Read BORANA BIBLE – KITAABA WAAQA Yudithi 2 Bible Online

Yudithi 2 - BORANA BIBLE – KITAABA WAAQA bible

Yudithi 2

¹Ganna kud'ani saddeeteeso ka hayyuma Nebukadreza guyya diddami lameeso ka jia qara ganna suni, isaafi jari mala isaa d'au qonqo duri lafa nuu kalchu dide haalo baafanna woliini jed'ani taani aka guutani kurfefatani.

²Hayyichi askarti isaa ta mala isaa d'ooftufi jara askarti isaa gugurda wolti yaame, aka lafti sunini isaa kalchu didde nyaapati isa lakifte diideese worrati haasae. Isaafi jari gugurdaani askarti isaaleeni woli galani aka worra woraana keesa isaa kalchu dide ch'ufa hobaasani. Duuba ammalle mala worra sunini hobaasu worrati hime.

⁴Kori buufachu geennaani Nebukadrezani Holofene, ka askarti isaati mata ka guddinnale isati aanu, yaame waan jed'eeni:

⁵Anini Nebukadrezani hayyu gudda lafa ch'ufa fidu, waan sini jed'u, askarti miilani yaatu kuma d'ibbaafi diddama ammalle ta fardale nama kuma kud'ani lama ta ch'ufti nama jajanna filad'i.

⁶Duuba lafa ila adu ta naa kalchu dide d'aqi had'i.

⁷Ammalle waan jettuni biyyeefi bisaanile ta anini boojiu kurfeesa, wonti akanatiifi anini dallansu keesa d'ufe worra aka hama balleesa. Askartini tiyya lafa worraati baafate fulla ch'ufa qabate waan worri qabu ch'ufa saamte boojiti.

⁸Anini balele ch'ufa reefa worratini guute, lagafi galaana ch'ufa reefa worratini balleese reefi worra sunini bisaanile ch'ufa iraani dambalasa.

⁹Anini nama woraani jala bahe ch'ufa qabe boojie haga muumme lafa geesa.

¹⁰Ammo atini Holofene na dura deemi lafa suni ch'ufa had'i dabsad'i qabi nani eegi. Yo worri harka kennate, qabi nani eegi haga anini d'ufe gaargalchuti.

¹¹Ammo yo worri harka kennachu dide worraa naate lubbu imbaasini ch'ufa fit'i lafa dabsatu suni ch'ufa saami.

¹²Anini ya kakhu jabdu lafa tiyyaafi lubbu tiyyaani kakhad'e aka waan jed'e suni guutu male.

¹³Waan anini sini jed'u kana diqole ira ingorini, qaabad'i anini hayyu keeti, waan anini sini jed'u ch'ufa hurisi guuti.

¹⁴Jennaani Holofeneni hayyu bira deeme, jara gugurda askarti abbooti duulatifi jara askarti Ashuriti mata ch'ufa wolti yaame.

¹⁵Akuma hayyichi tolchi isani jed'e kaani, askarti nama kuma d'ibbaafi diddama ta miilani yaatufi askarti nama kuma kud'ani lama ta farda ta t'iyaani woi haatu, ta askartini tunini ch'ufti nama jajanna filate

¹⁶ch'ufa lola kurfeese.

¹⁷Inni ammalle gaalafi hareleefi gaangele heddu miha baatufi loonifi hooliyeefi laleesa heddu woreega qaalatani fud'ate.

¹⁸Askartini ch'ufti worega guddafi qarsifi worqi guddo beese hayyu keesa baasani kennanifi.

¹⁹Jennaani Holofenefi askartini ch'ufti kaate, hayyu Nebukadreza dura dabarte. Gaari fardi hirkisifi askarti fardaani yaatufi askartini miilani yaatuleeni wolti baate lafa ila adu suni haate balleesu d'at'e.

²⁰ Askartini d'ibileeni hedduuni muumme inqamne worra gula yaate; ta aka tuuta awanisatifi maansa lafa gamooji fakaatu ka nami heddu indandeenne.

²¹Worri dira Ninawiti kae deema guyya sadi kara yae diida Beketelethi ka d'aatu gaareeni Kilikiani mirgatini bahe achiti bule.

²²Holofeneni arti bahe, askarti isaa ch'ufa ta miilani yaatufi ta fardaani yaatufi ta gaarini yaatule fud'ate lafa gaareeniti kae iti d'aabate.

²³Inni lafa Pututifi ta Ludi ch'ufa balleese, worra Rasesitifi ka Ishmaeli ka afaani lafa aloo ta gamooji ta lafa worra Ch'elitini bitaha saame balleese.

²⁴Jennaani Holofeneni galaana Frati taake lafa Mesopotamia seene dira naaboni jaarani ka afaani galaana Abroni ch'ufa balleese.

²⁵Lafa Kilikiale had'e nama isati harka kennachu dide ch'ufa fit'e, haga seera lafa bitaha ta Yafethi jed'ani ta d'aatu lafa Arafti d'aqe.

²⁶Inni worra Mediani marse waaro worraa ch'ufa gube hooliye worraa ch'ufa qaqale hobaase.

²⁷Holofeneni diida d'aatu Damaskiti gabue bara dargaye murani oobru ch'ufa gube, reefi looni ch'ufa qaqale dira ch'ufa saamate. Lafa ch'ufa balleese, kaima ch'ufa fit'e.

²⁸Nami d'aatu Baariini Gudda jiru ch'ufti guddo mudame bisaani naqate. Nami dira Tirotifi ka Sidonitifi Suritifi ka Siinatifi ka Jamniatifi ka Ashdoditifi ka Ashkelonileeni naye lubbuuni d'ufte.