Read BORANA BIBLE – KITAABA WAAQA Mammaasa 30 Bible Online

Mammaasa 30 - BORANA BIBLE – KITAABA WAAQA bible

Mammaasa 30

¹Tunini jecha Aguri, ilma Yakati: Waaqi ya na lakise! Anini qarqaarsa womatu inqabu.

²Anini akuma bineensa jira namomitini na keesati inhamne.

³Anini qarooma womatu inqabu, Waaqa qulqulloole waan isaa imbeekhu.

⁴Eenuti taka gara Waaqa d'aqe ga deebie? Eenuti taka bubbe harka ufitini qabe? Eenuti taka woya ufitini bisaani hid'e? Eenuti taka daari lafaa mid'aase? Nama suni maqa isaatiifi ka ilma isa beeta?

⁵Waaqi jecha isa ch'ufa inuma guuta. Inni nama isati baqatu ch'ufa wonte tahe baasa.

⁶Yo atini waan Waaqi injed'ini, Waaqati jed'e jette, inni kiyyiba kanke diidati baasa.

⁷Ee AABBO Waaqa ato indoone waan lama si kad'ad'a, waan suni na ind'owatini:

⁸Kiyyibu na d'owi, ammalle dureesafi hiyyeesale tahu na d'owi, ammo woma anini nyaad'e d'ugu ch'alla naa kenni.

⁹Yo anini dureesa tahe hegeri, AABBO Waaqi eenu fa? jed'e si mormad'a, yo hiyyeesa tahele hegeri woifa hate maqa hama sitiini d'ufa.

¹⁰Nama namaa hojatu nama inni hojatufi d'at'e hameenna isaa dubbate akasiini iyyakini. Yo akasi taate abaarsa argatte gaargala fa keesa seenta.

¹¹Nama gariti jira, ka abba ufi abaare haad'a ufiiti ineebimne.

¹²Nami garileeni ka nama dansa ufi sehu, haga nami gorticha ch'ufa gorticha.

¹³Ammalle nama gariti jira, ka aka male ufi saade nama dansa ufi sehu!

¹⁴Nami garileeni hiyyeesafi hiyyeeti dabse nyaate fit'e akasiini bula.

¹⁵Ulanulti afaani gama lachu qabdi, lachu kenni jed'ani, d'iiga hori t'uut'ani. Waan afuriti jira ka haguma jirtu woi inquumne.

¹⁶Boola ekhera, niiti maseena, lafa godde bokaya d'abde, ibida lafa gubu.

¹⁷Nama abba ufi goyeese haad'a ufi gaafa isiini jaarte tufatu ha ruumichi fooni isaa nyaate, haranqasileeni ila keesa guuratuti.

¹⁸Waan afuriti jira, ka aka male na mamsiise anini waan isii hubachu dad'abe;

¹⁹risa waaqa gubba barisu, bofa d'akhaa ira lohu, hobolo baariini keesa deemtu, jaalala d'iirafi nad'eeni woli jaalatu.

²⁰Wonti niitiini gortitini taatu tana. Isiini nama d'ibiini rafte, duuba eege bisaani d'iqate waan jettu, Anini woma iyakine ch'ubbu womatu inqabu!

²¹Waan afuriti jira, ka laftileeni dandeete waan isaani iniobsine.

²²Tisse hayyu taate, daalle sagaleeni ira dabarte,

²³intala hamtu baddu badati jaarte, eege d'iirsa argete, intala hojattu ta haad'a mana worraa baafte.

²⁴Bineensa t'ut'unicha afuriti, ka aka male wo beekhu, lafa keesa jira.

²⁵T'ut'i, isiini laaftu, ammo guyya bona ch'ufa sagale gaafa rooba nyaatu olkeyatti.

²⁶Osile: isiileeni irre inqabdu, ammo d'akha keesati mana tolfatti.

²⁷Awaanisa: inni hayyu inqabu, ammo ch'ufa wolgula yaa.

²⁸Qarch'o: isi harkaleeni inqabatani, ammo mana hayyule keesa ind'abani.

²⁹Waan afuri d'ibiti jira, ka yo yaatu nama mamsiiftu:

³⁰Nyeench'a, jaba bineensa ch'ufa ira, ka woma insodaanne;

³¹laleesa ree, korma luku, hayyu nama dura deemu.

³²Yo atini qara daalloofte ufi kiyyibsifte waan hamtu malatte, afaani qabad'i waan suni heregi,

³³yo atini aanani raafte, d'ad'a keesaa baafta. Yo atini nama funnani keesa d'ooftele inni infununa; ammalle yo atini dubbi kokhorsite nama dallansiifte, lolati d'ufa.