Read BORANA BIBLE – KITAABA WAAQA Yudithi 6 Bible Online

Yudithi 6 - BORANA BIBLE – KITAABA WAAQA bible

Yudithi 6

¹Goanti gumi d'aatu kora suni ch'iiftu ch'itte jennaani Holofeneni worra Moabutifi askarti Amoni ta beeseni bitanifi worra afaani Baariini Guddati d'ufe durati, inni Akioroti kae waan jed'e,

²Akioro atini eennu ufi seeta ka teete aka raaga dubbatu? Atini eennu ka teete worra Israeli inhad'ina Waaqi worraa worraa kalcha nuni jettu? Waaqi keenna Nebukadreza nu isa male Waaqa d'ibi imbeennu. Inni duula ufi erge worra Israeli kana lafa tana ira qunqume balleesa jed'e. Waaqi worraaleni dandae worra imbaasu.

³Nu ammo Nebukadreza hojanna, worra Israeli kana yoosu aka waan worri nama toko balleesina. Worri dandae askarti teenna ta fardale initisu;

⁴askartini teenna suni worrati baafate worra balleesiti. Gaareeni d'iiga worra quufte baleleeni reefa worratini guutamti. Eegi nu worra haane worra nami tokoleeni imbau. Tunini dubbi Nebukadrezani abbaani lafa ch'ufa dubbate, dubbini isaa lafati inhaftu.

⁵Akioro atini namaniti, qarale askartuma Amoni ta bitatani, ammalle atini aka nama lafa ufi gurguratu dubbate. Atini deebite na ingartu haga anini d'ufe tissele lafa Misiriti baqate d'ufte tana haalo baafad'uti.

⁶Gaafasi akuma nama heddu fit'ani askartini tiyya si ijeefti.

⁷Amma askartini tiyya si fuute lafa gaareeni si geesite, dira worra Israeli toko keesati si lakifte,

⁸atinileeni achumati biyyaani woliini hobaatani.

⁹Akioro atini maafi akana mudamta? Mala keeti diri kunini dandae ufira na ind'owa? Atini imbeeta aka anini waan jed'u guutu male inteenne!

¹⁰Jennaani Holofeneni jara isaa ka waaro keesa jiru yaame, waan jed'eeni Akioro qaba dira Bethulia geesa harka worra Israeliti kenna.

¹¹Duuba jari sunini Akioro qabe, fulla askartini bultu suni fuud'e baleeti geese, artilee gara gaareeni haga maddo d'aatu dira Bethulia jirtu geese.

¹²Jari dira suni worra gad'ufuti jiru arginaani woraana ufi guuratani oriani fiit'e gaara korani. Nami ch'ufti ka gulubani woi had'u beekhu d'akhaa guurate askarti Holofene janjese gaara olkoru d'owe.

¹³Duuba jari Ashuru kaani hunda gaara ira baqate, Akioro achiti hid'e bira yae, Holofeneti dachae.

¹⁴Eege worri Israeli kaani gaara Bethulia iraa gabunaani Akioro hiikhe diraatini d'ufe, jaarole dira suni,

¹⁵Uzia ilma Mika ka gosa Simionitifi Ch'abrisi ilma Gothomielitifi Sharmisi ilma Melkieli ka worri gaafasi dira suniti matati geese.

¹⁶Jaaroleeni sunini jaarole dira suni ch'ufa wolti yaamte, duuba nad'eenifi d'iirti nami kaimileeni ch'ufti achi d'aqe. Akioro gumi duraani d'umnaani Uziani wogafate.

¹⁷Jennaani Akioroni waan jari Holofene ka lola mariateefi ammalle waan inni worra Ashuru gugurdaani jed'eefi ammalle aka Holofeneni waan gosa Israeli tolchu ufi d'aade, ch'ufa gumiti hime.

¹⁸Biyyiti dubbi suni d'ageennaani jilbiifatte Waaqa kad'atte, waan jette:

¹⁹Ee Aabbo Waaqa gubba, laali aka nyaapi keenna ufi d'aade gumi te ch'eerse! Nu nahi nu qarqaari.

²⁰Jennaani worri Akioro garaa jabeese, waan inni tolcheefi galata deebiseefi ulfeese.

²¹Kori buufannaani Uziani Akioro mana ufitini gale jaarole wolti yaame sagale kenneefi. Halkani suni ch'ufa worri Waaqa Israeli qarqaarsa kad'acha bule.