Read BORANA BIBLE – KITAABA WAAQA Bahisa 25 Bible Online

Bahisa 25 - BORANA BIBLE – KITAABA WAAQA bible

Bahisa 25

¹AABBO Waaqi waan Musani jed'e,

²Waan atini worra Israelitini jettu, Wo naa baasa; duuba waan nami fed'i ufii gula baasu ch'ufa iraa fuud'i.

³Wonti atini worra iraa fuud'uu malte tana: worqi, qarsi, sibiila diima;

⁴woya booftatiifi dabassa bule, bule diimtu, ammalle diimtu; woya rifeensa reetini mid'aasani;

⁵goga elemiye ka hallu dibani; goga d'iisani; mukha d'adacha;

⁶d'ad'a ifsetiifi fit'o d'ad'a muudati naqanifi ta aka qayya aarsani;

⁷d'akha ch'ululuqafi d'akhaye ch'ululut'u d'ibi, ta woya toko ta qaallichi guddaani keeyatufi ukha isaa ka qomati hod'ani.

⁸Biyyiti ha Waaro Woyyuma naa mid'aasitu, aka anini arti worra keesa tau.

⁹Waaro sunifi miha isii ch'ufa aka anini isani garsiisu gula mid'aasa.

¹⁰Sanduqa mukha d'adachatiini mid'aasa, ka d'eerinni isaa d'und'uma lamafi taaku toko, ballinni isaa d'und'uma tokofi taaku toko, old'eerinnileeni d'und'uma tokofi taaku toko.

¹¹Alaafi garaa isaa keesale ch'ufa worqi qulqullitiini ch'ubusa duucha, ammalle gubba isaale ch'ufa worqiini marsa.

¹²Qube worqi afuri ta baataniini mid'aasa, miila isaa afraaniti gama lachu qube lama naqa.

¹³Kalcho mukha d'adacha ch'ira, nafa isii ch'ufa worqiini duucha.

¹⁴Duuba kalcho suni qube Sanduqa gama gama jirtuti naqa, aka Sanduqa suniini baatani.

¹⁵Kalchooni sunini ha qube Sanduqa suni keesa teetuti, nami keesaa imbaasini.

¹⁶Sanduqa suni keesa d'akha hahafalicha lamaani, ka anini sii kenne, keesa kayi.

¹⁷Qadaada worqi ch'alla mid'aasa, ka d'eerinni isaa d'und'uma lamafi taaku toko, ballinni isaaleeni d'und'uma tokofi taaku toko.

¹⁸Akheekha waan lubbu qabati ka koola, ka worqi tumani, lama mid'aasi, ka qadaada gubba gama gama ejaanju.

¹⁹Akheekhi waan koola ka lubbu qaba suni toko ha gama toko eju, kaani d'ibileeni ha gama kaani eju, qadaadafi waan koola suni ha worqi taka iraa mid'aasaniti.

²⁰Wonti kuni lachu ha koola ballifte qadaada suni gaadiseesite fuula wolti deefatte qadaada ilaaltuti.

²¹Sanduqa suni keesa d'akha hahafalicha kaani kayi, iti qadaadi.

²²Anini artiti d'ufe si arga, ammalle qadaada suni gubbaa, jiddu waan koola kaani lamaaniti, anini seera worra Israeli ch'ufa siti hima.

²³Mesa mukha d'adachatiini mid'aasi, ka d'eerinni isaa d'und'uma lama, ballinni isaa d'und'uma toko, old'eerinni isaaleeni d'und'uma tokofi taaku toko.

²⁴Nafa isaa ch'ufa worqi qulqullitiini duuchi, ammalle worqiini marsi.

²⁵Mukha hafalicha, ka ballinni isaa haga gana harkaa, ka worqiini duuchani, marsiini.

²⁶Qube afuri ta worqi mid'aasiifi, gaafa afraani mesa fulla miili ejaanjuti naqi.

²⁷Qubeeni suni ta kalcho mesaani baatani keesa kayani mukha hafalicha mesaani marsani kaani d'aatu kayuu malani.

²⁸Kalcho mukha d'adacha ka mesaani baatani nafa isii ch'ufa mullachu d'owi, worqiini duuchi.

²⁹Sahani, muduunu, okholeefi d'ameela waan kana ch'ufa worqiini mid'aasi, aka daad'i Waaqaa baasani iti naqani.

³⁰Ammalle hojja ch'ufa qit'a qulqullo mesa ira na dura kayi.

³¹Waan ifseeni ira ejitu worqi qulqullitiini mid'aasi. Jalafi nafa isii worqi tumaniini mid'aasi; daraara fulla daraaraani keesa baqafatufi kalacha isaale worqi takaa iraa tumi mid'aasi.

³²Dameeni jaa, ta gama lachu sadi sadi, ha waan ifseeni suni ira ejitu iraa baatuti.

³³Dameeni jaani sunini ch'ufti daraara woi sadi, ka kalachafi kalacha imbaqafatiini qabu, ha qabaatuti.

³⁴Nafi waan ifseeni ira ejitu suni ha daraara woi afuri, ka kalachafi kalacha imbaqafatiini qabu, ha qabaatu.

³⁵Kalachi imbaqafatiini toko ha dame lamaani wolti ejitu, sadeenu jala jiraatu.

³⁶Kalacha imbaqafatiinifi dameefi waan ifseeni ira ejitu ch'ufa ha worqi taka iraa tumani mid'aasani.

³⁷Waan ifseeni ira ejitu ifse torba mid'aasi, duuba ifse torbaani suni old'ad'aabi, aka isiini fuula durati ifsitu.

³⁸Qad'abe isiitiifi daboola isii worqi qulqullitiini mid'aasi.

³⁹Waan ifseeni ira ejitufi miha isii ch'ufa kilo worqi qulqulliti ta sodomi shanitiini mid'aasi.

⁴⁰Waan kana ch'ufa akheekha gaara gubbaa anini si garsiise iraa ingorini, gula mid'aasi.