Read BORANA BIBLE – KITAABA WAAQA Yudithi 8 Bible Online

Yudithi 8 - BORANA BIBLE – KITAABA WAAQA bible

Yudithi 8

¹Gaafasi Yudithini waan Uziani buufate d'ageete, isiini dubra Merari ka ilma Uzi, ka ilma Yusufu, ka ilma Ozieli, ka ilma Elkia, ka ilma Hanania, ka ilma Gideoni, ka ilma Rafaimu, ka ilma Ahitubu, ka ilma Eliabu, ka ilma Nathanieli, ka ilma Samueli, ka ilma Sarasadai, ka ilma Israeli.

²D'iirsi Yudithi ka Manase jed'ani ka worri lachu gosaafi balbala taka bara garbu haamani due.

³Inni ato nama huji tae oobru keesa ojachiisu, owi adu gagabse, gale worra ufi ka Bethuliati sire irati due. Inni doonaani ireesa worra isaani ka Dothanifi Balamoni jiddu jiruti awaalani.

⁴Duuba akasini Yudithini ganna sadifi jia afuri d'iirsa male teete.

⁵ Isiini guddo laalefate mana isii gubbati hoosa jaarate ch'arqi naqate keesa teete.

⁶Isiini bara suni ch'ufa guyya aada gula ufi inagabsine male agabuni teete: Guyyaani ufi inagabsine suni kana: Guyya Sabatoni iti aantufi guyya Sabatotifi, galgala jila batitifi guyya jila sunitifi guyya jila ka worri Israeli tolfatu d'ibile.

⁷Yudithini guddo mid'aadi; d'iirsileeni gaafa due, worqifi qarsifi hojatufi tisseleefi hori monatiifi obrule lakisefi. Isiini waan kana ch'ufa jabeesite,

⁸nami tokoleeni ka hameenna isii dubbatu injiru; wonti akanatiifi isiini nama guddo Waaqa sodaatu.

⁹Yudithini aka worri dira Uzia hammate, maro bisaani d'abanifi garaani hammate taani gungumani d'ageete. Ammalle aka inni gungumsu worraa gula yo guyyaani shani dabre dira suni harka worra Ashuruti kennu d'ageete.

¹⁰Yudithini intala tisse isii toko ta waan isii ch'ufa harkaa qabdu ergite beeni Uziafi Ch'abrisifi Ch'armisifi ka worri sadeeni dira kana mata gayyaami jetteeni.

¹¹Jaaroleeni d'ufnaani, Yudithini waan worraani jette, jaarole Bethulia na ch'aqasa, isani ka arra dubbi akana biyyaani jettani wollaala tolchitani. Isani sila Waaqa durati kakhatani, yo Aabbo Waaqi bulti diqo tanati qarqaarsa nu ergu baate dira keenna harka nyaapati kennina jechu himmalle.

¹²Isani maani ufi seetani ka aka arra taatani kana Waaqa ilaalatani? Isani eennu kana, ka waan nama keesa buutani akasini fulla Waaqati ufi qabdani?

¹³Nami isani teetani akana ilaalatani Aabbo Waaqa guddaniti? Isani haga jirtani woma imbaratani?

¹⁴ Karaani tokoleeni ka isani waan garaa nama keesa jira yokhaani waan inni heregu beetanini injiru. Ammo isani teetani kiyyibdani heregafi qalbi Waaqa imbeenna jettani namati himtani! Isani akami teetani Waaqa ka waan ch'ufa uume waan isaa imbeenna jettani! Hiyo akananiti jaallowani tiyya, Aabbo Waaqa keenna deebitani indallansisina!

¹⁵Yo inni bulti shanani suni keesati nu qarqaaru didele, inni hegeri guyyuma fed'u nu baasa. Yokhaani yo fed'e nyaapa keenna nuti gad'iseeti nu balleesa.

¹⁶Ammo isani Aabbo Waaqa keennani atini akasi tau malte jechu himmalle. Isani isa nama aka keenna seetani? Isani waan isani woldubatani sosobdani irreeni herega isaa gargalchitani seetani?

¹⁷Diqole akasiniti nu sila Waaqa qarqaarsa kad'anne haga inni nu baasuti obsine eegu male. Inni yo fed'e kad'acha teenna nuu d'agaya.

¹⁸Nu Waaqa harkani mid'aasani inkad'annu, gosaafi balbala teennafi diraafi ollowani teennaleeni taka waan akasi intolchine ato ababooti teenna duri waan akasi taatele.

¹⁹Wonti Waaqi harka nyaapa worraati duri worra lakise, nyaapi sunini worra hobaase waan worri qabu ch'ufa ira saamefi suni. Nyaapi sunini gaafasi guddo worra balleese.

²⁰Ammo waan nu Aabbo Waaqa male Waaqa d'ibi inkad'annefi, nu isa abdanna aka inni nuufi nama keenna tokole indinne.

²¹Yo nyaapi dira keenna fud'ate, ardaani Yuda kunini ch'ufti harka worra seene, duuba Mana Waaqa keenna ka Yerusalemu jirule saamani. Duuba maro nu aka nyaapi Mana isaa t'ureesu iti lakimneefi Waaqi nu balleesa.

²²Inni waan nama nu d'aala argannele balleesanifi wollaala nura kaa. Duuba worri nu boojie lafa isaani nu geesu kunini nu tuffate nu goyeesa.

²³Yo nu amma nyaapa keenna kanati harka kennanele mal nu baati worri woma fed'u nu tolcha. Yo nu harka kennanele Aabbo Waaqi keenna nuuma ch'eersa.

²⁴Akasi tau himmalle oboleyaani tiyya, nu sila nama gosa teennati akheekha dansa tau male. Lubbu worraa ch'allaniti ammo wonti Mana Waaqatifi mesa soriole tolchani gubba teenna.

²⁵Aabbo Waaqi keenna akuma duri ababoota teenna ilaalate amma nu ilaalachuti jira, nuleeni gama kennani waan suni jenne galata isaa deebisu male.

²⁶ Aka inni duri Abrahamufi Isaaqo ilaalate, amma waan Yakobooni gaafa ree abuya isaa Labani lafa Mesopotamia keesati tisse tahe qabad'a.

²⁷Waaqi aka jaba duri worra ilaalate suni amma nu ilaalachuti injiru inni haalo nu fuud'e akasini nu gaargalchuti injiru ammo aka nu worra isa kad'atu gorsufi waan kana nu tolcha.

²⁸Jennaani Uziani waan Yudithini jed'e, Dubbini atini jette ch'ufti d'ugaa nami dandae d'ara jed'u injiru.

²⁹Atini arra ch'alla qarooma kanke nu ingarsiimne, ammo haga ijoolluma teetiti asi nuni ch'ufti aka atini woi beetufi ka ammalle heregi kanke ka nama guddaa fakaatu ya agarre.

³⁰Ammo worri keenna d'eebuni hobauti jira. Worri waan nu jenne suni irreeni nu kakhachise, amma nu kakhu suni dandeenne inch'absinu.

³¹Tanaafi amatana waan atini nama guddo Waaqa jaalatu taatefi Waaqa nu kad'ad'i aka Aabbo Waaqi bokayaani nuu d'ufe, eellani teenna nuu guute akanani lubbuuni nuti deebitu.

³²Yudithini waan jetteeni, hayye hatatuti anini amma waan gochiti teenna haga jirtu indeene tolcha.

³³Halkani kana isanini sadeenu fullo dira eega bula. Aka anaafi tissitini tiyya dira kana keesa baane iti d'aabannu. Duuba ato guyyaani isani harka kennanna jettani kaani ingeenne Aabbo Waaqi anaani gosa Israeli baasa.

³⁴Ammo amma waan anini tolchu fed'u na ingaafatina. Gaafa isiini dabarte isaniti hima.

³⁵Uziafi jaaroleeni taani waan isiini jette beeni nagayaani deemi Waaqi si eebisinna, Aabbo Waaqi kara atini nyaapa kanke halooni baafatu si garsiisinna.

³⁶Duuba worri kae hoosa Yudithini mana gubati jaarte kaani keesaa yae eedo ufiti dachae.