Read BORANA BIBLE – KITAABA WAAQA Faaru 144 Bible Online

Faaru 144 - BORANA BIBLE – KITAABA WAAQA bible

Faaru 144

¹AABBO Waaqa, siida anini iti d'eed'u, ha faarsani! Inni waan woraana na barsiise had'iisa na kurfeesa.

²Inni siida kiyya, ka anini iti baqad'u, nami na d'osse na baase wonte naa tahe isuma. Inni gosa d'ibi harka kiyyati kenne na jalati bulcha.

³Ee AABBO Waaqa, nami maani, ka atini waan isaa yaaltu? Inni maani keesa jira, ka atini waan isaa hereddu?

⁴Inni akuma qileesa jira, guyyaani isaleeni akuma gaandidu dabra.

⁵Ee AABBO Waaqa, gubba gargari tarsaasi, gadi bui; gaareeni tuqi, aara keesaa yaasi.

⁶Angaasu gadi ergi, nyaapa kanke gargari firfirsi; t'iya tante darbad'i, worra baqachisi.

⁷Harka kanke gubba ga d'eerefad'i, bisaani qile keesaa na hirkisi, na baasi,

⁸harka nyaapa, hojja ch'ufa d'ara dubbate, hojja kakhachiisanile kiyyiba dubbatu jalaa na baasi.

⁹Ee Waaqa anini sirba haareesa sii sirbe kiraari d'ae si faarsa.

¹⁰Atini hayyoota dabsachifte hojattu tante Daudi baafta.

¹¹Woraana hama duraa na baasi; harka nyaapa hojja ch'ufa d'ara dubbatu, ka hojja kakhachiisanile kiyyiba dubbatu, jalaa na baasi.

¹²Ilmaani teenna ta d'iira ha kaimoma ufi keesa mukha bahe jabaatu taatu. Ilmaani teenna ta dubraleeni ha utuba mana hayyu jala d'ad'aabani taatu.

¹³Kod'ooni teenna ha mid'aani gosa ch'ufatini guutamtu. Hooliyeeni teennaleeni ha horte lafa ira dabartu.

¹⁴Looni keennaleeni ka insaleesine yokhaani ka keesaa indoone ha horani lafa ira dabrani. Gaargala bohaa ha kara dira keenna keesa d'abaniti.

¹⁵Ayyaana gosa eeba akana tana qabduuti; ayyaana gumi AABBO Waaqa, Waaqa tolfatuti!