Read BORANA BIBLE – KITAABA WAAQA Mammaasa 7 Bible Online

Mammaasa 7 - BORANA BIBLE – KITAABA WAAQA bible

Mammaasa 7

¹Ilma kiyya, dubbi tiyya ch'aqasi, waan anini siti himu inded'ini.

²Seera kiyya jabeesi, duuba injiraata. Barsiisa tiyya akuma ila tante qorqoratu qorqorad'u.

³Barsiisa tiyya jabeesi qaabad'i. Guyya ch'ufa qalbi keesa keeyad'i.

⁴Qaroomani, atini oboleeti tiyya jed'i hubachaleeni, jaala kiyya jaba jed'i.

⁵Qaroomafi hubachaani tunini nad'eeni biyyaa, ta afaanuma ufitini si faraatu, ira si fageesiti.

⁶Guyya toko ato anini qaa mana, Kiyyatini ala laalu,

⁷jara kaima heddu, ka argaa d'ageeti inqamne, arge, ammo worra suni keesa nama tokoti ka nama ch'ufa ira daalle jira.

⁸Inni kara gula d'aatu mana niiti toko ta sharmut'omani gurra baafate, ta mani isii moga ejuuni bahe. Inni

⁹galgala eegi lafti dukanoofte d'aatu mana isii bahe.

¹⁰Jennaani isiini mala d'aate woyya aka sharmut'a hid'atte isani woldeete.

¹¹Isiini mana keesa inteetu, guyya ch'ufa lalaba, ch'eera foko male, dira keesa deemti;

¹²yo gari kara dira keesa ejiti, yo toko gabaya keesa ejite nama eeddi. Isiini kara ch'ufa gula marte nama barbaaddi.

¹³Isiini gurba kaaniti mamarate d'ungate, ila keesa laalte waan jette,

¹⁴Anini arra sorio qalad'e, foonile manaa qaba.

¹⁵Tanaafi anini si barbaadu deema, amma sini bahe!

¹⁶Anini sire tiyya woyya barriti lafa Misiriti mid'aasanini afe.

¹⁷Qayya qumbitifi qunch'e birresatifi hargeesa yayu iti naqe.

¹⁸Kooti, halkani kana ch'ufa haga quumnuti woliini rafne wolti mamaranna.

¹⁹Woma insodaatini, d'iirsi kiyyaleeni worra injiru, ya imaltu fago d'aqe.

²⁰Inni ya beese guddo fud'ate imaltu deeme, torbaani lama asi ingalu.

²¹Duuba isiini mid'aagumafi dubbi dansaani isa ufiti d'araasifte, innileeni suni gula laafe gula bahe.

²²Maro tokotu inni akuma looni qalma geesani kae isii gula deeme, akuma gugufto t'urura fulla

²³t'iyaani woraananiti deemtu deeme. Inni akuma simpirre t'urura seentu, ta aka lubbuuni isi gaargala keesa jirtu imbeenne, jira.

²⁴Amma tana ilmaani tiyya, na ch'aqasa, waan anini jed'ule qalbi keesa keyad'a.

²⁵Niitiini akana tunini qalbi si fuute gula indedeemini.

²⁶Isiini qara d'iira heddu galafatte, nama muumme inqamne fit'e.

²⁷Nami mana isii d'aqu seera nama boola ekhera deemu, karaani gabaabani duati nama geesu kana.