Read BORANA BIBLE – KITAABA WAAQA Faaru 18 Bible Online

Faaru 18 - BORANA BIBLE – KITAABA WAAQA bible

Faaru 18

¹Ee AABBO Waaqa, atini irre tiyya anini akami si jaalad'a!

²AABBO Waaqi d'akha kiyya, siida jaba ka anini jalati d'okhad'u. Waaqi kiyya siida kiyya, ka anini jalati d'eed'u. Inni wonte tiyya, na qorqorate na baasa.

³Anini AABBO Waaqa yaamad'a, inni harka nyaapa kiyya keesaa na baasa. AABBO Waaqa ha faarsani!

⁴Gaargali dua na marse, dooti aka bisaani nati fach'aate na liqimsite.

⁵Haadi dua lubbuti na marate, irreesileeni t'urura isaa naa hid'e.

⁶Gaargala kiyya keesa anini AABBO Waaqa yaamad'e, na qarqaari jed'eeni, Mana isaa keesa inni qonqo tiyya d'agaye, iyyanti tiyya isaani baate.

⁷Jennaani lafti holate chochote waan Waaqi dallaneefi. Gaareenile yayabi rorae chochoe!

⁸Aari funnaani keesaa yae, ibida woi gube balleesuufi ch'ileeni bobeetu afaani keesaa yaate.

⁹Inni gubba gargari tarsaase, dumansa guraacha miila ufii jala kaye gadi bue.

¹⁰Inni waan koolatiini gubbaa barise d'ufe, koola bubbe guba deeme.

¹¹Inni dukana uyifate dumansa bokayaatini ufi mare.

¹²Bokaya d'akhaani roobufi ibidi bibiliqu angaasu isa dura jirtu keesaa bahe, dumansa guraacha keesa dabre.

¹³Jennaani AABBO Waaqi gubbaa mandie, qonqo Waaqa gudda d'agayani.

¹⁴Inni t'iya ufii darbate, nyaapa isaa gargari firfirse, angaasu isaatini worra ufi dura gusse.

¹⁵Bisaani baariini fooqatani, biyyeeni godduuni mullatte yayabi lafaleeni diidati bahe, gaafa atini, ee AABBO Waaqa, nyaapa kanke dallansuuni lolte iti mandite.

¹⁶AABBO Waaqi gajed'e, harka na qabe, d'immu bisaani keesaa na fuud'e.

¹⁷Inni harka nyaapa kiyya jajaba keesaa na baase, nama na jibbufi ka nara irre qabule.

¹⁸Gaafa anini d'iba keesa jiru nyaapi na had'e, ammo AABBO Waaqi naraa d'owe.

¹⁹Inni gaargala keesa na qarqaare, na jaalate lubbu na baase.

²⁰AABBO Waaqi waan anini d'uga tolchufi na qarqaare, waan anini ch'ubbu inqamneefi na eebisa.

²¹Anini Seera AABBO Waaqa ya guute, taka kara isaa iraa ingorre.

²²Anini seera isaa ch'ufa ya jabeese, aada isaa tokole illakimne.

²³Anini isa durati qulqullo, waan hamtu ch'ufa ya ufi hanqise.

²⁴Duuba waan anini waan d'uga tolchufi inni na eebisa, waan anini isa durati ch'ubbu inqamneeni.

²⁵Ee AABBO Waaqa, atini amanti nama si amanu, ammalle nama siti inch'ubbamne atini iti inch'ubbamtu.

²⁶Nama qulqullo atini iti qulqullo, ammo nama hama nyaapa iti taata.

²⁷Nama ufi insaane baafte, nama ufi saadu lafa buufta,

²⁸Ee AABBO Waaqa, atini ifsa naa kennite, dukana naraa balleesita.

²⁹Atini humna anini nyaapa kiyyaani had'uufi irre anini dalla nyaapa kiyyatiini kurupad'ule naa kennita.

³⁰Waaqa kana karaani isaa akami qajeela, dubbi isaa akami d'ugefachu malani! Inni nama isaati d'iaatu wonte tahafi.

³¹AABBO male Waaqi d'ibiini injira? Isa male siida jalati d'okhannu d'ibi inqamna?

³²Nami irre naa tahu isuma, isumati kara naa hara.

³³Inni aka habroble miila na sablise, gaara gubbati na tisse.

³⁴Inni harka kiyya huji woraana barsiise, aka anini t'iyaani woi had'u.

³⁵Ee AABBO Waaqa, atini wonte naa taate na baafte, harki kanke mirgichi na jabeese irreeni tanteeleni na qorqorate.

³⁶Atini kara naa balifte, miila kiyya gufachu d'owarte.

³⁷Anini nyaapa kiyya reebe dabsad'a, haga balleesuti yaala imbahu.

³⁸Anini worra d'ae buuse lafaa kau d'owe worri jige miila kiyya jala ch'isa.

³⁹Atini humna woraana naa kennite nyaapa kiyya naa dabsachiifta.

⁴⁰Atini nyaapa kiyya na dura baqachifte, aninileeni nama na jibbu balleesa,

⁴¹worri qarqaarsa barbaade ammo nama worra baasu d'aba. Worri AABBO Waaqa yaamate ammo inni worra jala dide.

⁴²Anini worra daakhe bulleese, biyye bubbeeni fuutu tolcha. Ammalle aka d'oqe kara keesati ira sirba.

⁴³Atini worra kiyya ka nati gamu duraa na baafte, finna gosa d'ibi ch'ufa harka kiyyati deebifta. Worra duri anini imbeenneleeni amma na jalati bula.

⁴⁴Sidiini d'ibileeni na durati jilbifatte, qonqo tiyya d'ageennaani na ch'aqafti.

⁴⁵Worri nahe holate, fulla jajabdu keesati d'okhatele gayaae.

⁴⁶AABBOONI Waaqa jiru! Siida kiyya ha faarsani! Waaqa na baasu guddinna isaa odeesa.

⁴⁷Inni nyaapa kiyya na dabsachiise, sidi d'ibi na jalati bulche,

⁴⁸nyaapa kiyya jalaa na baase. Ee AABBO Waaqa, atini nyaapa kiyya na dabsachiifte worra hamama jalaa na baafte.

⁴⁹Tanaafi anini gosa ch'ufa keesati si faarse, maqa kanke guddisa.

⁵⁰Waaqi dabsacha guddo hayyu isaati kenna, ammalle nama fohate muude haga jiru ch'ufa jaalata, Daudifi d'aloota isaa ch'ufa.