Read BORANA BIBLE – KITAABA WAAQA Faaru 147 Bible Online

Faaru 147 - BORANA BIBLE – KITAABA WAAQA bible

Faaru 147

¹AABBO Waaqa faarsa! Aki Waaqa keenna faarsani guddo dansa: faaruni isaa waan dansa ta nami hojja ch'ufa d'aachu male.

²AABBO Waaqi Yerusalemu ta qara bade jaare, worra Israeli ka boojiani lafa d'ibi geesani iti deebisa.

³Inni nama ufi jibbaate garaa hamaate fayyise, mada worrale hid'a.

⁴Inni urji ch'ufa hede isi ch'ufa maqa isiitiini yaama.

⁵AABBOONI keenna guddinnaafi jabeenna qaba; qalbi isaa dandaani haga imbeekhani.

⁶Inni nama ufi inguddimne kaase, ammo ch'ubbicha lafa buuse balleesa.

⁷AABBO Waaqaa sirba, galata deebisaafi, kiraari d'aa, Waaqa keenna faarsa.

⁸Inni dumansa gubbati guure, bokaya lafati roobe buuyo gaareeni gubbati baasa.

⁹Inni sagale horii kenne, ilmaani haranqeesale, hojja isiini isaa kad'atu, nyaachisa.

¹⁰Inni jabeenna fardati ingammadu, yokhaani humniti namaa isa ingammachiiftu,

¹¹ammo nama isa sodaate, jaalala isa ta ind'umanne abdatuti isa gammachiisa.

¹²Ee Yerusalemu AABBO Waaqa faarsi, ee Sioni Waaqa kanke faarsi!

¹³Inni naqato balbala tanteeti jabeese gumi tanteetile eebisa.

¹⁴Inni seera lafa teeti nagaya tolche, dargaye dansaani si quubsa.

¹⁵Inni lafati dubbate, dubbi isaa suni yoosu tolchani.

¹⁶Inni qabana aka woya lafati uyise, ebele qabanooftu aka daara lafati firfirsa.

¹⁷Inni bokaya d'akhaani roobu aka ch'abbi lafati buusa; nami tokoleeni qabana isaa suni inoobsu!

¹⁸Duuba inni dubbannaani qabanti sunini ch'ufti badde; ammalle bubbe erge bisaani gayaasa.

¹⁹Inni dubbi ufi gumi isaati erge barsiisa isaatiifi seera isaa worra Israelitii kenna.

²⁰Inni waan kana gosa d'ibii intolchine, wonti akanatiifi isiini seera isaa imbeetu, AABBO Waaqa faarsa!