Read BORANA BIBLE – KITAABA WAAQA Aayubu 9 Bible Online

Aayubu 9 - BORANA BIBLE – KITAABA WAAQA bible

Aayubu 9

¹Jennaani Ayubuni waan jed'eeni:

² Ee, anini waan kana ch'ufa qara d'agaye, ammo nami akami dandae Waaqa durati d'uga qaba?

³Nami akami dandae Waaqaani woi morma? Inni dandae waan heddu muumme inqamne nama gaafata, ammo nami dandae waan isii inhimu.

⁴Waaqi guddo qaroomafi jabeenna qaba, Eenuti dandae isa dura eje, isaani wo morma?

⁵Akanumati, ka gaari woma quba inqamne, buqise, dallansu ufiitini balleesa.

⁶Waaqi lafa chochoose, utuba isii olqabu roraasa.

⁷Inni dandae adu bahu d'owe, urjile halkani ifsuu d'owa.

⁸Isumati gubba ballise goorjama baariinile ira ejaanjata.

⁹ Waaqi urji gubba torbaanifi arba gaadufi buusaanifi lamile mid'aase.

¹⁰Nu waan mama jabdu inni tolchu dandeenne inhubannu waan mama heddu ka henna inqamne.

¹¹Waaqa, ato inni na bira baheele anini dandae inargu, ato inni na d'aatu deemele anini dandae inhubad'u.

¹²Inni woma fed'u fud'ata, nami dandae ind'owu; nami tokoleeni ka, Atini maani tolchita? jed'uuni injiru.

¹³Waaqi dallansu isaa ingalfatu; inni nyaapa ufii ka Rahabu, gorjama baariini ka Waaqaani morku qarqaaru, inch'arasa.

¹⁴Tanaafi anini akami dandae Waaqaani wo morma?

¹⁵Ato anini woma yakule baad'e anini woma tokole afaani isaa keesaa indeebisu, yo jaallaba dubbi tiyya qoru wo kad'ad'u male.

¹⁶Ammo ato akasile taate, yo inni Dubbad'i naani jed'ele waan inni na jalaa qabu insehu.

¹⁷Inni bubbe akanumati na d'oofte na dirmameesitu nati erga.

¹⁸Inni hafuura na imbaafachisu, ammo jireenna nati yaka.

¹⁹Yo waan irree taate, irreeni tama isaati! Yo waan qorsuma taate, eenuti qorsumati isa yaama?

²⁰Ato anini nama ch'ubbu inqamne taatele, afaani kiyyati na balleesa; yo anini wollaala qabaachu bad'ele dubbuma tiyyati wollaala keesa na buusa.

²¹Ato anini wollaala qabaachule baad'e, anini amma woma iyyaalu, ya ufi jibbaad'e.

²²Wonti ch'ufti woma takaa; tanaafi anini, inni ch'ubbichafi ka ch'ubbu inqamnele imballeesa jed'a.

²³Yo nami d'uga maro tokotu duu Waaqi nama suni goyeese kobla.

²⁴Waaqi lafa harka worra ch'ubbuti kenne nama wo qoru ch'ufa balla tolche. Yo isa intahiini eenuti tolche re?

²⁵Guyyaani kiyya yoosu dabra ka sunileeni dansa intahiini, akanumati barise iti d'aabata.

²⁶Inni aka hobolo illaaduuni mid'aasani utaale dabre akuma risa wo butu barisa.

²⁷Yo anini, gaargala kiyya ded'e koble tabad'a jed'u,

²⁸gaargali kiyya deebie na mudamsiisa; wonti akanatiifi siti ch'ubbu nati herega.

²⁹Eegi ch'ubbu nati murani, anini maanifi tae ufi gaargalcha.

³⁰Ato anini saabunaleeni ufi d'iqe harka kiyyale qulqulleese,

³¹atini boola huura keesa na buufta tanaafi woyaani tiyyaleeni na t'ureefatti.

³²Yo Waaqi nama taate, anini sila dandae wo jed'aani; nu sila gaadisa kora woliini d'anne jaaroleeti woli himanna.

³³Ammo nami jiddu teenna eje gargari nu d'owu injiru, yokhaani nami anaafi Waaqa wolti qoru injiru.

³⁴Ee Waaqa, ule naani d'aantu tana naraa fuud'i! Mudamsu tante tana naraa balleesi.

³⁵Anini amma woma insodaad'u, indubbad'a, wonti akanatiifi onne tiyya haga beekha.