Read BORANA BIBLE – KITAABA WAAQA Tobiti 8 Bible Online

Tobiti 8 - BORANA BIBLE – KITAABA WAAQA bible

Tobiti 8

¹Sagale ira deebiani hojaani bulti geete jennaani abbaafi haati Sara Tobia fuud'ani d'iibu fuud'a geesani.

²Duuba inni jecha Rafaeli kaani qaabate, tirufi onne qurt'umi taani subba qara keesati olkaya kaani keesa fuud'e hit'aana aarsani kaani ira kaye.

³ Ch'iinch'ani waan suni jinni taani gussite isiini kaate gara lafa Misiri baqate, jennaani Rafaelini reebe achiti qabe hojuma suni harkafi miila hid'e.

⁴Jari kaani Tobiafi Sara manati lakise balbala ch'ufe kae bira yae jennaani, Tobiani sire ira olkae waan niiti isaatini jed'e, Intala kai Aabbo Waaqa kad'anna aka inni nuu nahe nu tissu.

⁵ Sarani aka Waaqi worra tissu kad'acha olkaate, jennaani Tobiani Waaqa kad'ate waan jed'e, Waaqa ababoota teenna, atini ka faarsu malani, wonti atini lafafi gubbaleti uumte ha haga jiru jireenna maqa kanke guddiftuti.

⁶Atini Adamu uumte niiti isaa Hawai kenniteefi aka isiini isa qarqaarte jabeesitu. Worra kana lamaani ira nami lafa keesa jiru ch'ufti bahe. Atini nami qofa tau dansaniti wahela isaa male tolchafi jette.

⁷Aabbo Waaqa anini Sara isiini halkumafi fuud'e, d'araa nafaati jed'e infuune. Nu nahi woliini lubbu nu bulchi.

⁸Worri lachu Amini jed'e,

⁹kae ufira bule. Halkani suni Raguelini hojattu isaa yaame awaala qotu d'aqani.

¹⁰Aka herega isaati inni waan Tobiani akuma worra kaani d'ibi due biyyiti worra kofalte miitu sehe.

¹¹Worri awaala qote hobaase jennaani Raguelini manati deebie waan niiti isaatini jed'e,

¹²Dubra hojattu tana toko ergi aka Tobiani jiru laali. Yo inni jirachu baate ato nami tokoleeni inargine awaalla.

¹³Duuba worri intala hojattu toko ifseeni erge beeni aka inni jiru laali jed'eeni. Isiini mana bante worra kaani ka ufuma tae huursu agarte.

¹⁴Duuba isiini keesa deebite waan Raguelifi Ednani jette Tobiani woma intaane injira.

¹⁵Jennaani Raguelini Waaqa gubba jiru faarse waan jed'e: Atini ka nu faarsu malle ee Waaqa. Gumiini tante ch'ufti ha onne qulqullooni haga jiru jireenna si faarsituti.

¹⁶Waan atini na gammachiifteefi si faarsa, atini guddo nu naate, waan anini qara sodaad'e hanqifte.

¹⁷Ee Aabbo Waaqa faaru nu si faarsinu waan guddo sii male, atini worra wolfuud'e kana lamaani guddo naate, worri lachu nama koba d'alate. Amma naasu tante garsiisi worra qorqorad'i aka gammadafi jaalalaani woliini taani tolchi.

¹⁸Jennaani Raguelini hojattu ufi yaame, beena awaala kaani ato lafti imbariinu tinfa jed'e.

¹⁹Raguelini niiti ufitini Qit'a heddu d'aabi jed'e, duuba ufi gara hori isaa d'aqe sangole lamaafi elemiye afuri d'ufeeni hojattu isaatini jilaa qaqala jed'e.

²⁰ Inni Tobia yaame waan jed'eeni, Anini si gadi ind'isu haga torbaani lama armuma tai. Armuma tai nyaanne woliini d'unna, intalti tiyya qara guddo gaargalte, wonti kunini isii ira jirti.

²¹Gaafa kaate worra abbeetiti nagayaani galtu, waan anini qabu ch'ufa wod'akumati sii qooda fud'ad'i galini. Ka hafele gaafa anaafi Ednani dulloomne kooti d'aali. Arma achi atini akuma Sarani intala teenna atinileeni ilma keenna, waan nu si injalanne diqole insehini ilma kiyya.