Read BORANA BIBLE – KITAABA WAAQA Faaru 107 Bible Online

Faaru 107 - BORANA BIBLE – KITAABA WAAQA bible

Faaru 107

¹ AABBO Waaqa galata deebisa maro inni dansatiifi: jaalalti isaa haguma jirtu ind'umatu!

²Isani ka AABBO Waaqi baase, dubbi tanaani isaa faarsa.

³Inni harka nyaapa keesani keesaa isani baase. Lafa nyaapa keesa isani deebise ilaborutiifi ila adutii mirgaafi bitaa woltiini isani d'ufe.

⁴Nami gari lafa aloo, ta kara inqamne, keesa mare dira iti qubatu fulla wollaale,

⁵beelae d'eebote ufi jibbaate.

⁶Jennaani worri gaargala ufii keesati AABBO Waaqati bohe, inni gaargala suni keesaa worra baase.

⁷Kara qajeela garsiise, dira worri iti qubatuuni worra gahe.

⁸Worri AABBO Waaqa maro jaalala isaa ta ind'umanneetiifi waan mama ka inni worra tolchele galata deebisuu male.

⁹Inni nama d'eebu qabu d'eebu baase, ka beela qabule beela baase quubse.

¹⁰Nami gari dukanae, dukana keesa taa, worri nama hid'aansa keesa jiru ka sansalatani hid'ani fakaata.

¹¹Maro dubbi Waaqa dide, mala Waaqi guddaani worra d'ae tufate, gula deemu dideefi,

¹²worra ya hujiini hamtuuni ijeefte; worri ya qarqaarsa d'abe jijige.

¹³Jennaani worri gaargala ufii keesati AABBO Waaqati bohe, inni gaargala suni keesaa worra baase.

¹⁴Inni gaargala dukana kaani keesaa worra baase, sansalata worraani hid'anile ch'ach'abse.

¹⁵Worri AABBO Waaqa maro jaalala isaa ta ind'umanneetiifi waan mama ka inni worraa tolchele galata deebisuu male.

¹⁶Inni balabala sibiila diimani mid'aasani ch'ach'abse, sibiila gargari kute.

¹⁷Worri ka gari daalle tanaafi maro dabaafi ch'ubbu ufiitiifi gaargali qabata:

¹⁸worri sagalele agarta jibbe, diquma lubbuuni keesaa imbahini.

¹⁹Jennaani worri gaargala ufii keesati AABBO Waaqati bohe, inni gaargala suni keesaa worra baase.

²⁰Inni dubbi ufiitini worra fayyise, boola duaa keesaa worra baase.

²¹Worri AABBO Waaqa maro jaalala isaa ta ind'umanneetiifi waan mama ka inni worraa tolchele galata deebisuu male.

²²Worri sorio baase galata isaa deebise, gammade, sirba keesa waan inni tolche ch'ufa himuu male.

²³Nami gari hobolo duudde, baariini keesa deeme daldala tolche, akanaani waan nyaate d'ugu argate.

²⁴Worri waan AABBO Waaqi tolchufi waan mama ka inni baariini gubbati tolchu arge.

²⁵Inni dubbannaani bubbeeni guddooni gad'ufte, d'awa galaana chochoofte.

²⁶Duuba bubbeeni sunini hobolo olfuute, bisaani keesati olch'ech'esifte. Gaargala suni keesati jari sunini mumudame,

²⁷gugufate, aka nama farso d'uge dadaaqe, ufi jibbaate waan tahuu d'abe.

²⁸Jennaani gaargala ufii keesati worri AABBO Waaqati bohe, inni gaargala suni keesaa worra baase.

²⁹Inni bubbe jabdu taani ch'allisise, d'awani galaanaleeni d'au lakifte,

³⁰Worri maro bubbeeni sunini ch'allifteefi gammade, innileeni fulla worri deemu fed'uuni worra gahe.

³¹Worri AABBO Waaqa maro jaalala isaa ta ind'umanneetiifi waan mama ka inni worraa tolchele galata deebisuu male.

³²Worri guddinna isaa gumi keesati odeese, kora jaarole keesaleti isaa faarsuu male.

³³AABBO Waaqi galaana gogose, maddale yau d'owe.

³⁴Inni maro ch'ubbu worra achi tautiifi lafa biyye dansa garagalche, lafa aloo ta soodda ch'alla tolche.

³⁵Inni laafa gamooji garagalche lafa bisaani tolche lafa gogoddule madda burqitu tolche.

³⁶Inni nama beela qabu achi quubsise, jennaani worri dira iti galu jaarate.

³⁷Worri oobru fach'aase, zabibu oobre, mid'aani guddo iraa mure galfate.

³⁸Inni worra eebise daraarse, hori worraale diqaachu d'owe.

³⁹Gaafa gumi Waaqaa dabsani gaargalchani akanaani dabsatani ch'eersani.

⁴⁰Inni worra worra dabse suni tufate, lafa aloo ta kara inqamne ke marse.

⁴¹Ammo inni nama d'ipu qabu d'ipu suni keesaa baase, worra isaani daraarse, aka ree lafa ira dabarse.

⁴²Nami d'ugaa qajeelani waan kana arginaani gammada, ammo nama ch'ubbuu ch'ufa afaani qabachiisani.

⁴³Nami qarooni ha waan kana herege, jaalala AABBO Waaqa ta ind'umanne hubatuti.