Read BORANA BIBLE – KITAABA WAAQA Mammaasa 20 Bible Online

Mammaasa 20 - BORANA BIBLE – KITAABA WAAQA bible

Mammaasa 20

¹Nami farso d'uge machau daalle, inni d'uge namaani woldide ufi balleesa.

²Dallansuuni hayyuu itansu nyeench'a fakaati, nami isaa dallansiisu seeruma nama ufi ijeese.

³Daalleeni yoosu namaani woldiddi, ammo nami waan akasi iraa fagaatu nama ch'eera foko qabu.

⁴Nami oobru qabu, ka hojja fach'aasa oobru inqotanne, gaafa mid'aani murtani woma inargatu.

⁵Heregi namaa aka eela qile, ka bisaani isa gafago jirani, jira, ammo nami wo beekhu dandae herega suni diidati gabaasa.

⁶Nami hedduuni dansumafi balchuma ufi saada, ammo nama dansumafi balchuma qabu aka tabaati lafa keesati inargani?

⁷Nami d'ugaa qajeelani wollaala intolchu, ilmaani isaaleeni takaa tana eeba argatti.

⁸Hayyuuni, yo tae dubbi qoru, waan hamtufi dansale gargari baasa.

⁹Eenuti dandae, Anini ch'ubbu inqabu, garaani kiyyaleeni qulqullo jed'a?

¹⁰AABBO Waaqi nama waan biimu keesa, miisanafi d'und'umani nama dabsu, injibba.

¹¹Ijoollele woma isiini hojattuuni adaba isii hamafi dansale beekhani.

¹²Gurra woini d'agayanifi ila woini arganile AABBO Waaqati namaa kenne.

¹³Yo hiriba ch'alla jaalatte inhiyyoomata; kai wo hojad'i, waan nyaate d'uddu argata.

¹⁴Nami woi gati had'u jiru, nama iraa bitu jiruni tae, gatini hamtu jed'aani, ammo eegi bitate bira deeme, kiyyibe, lafuma fud'ad'e jed'a.

¹⁵Nami waan jechu jiru hubatu waan worqifi d'akha ch'ululuqa ira jira qaba.

¹⁶Nama daallae nama fuula imbeenne, Anati gati tante sii baasa jed'u, hori isaa haga inni gati suni baasuti qabdo ira qabu malani.

¹⁷Sagaleeni atini kara dabaatini argattu yo atini nyaachu jirtu siti mioofti, ammo eege had'aa siti taati.

¹⁸Gorsa fud'ad'i woini baata; mala male, woraana fud'atte duula indeemini.

¹⁹Nami dubbini keesa inteenne, dandae woma ind'ossu; nama suni iti ind'iaatini iraa fagaad'i.

²⁰Nama abbaafi haad'a ufi abaaru lubbuuni isaa akuma ifse dukana keesati d'aamfani d'aamti.

²¹Horini atini kara laafaani argate hori intahu.

²²Anini haalo ufumaani baafad'a injed'ini, AABBUMA Waaqati ufi lakisi, ha inni si qarqaaruti.

²³AABBO Waaqi nama miisanafi kilo woini biimu keesa nama dabsu diqole infed'u.

²⁴AABBO Waaqati ejjata nama qajeelcha, nami akami dandae kara ufi beekha re?

²⁵Herega male Waaqaa wo baasa injed'ini, hegeri hanqatte ufii gaabita.

²⁶Hayyuuni qarooni nama waan hamtu tolchu barbaade naasu male gaargalcha.

²⁷AABBO Waaqi qalbiifi herega nuu kenne; nu dandeenne nafa keenna wa ind'ofannu.

²⁸Hayyuuni yo d'ugaafi qajeelumafi jaalala ch'allaani nama mohatu ch'alla lafa moha.

²⁹Dansumti kaima, jabeenna isaati, mid'aagumti jaarsa, arri isaati.

³⁰Hojja gari, gaargalani male, heregi namaa injijiramu.