Read BORANA BIBLE – KITAABA WAAQA Abba herega 3 Bible Online

Abba herega 3 - BORANA BIBLE – KITAABA WAAQA bible

Abba herega 3

¹Wonti lafa gubbati taha ch'ufti guyyaafi yo ufi qabdi:

²Guyya d'alootatifi guyya dua; guyya oobranifi guyya buqisani;

³guyya ijeesanifi guyya fayyisani; guyya ch'ach'absanifi guyya ijaarani;

⁴guyya bohanifi guyya koblani; guyya golgolatiifi guyya sirba;

⁵guyya d'iirsafi niiti woliini bulanifi guyya woliini imbulle; guyya wold'ungatanifi guyya woli ind'unganne;

⁶guyya barbaadanifi guyya balleesani; guyya olkayanifi guyya gagatani;

⁷guyya tarsaasanifi guyya wolti hod'ani; guyya ch'allisanifi guyya dubbatani;

⁸guyya woljaalatanifi guyya woljibani; guyya had'iisatiifi guyya nagaya.

⁹Ehayi, nami wo hojatu maani huji suni ira argata?

¹⁰Anini imbeekha, ulfinna gudda Waaqi nama ira kaye.

¹¹Inni hojja waan ch'ufa tolchani ya mid'aase. Inni herega waan iti deemani ya namaa kenne, ammo waan inni tolchu quubse nama ingarsiisu.

¹²Duuba wonti anini arge, aka nami ch'ufti haga lubbu qabu gammade waan dandau tolchu.

¹³Nami ch'ufti ha nyaate d'uge waan hojate gammadu; tunini ch'ufti kenni Waaqaati.

¹⁴Anini imbeekha, wonti Waaqi tolchu ch'ufti ind'umattu, waan tokole iti indarani, womale keesaa imfuud'ani. Wonti Waaqi waan kana tolcheefi aka nami ch'ufti isa sodaatu.

¹⁵Wonti jiraatiifi yokhaani wonti gad'ufaleeni qara taate. Waaqi woma qara tahe yo ch'ufa gadeebisa.

¹⁶Tana malele, lafa tana keesati anini waan ch'ubbu fulla d'ugaafi qajeelumti jiraachu malteti arge.

¹⁷Anini waan jed'e, Waaqi nama d'ugaatifi ka dabale woma takaani qora, waan tahe ch'ufafi wonti ch'ufti hojuma ufi ka kurfeesani taati.

¹⁸Anini buufad'e waan jed'e, Waaqi nu ilaalachu jira, inni aka nu bineensa ira injirre nu garsiisa.

¹⁹Silaaftu woma takaati namafi bineensale eegata, waan kaanileeni akuma kaani duufi. Worri ch'ufti bineensuma aka takaati, namileeni bineensa ira injiru; wonti akanatiifi jireenni worraa lachuleeni woma keesa injiru.

²⁰Worri ch'ufti fulluma tokoti yaa; biyyuma taka keesaa bahe, ammalle biyyuma takaati deebia.

²¹Eentu beekha, aka lubbuuni namaa gubbati deemte ammo ta bineensa lafa seentu?

²²Tanaafi wonti dansaani nami tolchuu male, ka anini arge, nami waan hojate argate nyaate d'uge gammaduuni male. Wonti tokoleeni d'ibiini ka nu tolchinu injirtu, karaani tokoleeni ka waan nu eegi doone taanu beenuuni injiru.