Read BORANA BIBLE – KITAABA WAAQA Aayubu 33 Bible Online

Aayubu 33 - BORANA BIBLE – KITAABA WAAQA bible

Aayubu 33

¹Ayubu amma waan anini jed'u ch'ufa, aka dansa ch'aqasi,

²anini diquma wo indubbanne dubbini araba ira na teteeti.

³Anini garaa tokooni dubbad'a, dubbini tiyya ch'ufti ta d'ugaati.

⁴Lubbuuni Waaqa na uumte, hafuuri Waaqa gudda jireenna naa kenne.

⁵Yo dandeete dubbi naa deebisi, waan jechu feetu kurfefad'i.

⁶Anaafi sii Waaqa durati haguma taka, nuu lachu biyye ira mid'aasani,

⁷tanaafi wonti atini na sodaatufi injirtu; anini si indabsad'u.

⁸Dubbini atini jette ta anini d'agaye tana:

⁹Anini qulqullo, woma iyyakine, ch'ubbule inqabu.

¹⁰Ammo Waaqi nyaapa nati tahe, kara naani had'u nati barbaada.

¹¹ Inni miila kiyya sansalatani hid'e, ejata kiyya ch'ufa keesa na eega, jetta.

¹²Ammo anini waan sini jed'u, Atini ya wollaalte, Waaqi nama ch'ufa ira jira.

¹³Atini maanifi teete Waaqaani, Dubbi nama ind'ageetu jetta?

¹⁴Ato Waaqi kara hedduuni dubbatele, nami waan inni jed'u inch'aqasu.

¹⁵Halkani hojja nami rafu Waaqi oobjufi daayya keesa namaani dubbata.

¹⁶Inni gurra nama bane gorsaani nama mudamsiisa.

¹⁷Wonti inni worraani dubbatufi, aka worri daba iraa gore kiyyiba lakisu.

¹⁸Inni worra badi d'owe, duisa hanqisa.

¹⁹Waaqi nama d'ukuba iti erge nafa d'ukubse, akasiini qajeelcha.

²⁰Duuba nami suni sagale jibba, sagaleeni dansaleeni iti imioftu.

²¹Nafa isaa ch'ufa fooni ira d'umatani, lafeeni isaa diidati gayaati;

²²inni ya fulla ekhera deemu gahe.

²³Hegeri malaikaani d'ufte isa qarqaarti — malaikaani toko ta gumi malaika Waaqa, ta kara dansaati nama qajeelchitu.

²⁴Maro naasutifi malaikaani waan jettu, Isa gad'iisi, isa fulla ekherati gabu d'owi. Anini ya waan isaani baasu arge, kuno tana.

²⁵Nafi isaa deebie fooni baase jabaate kaima taha;

²⁶hojja inni Waaqa kad'atu inni isaa d'agaya; inni Waaqa arge gammade, Waaqileeni kara d'ugaati isa deebisa.

²⁷Duuba inni biyya dura d'ufe waan jed'u, Anini ya daba tolche, waan hamtu tahe, ammo Waaqi na baase.

²⁸Inni fulla ekhera d'aqu na d'owe, tanaafi anini amma jira.

²⁹Waaqi waan kana maro lamafi sadi fa tolcha;

³⁰inni lubbu nama duu baase, ifsa jireenna kennaafi.

³¹Amma, Ayubu, dubbi tiyya ch'aqasi; ch'allisi, waan anini jed'u d'agayi.

³²Ammo yo waan jettu qabaate jed'i; yo atini d'uga dubbate sii d'ugeesa.

³³Ammo yo waan jettu qabaachu baate, ch'allisi, na ch'aqasi, anati qarooma si barsiisa.