Read BORANA BIBLE – KITAABA WAAQA Bahisa 31 Bible Online

Bahisa 31 - BORANA BIBLE – KITAABA WAAQA bible

Bahisa 31

¹AABBO Waaqi waan Musani jed'e,

²Anini yayu Bezaleli, ilma Uri, akhaakhu Huri, ka gosa Yuda, fohad'e

³jabeenna kiyyaani guute. Ammalle anini yayu hubachafi ogumafi qalbi waan harkaani mid'aasanile kenneefi

⁴aka inni dandae waan heddu herege, worqifi qarsi sibiila diimani mid'aasu;

⁵ammalle aka inni d'akha ch'ululuqa ch'ire faaya mid'aasu, aka mukha boch'e ammalle oguma aka heddu ta woini tolchani beekhu.

⁶Ammalle anini yayu Oholiabu, ilma Ahisamaki, ka gosa Dani, fohad'e wahela tolcheefi. Ammalle anini yayu ogeeyi d'ibile qalbi oguma guddo kenneefi, aka worri dandae waan anini, Mid'aasa jed'e ch'ufa mid'aasu:

⁷Waaro Woyyuma, Sanduqa Wold'aqisatiifi qadaada isaa, miha Waaro suni ch'ufa,

⁸mesafi miha isaa woliini, waan ifseeni ira ejitu, ka worqi ch'allaani mid'aasanifi miha isiile ch'ufa, waan mesa fakaata ka hit'aana irati aarsani;

⁹waan mesa fakaata ka sorio irati gubanifi miha isaale, qori guddo bisaani iti d'iqatanifi waan isiini ira ejitule;

¹⁰woya mimid'aadu Harunifi ilmaani isaa hojja huji qaallu hojattu keeyatanifi

¹¹d'ad'a muudatiifi waan urgooftu ta fulla qulqullo mid'aasanile. Hojja worri waan kana ch'ufa mid'aasu, ha akuma anini siti hime kaani gula mid'aasu.

¹²AABBO Waaqi waan Musani jed'e,

¹³Waan atini worra Israelitini jettu, Guyya kiyya ka Sabato jabeesa, wonti akanatiifi guyyaani kunini akheekha jiddu tiyyafi teesani jiru, haga d'aloota keesani ch'ufa, ka aka anini, AABBO Waaqi, isani nama kiyya tolfad'e agarsiisu.

¹⁴Guyya Sabato qaabad'a, guyya oolma tolfad'a, wonti akanatiifi guyyaani kunini guyya qulqullo. Nama aada guyya suni balleese ha ijeesani. Ammalle nama guyya suni huji hojate ha gosa keesaa baasani.

¹⁵ Guyya jaa huji teesani ch'ufa tolfad'a, ammo guyyaani torbeeso guyya Sabato qulqullo, ka AABBO Waaqa keesaniti, oola, nama guyya Sabato suni hojate inijeesani.

¹⁶Tanaafi worri Israeli ha d'aloota worra ch'ufa keesa guyya Sabato qaabate guyya oolma tolfate, akasiini akheekha wold'aqisa garsiisu.

¹⁷ Guyyaani suni akheekha haga jiru jireennati, ka jiddu tiyyafi worra Israeli jiru; wonti akanatiifi anini, AABBO Waaqi, guyya jaa keesati lafafi gubba uume, guyya torbeeso oole hafuura baafad'e.

¹⁸Eegi Waaqi gaara Sinai irati dubbi Musani jed'e ch'ufa buufate, inni d'akha hafalicha ka inni harka ufitiini seera irati t'aafe kaani iti kenne.