tiyya mid'aaguma tante argite hayyu gubbati galata deebiftu anini guddo gammada, balbala fullo teeti d'akha bule ch'ulkichaafi dotini jaarani, naabo tante ch'ufa d'akha ch'uch'uluqaani jaarani. Doofi tante worqini jaarani.

¹⁷Kara kanke d'akha diima ch'ulkichaafi d'akhaaye ch'uch'ulut'uni ch'okhani.

¹⁸Faaru gammada balbala fullo tanteti keesati d'agayani, maneeni tante ch'ufa keesa nami gammade sirbe waan jed'u, Aabbo Waaqa faarsa, Waaqa Israeli faarsa! Ee Yerusalemu Waaqi worra kanke ch'ufa eebise, worrileeni maqa kanke qulqullo faarsa. Dubbi tanaani Tobitini faaru isaa ta Waaqani faarse hobaase.