Read BORANA BIBLE – KITAABA WAAQA Faaru 50 Bible Online

Faaru 50 - BORANA BIBLE – KITAABA WAAQA bible

Faaru 50

¹AABBO Waaqi guddaani dubbate, lafa ch'ufa ilaborutiifi ila adule yaame.

²Waaqi dira Sioni, ka guddo mid'aagu keesa ifsa.

³Waaqi keenna d'ufuu jira, hojja d'ufele afaani inqabatu; ibida bobae balaliuti isaa dura jira, bubbeeni guddooni isaa d'aatu jirti.

⁴Inni gubbafi lafale yaame, koota, d'uga naa taha, anini dubbi gumi tiyya qora jed'aani.

⁵Ammalle waan inni jed'u, gumi tiyya, ta na d'ugeefatu, wolti na baasa, worra sorio na baase wold'aqisa na woliini tolfate.

⁶Gubbaani aka Waaqi d'ugaatifi aka nami dubbi namaa qoru isaa, odeesiti.

⁷Gumi tiyya, na ch'aqasa, anini woi jechu fed'a, ee worra Israeli, anini isani himad'a, anini Waaqa, Waaqa keesani.

⁸Anini maro sorio teesanitiifi waan isani gubdani naa baaftanifi ya wollaaltani isaniini injed'u.

⁹Ammo taatule, koromi moona teesanitiifi laleesa moona teesanile anini woma ira inqabu;

¹⁰wonti akanatiifi bineensi baddati gallu ch'ufti kiyyuma, horiini gaareeni heddu gubba jiruleeni ch'ufti kiyyuma.

¹¹Allaatiini ch'ufti tiyyuma, wonti lubbu qaba, ka lafa keesa jira, ch'ufti kiyyuma.

¹²Anini hojja beelae isaniti inhimu; wonti akanatiifi lafafi wonti keesa jira ch'ufti tiyyuma.

¹³Anini fooni kormaa inyaad'a? Yokhaani d'iiga laleesa ind'uga?

¹⁴Sorioni isani Waaqaa baaftani ha galata isani isaa deebiftani ch'alla taatuti; waan imbaamnaafi jettani ch'ufa Waaqa gudda baasa.

¹⁵Hojja gaargali isaniti d'ufu, na yaamad'a; anini d'ufe, isani baase, isanileeni na faarsitani.

¹⁶Ammo Waaqi waan worra ch'ubbutiini jed'u, Isani maafi seera kiyya himtani? Isani maafi waan wold'aqisa kiyya dubbatani?

¹⁷Isani gorsa kiyya diddani, seera kiyyale ch'absitani.

¹⁸Isani nama woi hatu ka agartani ch'ufa, jaala tolfatani, nama nad'eeni biyyaa gula dedeemu ch'ufa, wahela tolfatani.

¹⁹Isani guyya ch'ufa waan hamtu dubbatani, d'arale guyya tokole iraa ingortani.

²⁰Isani oboleyaani teesanile himatani, hameenna worraale dubbatani.

²¹Gaafa isani waan kana ch'ufa taatani anini afaani qabad'e, jennaani isani waan anini aka keesani jiru na seetani. Ammo ammatana anini isani gorse, dubbi tana ch'ufa diideese isanii mullisa.

²²Isani ka na deetani dubbi tana ch'aqasa, yokhaani anini isani balleesa, nami tokoleeni ka isani baasu injiru.

²³Galata deebisitiini sorio nani guddisani; aninileeni nama naa saalfatu ch'ufa imbaasa.