Read BORANA BIBLE – KITAABA WAAQA Yudithi 11 Bible Online

Yudithi 11 - BORANA BIBLE – KITAABA WAAQA bible

Yudithi 11

¹Holofeneni waan Yudithini jed'e, Insodatini garaa jabaad'i, wonti atini sodaatufi injirtu. Anini taka nama Nebukadreza hayyu lafa ch'ufati inhojad'a jed'e intunne.

²Ammalle ato sila worri keesani ka gaareeni gubbati galu kunini na arabsu baate, anini worra inhad'u d'iba kana duuba worrumati ufitini d'ufe.

³Amma waan atini worra lakifte nati gad'ufteefi nati himi? Woma insodatini, nu halkani kana ya lubbu si baamne, taka tanalee woma si intolchinu.

⁴Nami tokoleeni si intuqu, akuma hojatu d'ibi gudda kiyya Nebukadrezati si heregani.

⁵Jennaani Yudithini waan Holofeneni jette, Aabbo, woi sini jed'a na ch'aqasi, anini d'uga siti hima.

⁶Yo atini jecha kiyya gula deemte Waaqi si qarqaare herega kanke ch'ufa sii guute waan ch'ufa si dabsachiisa.

⁷Hayyu lafa ch'ufa, Nebukadreza lubbuuni isaa ha d'eeratu! Inni si erge aka atini isaafi nama inni fidu ch'ufa qajeelchitu. Atini nama ch'alla isaa inhojachimne ammo bineensa alaatifi hori monatiifi simpirreefi allaatileeni maro teetifi isaa sarmite. Maro Nebukadrezatifi nami inni fidu ch'ufti hora.

⁸Nu aka atini qalbiifi qarooma qabdu ya d'ageenne. Nami lafa ch'ufa aka atini nama jaba guddo mala qabu ka waan woraana guddo beekhu, lafa hayyuuni Ashuru fidu ch'ufa keesaa sii imbeekha.

⁹Worri dira Bethulia Akioro lubbu baase, inileeni waan kora duula keesati jed'e ya nuti hime.

¹⁰Ammo Aabbo dubbi Akioroni jed'e suni ind'aarefatini dubbi suni jabeesi isiini dubbi d'ugaati, nami tokoleeni ka yo worri Israeli Waaqati inch'ubbamne dandae had'e worra dabsatu injiru.

¹¹Ammo nami tokoleeni ka dudda duuba si deebise waan atini tau feetu ira si d'owu injiru. Hojja worri Israeli ch'ubbame Waaqa ufi dallansisu worri inhobaa.

¹²Sagaleeni ya hobaate bisaanile ya d'abani tanaafi worri aka hori ufi qaqale sagale Seera Waaqa gula nyaachu himmalini aka nyaatani buufatani.

¹³ Worri qooda mid'aani dargaye ta qara muranifi ammalle qooda daad'ifi d'ad'a qulqullo ka qaalole Yerusalemu keesa Waaqa hojatu baasani olkayani, aka nyaatani malatani. Nu nami kaani sagale qulqullo tana tuqu himmalle.

¹⁴Ammo waan worri Yerusalemu seera kana qara ch'abseefi, nami dira yayu qonqo gara jaarole Yerusalemuti korate erge, waan jed'e, Aka nu sagale suni nyaannu ee jed'a iti ga nu lakisa.

¹⁵Guyya worri sagale suni nyaatu atini balleesu dandeeta.

¹⁶Anini akuma dubbi tana d'agayeeni gosa tiyya keesa baqad'e. Waaqi na erge, aka wonti anini si woliini tolchu nama lafa keesa jiru ka d'agayu ch'ufa mamsiiftu.

¹⁷Aabbo anini nama Waaqa sodaatu, anini halkani guyya Waaqa gubbaa kad'ad'a. Anini fulla isani jirtani tana tae, duuba halkani ch'ufa bale suni gabue Waaqa kad'ad'a, inileeni hojja worri Israeli ch'ubbu tolche nati hima.

¹⁸Duuba anini akuma d'agayeeni d'ufe siti hima. Worri Israeli gaafasi dandae ufira isani ind'owu.

¹⁹Anini wod'aka lafa Yuda keesani si bahe haga Yerusalemu geenuti, duuba anini achiti garaa dira suni keesati muude hayyu si tolcha. Atini worra Yerusalemu aka hooliye tissitu inqamne gargari firfirsita. Sareleeni siti ingururitu. Waaqi waan kana duratu na beesise gara keesani na erge aka anini isaniti himu.

²⁰Holofenefi hojatuni isaa waan Yudithini jette suni maachaani qarooma isiile saadani,

²¹waan woliini jed'ani, Nad'eeni aka isii mid'aagumafi qarooma qabdu lafa keesa injirtu.

²²Jennaani Holofeneni waan isiini jed'e, Waaqi ka si erge dabsacha nu kenne worra hayyu Nebukadreza arabse balleesu ya waan dansa tolche.

²³Atini mid'aaguma ch'alla inqabdu, ammo dubbile guddo beeta, hojja waan jettu suni ch'ufa tolchite Waaqi kankeleeni Waaqa naa taha. Atinileeni mana hayyu Nebukadrezati galte lafa ch'ufa keesa gurra baafata.