Read BORANA BIBLE – KITAABA WAAQA Qarooma Solomoni 12 Bible Online

Qarooma Solomoni 12 - BORANA BIBLE – KITAABA WAAQA bible

Qarooma Solomoni 12

¹Lubbuuni tante ta jireenna woi kennitu, waan suni ch'ufa keesa jirti,

²tanaafi nama siti ch'ubbamu laanuma gorsite qajeelchita. Atini worra waan worri tauti jiru qabsiifte ammalle gorsite, aka worri akasini kara worra hama lakise si Aabbo Waaqa d'ugefatu.

³ Atini worra duri lafa tante qulqullo keesa tae, jibbite waan worri waan hamtu taefi; worri falfala tolfate, kara qulqulluma inqamneni Waaqa kad'ate,

⁵ijoolle naasu male fit'e, foonifi diiga namaa soorate. Worri aada d'ossa tolfate,

⁶aada suni gula abbootini ijoolle worraa ta woma keesa injire fit'ani. Fed'i tante gula ababooti teenna worra suni balleesite,

⁷aka akasini lafti atini lafa ch'ufa ira jaalatu lafa dansa worri kanke iti galu taatu.

⁸ Ammo tana keesaleti atini nyaapa gumi teetile innahata, waan worrileeni namatifi. Atini sonsa duula kanke dura ergite, sonsi sunini laanuma nyaapa suni hobaase.

⁹Atini dandeete yo feete, harka gumi tante ta d'ugaatini worra Waaqa imbeenne suni lola keesati balleesita; yo feete dandeete bineensa alale iti kaafte yokhaani jechuma jaba tokooni balleesite.

¹⁰Ammo atini fulla ato aka d'alooti worra hama, ka haga d'alate worra ch'ubbu, ammalle aka worri haguma jiru herega worraa gara ingalfanne beetele, wollaala worra hariifate iti imure qoomni kenniteefi aka worri ch'ubbu ira deebiu.

¹¹Gochiti worraa ch'ufti haguma d'alate abaarsa qabdi, ammalle atini maro worra sodaate jette ch'ubbu worraati worra ingaargalchine.

¹²Worra ch'ubbu sunile siti uume, ammalle nami tokoleeni worraa kalche, Waaqi fayyuma tana worra suni balleesa injinne. Nami tokoleeni ka atini maafi waan kana tolchita, nu si inquumne jed'u injiru.

¹³Wonti ch'ufti harka kanke keesa jirti, ammalle waaqi d'ibiini ka atini gaateni, wo si gaafatu injiru.

¹⁴Hayyufi nami lafa fidu tokoleeni ka dandae atini worra kana dabaani gaargalchite jed'e si himatu injiru,

¹⁵atini ka d'ugaati waan ch'ufa d'ugaani mohata, atini taka irre teetini nama woma intahini wollaala iti imure.

¹⁶D'ugaani jabeenna kanke keesa baati, waan atini abba nama ch'ufatifi dandeete nama naata.

¹⁷Hojja nami aka jabeenni kanke qit'ee ind'ugefanne atini irre tante garsiifte nama jabeenna suni beekhe, ammo womatu daru didele atini ingaargalchita.

¹⁸Ato atini irre guddo qabatele atini kara naasutini dubbi namaa qorta atini sila woma feetu nu tolchita, ammo waan suni dide obsa guddaani nu fida.

¹⁹Atini huji tantetini ya gumi tante aka nami d'ugaa qajeelani naasu qabaachu male garsiifte. Atini worra kankeetini ch'ubbu iraa deebia jetteeni, akasini abdi guddo kenniteefi.

²⁰Atini gaafa nyaapa gumi teeti gaargalchite ch'allesafi obsani gaargalchite, hojja worri duu malele, atini qoomni worraa kennita aka worri kara daba kaani ira deebiu.

²¹Ammo atini ato duri ababoota gumi teetitini waan dansa isanii kenna jette, kakhate wold'aqisa woliini tolfatele, atini dubbi gumi suni naasu male qorta.

²²D'uguma atini nu gaargalchita, ammo nyaapa keenna maro kuma kud'ani nura gaargalchita, aka nu yo nama d'ibi wollaala iti muru dansuma tante qaabannu yo wollaala nuti muranile naasu tante eegannu.

²³Duuba akanani worra daalluma keesa ch'ubbu tolchu, waan hamtu worri kad'atuni d'aante gaargalchite.

²⁴Worri aka male kara ira gore, akasini d'uga ira fagaate, bineensa hamama nami jibbe tuffatu kad'ate. Worri akuma ijoolle didiqo sobame.

²⁵Tanaafi atini maro daalluma worratifi worra gaargalchite, qorsumani teetileeni worra daleesite.

²⁶Gaargali sunini diqa ammo nama gorsa akasi suni fud'achu didu, Waaqi aka taka inargini wollaala iti mura.

²⁷Gaafa bineensa worri Waaqa tolfatu sunini worra gaargalchani, worri guddo laalefate garaa hammate, aka waaqi d'ugaa kama duri worri dide kaani argani, sunifi aka taka inargini gaargalchani.