Read BORANA BIBLE – KITAABA WAAQA Tobiti 7 Bible Online

Tobiti 7 - BORANA BIBLE – KITAABA WAAQA bible

Tobiti 7

¹Tobiafi malaikaani Rafaeli jed'ani taani dira gudda Ekbatanaatini banaanini Tobiani waan jed'e, Jaala kiyya Asaria hurisi mana Ragueliti na geesi. Jennaani malaikaani achi isa geesite, Ragueli ka fullo naabo keesa tau argani. Rafaelifi Tobiani nagaya isa fuud'ani jennaani innileeni nagaya jala fuud'e, jaallani tiyya olduuda jed'eeni. Raguelini worra mana olnaqe,

²waan niiti isaa Ednani jed'e, Gurbaani kunini oboleesa kiyya Tobiti siti fakaata?

³Ednani waan jetteeni, Isani eesa d'uftani? Worri waan jed'eeni, Nu worra Israeliti gochiti teennaleeni Naftali ammo amma tana nu dira Ninawi ka lafa Ashuru fulla boojiani iti nu geesani jira.

⁴Ednani waan jetteeni, Isani namicha oboleesa keenna toko ka Tobiti jed'ani fuula beetu? Ee imbeenna jed'ani. Isiini inni fayya jette gaafate?

⁵Worri waan jed'eeni inuma jira fayya qaba. Tobiani waan jed'e, Bita inni abba kiyya.

⁶ Dubbi suni d'ageennaani Raguelini gammade olch'ee ka gammachu imimaani ila keesa yaani Tobia d'ungate,

⁷waan jed'e, Waaqi sii eebisinna ilma kiyya abbe nama dansa d'uga gula deemu. Waan akami hamtu ka nami arjaani dansaani aka isaa sunini ila d'abe! Jennaani Tobiati mamarate bohe.

⁸Niiti isaa Ednaafi intalti isaa Saraleeni Tobiti bohani Raguelini worra ulfeese elemo toko qaleefi, eegi keesumani bisaani d'iqate sagale nyaati gadi tetete, Tobiani waan Rafaelini jed'e, Jaala Asaria atini yoomi Ragueli naa gaafata aka anini Sara fuud'u?

⁹Ammo Raguelini qonqo isaa suni d'ageennaani waan Tobiani jed'e,

¹⁰Qara me nyaad'i wo d'ugi gammadi ufira buli, nami isi d'aalu siuma, wonti akanatiifi nu milo aanti anini dandae nama d'ibi inkennu. Ammo ilma kiyya anini d'uga si d'ossu indandau.

¹¹Anini qara nama milo teenna torba isi fuusise. Worri sunini kamu halkanuma fuud'a bulti d'iibu seenani raawate. Amma nyaad'i wo d'ugi Aabbo Waaqi isani lachu nagaya isanii kenne isani tissinna. Tobiani waan jed'eeni haga qonqo siraa argad'uti anini woma nyaad'e ind'ugu.

¹²Raguelini waan jed'eeni, Hayye hatatuti, aada Seera Musa gula intala tana sii kenna. Waaqi gubba jiru fuud'a kana ya tolche, isii fuud'i niiti tolfad'i, arma achi isani nama taka. Sarani arma achi haga jiru jireenna tante taati. Aabbo Waaqi gubba isani lachuu nahe naasu isani garsiise halkani kanale nagayaani isani bulchinna.

¹³Jennaani Raguelini intala ufi yaame, isiini d'umnaani harka qabe Tobia kenne eebise waan jed'e, Barsiisa aada Seera Musa gula isi fuud'i niiti tolfad'i. Isi fuud'i nagayaani mana abbeetitini galad'i, Waaqi gubbaa isani horate lubbu isani d'eeresinna.

¹⁴Raguelini niiti isaatini tatabe taka woma irati int'afinini naa kooti kakhu aada fuud'a tana irati t'aafa. Ednani tatabeeni d'ufteeni jennaani Raguelini kakhu aada fuud'a ta Sara aada Seera Musa gula ya Tobia kennani jettu irati t'aafe.

¹⁵Jila ira dachaanani sagale woliini sooratani.

¹⁶Raguelini niiti ufi yaame waan jed'eeni, D'iibu keesuma afi Sara achi geesi.

¹⁷Ednani akuma Raguelini jed'e sire afte Sara achi geesite duuba Sarani boote. Haati imimaani ira haate waan jetteeni,

¹⁸Garaa jabaad'i Sara maro tana Aabbo Waaqi gubbaa si gammachiise laalala si d'owa, tanaafi intala tiyya insodatini garaa jabaad'i, dubbi tana jette kaate.